Read Hawaii Pidgin Ezra 6 Bible Online

Ezra 6 - Hawaii Pidgin bible

Ezra 6

¹So King Darius tell his peopo fo go look inside da Babylon records. (Dis da odda King Darius granson.)

²But dey neva find notting dea. Dey find um Medea side, inside da town wit da strong walls dat dey call Ekbatana. Dey find one paypa dat stay roll up. An dis wat da paypa say: Govmen Paypa:

³Da firs year Cyrus was King, he make dis govmen paypa bout da House Fo God Jerusalem side: “Gotta build da Temple one mo time, da same place wea befo time da Jewish peopo make dea sacrifices. Keep da foundation same size jalike befo time. Make um 45 feet wide, 90 feet long, an 30 feet high.

⁴Use cut stone blocks, three course high, den one course wood, den stone, den wood, lidat. Use da King's money fo pay fo eryting.

⁵Get plenny gold an silva tings from da House Fo God. Befo time, King Nebukadnezza wen take dem outa da Temple dat wen stay Jerusalem side, an bring um Babylon side. So, take all dat stuff back to Jerusalem an put um inside da Temple Jerusalem side, jalike dey wen stay befo time inside da House Fo God.” Dass wat King Cyrus write befo time.

⁶King Darius Two send dis message: “Dis letta fo Govna Tatnai, Wes Eufrates Side, an fo Shetar-boznai, an all you odda friends an offisho govmen guys, Wes Eufrates Side: “You betta not go dea Jerusalem side!

⁷No bodda da work dey stay doing fo build da House Fo God. Let da Judah territorial govna guy an da Jewish leada guys build dis House Fo God one mo time, da same place jalike befo time.

⁸“But dis wat I telling you guys fo do: Go help da Jewish leada guys fo build da Temple Fo God one mo time. Take da tax money dat you guys stay take fo me ova dea Wes Eufrates Side, an pay fo all da work. No wase time, no good dey gotta stop da work.

⁹Wateva da pries guys need Jerusalem side, give um -- young boy kine cows, boy an girl kine sheeps fo make sacrifice fo Da God Dat Stay Inside Da Sky. Make shua dey get da wheat, salt, wine, an olive oil dat dey need ery day,

¹⁰so dat dey can make da kine sacrifices dat Da God Dat Stay Inside Da Sky like, an dey goin pray fo me da King fo stay alive, an fo my boys.

¹¹“Anybody go change dis an no do how I tell um, you guys gotta pull one beam outa dat guy's house, make um sharp one side, den poke um thru da guy's body fo kill um. Bus up da guy house an make um one rubbish pile.

¹²God wen pick Jerusalem town fo be da place wea peopo can come cuz dey know wat kine God him. So den, if any king, o any peopo, change dis ting wat I say hea, o if dey bus up dis Temple Jerusalem side, I like da God fo da Jewish peopo, bus up dem. Dis me, King Darius, dat stay tell you all dis. So do um, and no wase time!”

¹³Den, cuz a wat King Darius wen tell dem, Govna Tatnai, Shetar-boznai, an dea helpa guys wen go do eryting King Darius tell um fo do, right den an dea.

¹⁴So da Jewish leada guys neva stop working. Da guys Haggai an Zekaraiah Iddo boy, dat talk fo God, dey wen give good words to da leada guys wen dey teach. Afta long time, dey pau build da Temple, jalike da God fo da Israel peopo wen tell um fo do, an jalike da Kings fo da Persia peopo, Cyrus, Darius, an Artaxerxes wen tell um fo do.

¹⁵Dey pau build da Temple March 12, da numba 6 year dat Darius was King.

¹⁶Den dey make one spesho day fo give da Temple to God. Da Israel peopo -- dass da prieses, da Levi ohana guys, an all da odda peopo dat come back from Babylon -- dey feel real good inside.

¹⁷Fo give da Temple to God, dey make plenny sacrifice. Dey kill hundred young boy kine cows, two hundred boy kine sheeps, an four hundred baby sheeps. Dey bring twelve boy kine goats fo make sacrifice fo take away da shame fo all da bad tings dey wen do, one goat fo ery one a da twelve Israel ohanas.

¹⁸Den dey put da mens fo da pries guys work togedda inside da Temple Fo God Jerusalem side, an same ting fo da Levi ohana peopo dat help da prieses. Dey do um jalike da Rules say, eryting dat Moses wen write down fo dem inside his book.

¹⁹April 21, da peopo dat come back from Babylon all eat da Passova food.

²⁰Dey can do dat, cuz all da pries guys an dea helpas from da Levi ohana wen awready make da right sacrifices fo come so dey can go in front God. Az why dey can work inside da Temple. Da pries guys wen kill da bebe sheeps fo da Passova food, fo all da peopo dat come back from Babylon, an fo da odda pries guys, an fo demself.

²¹All da Israel peopo dat wen come back from Babylon wen eat da Passova food. Odda peopo from da Judah land, dat wen stop do all da pilau kine stuff dat dea peopos stay do, an dey come jalike da Israel peopo an pray to dea God, Yahweh, dey eat da Passova food too.

²²Fo seven days, dey all wen make da spesho kine time fo Da Bread Dat No Mo Yeast Inside, an dey feel real good inside cuz a dat. Yahweh make um feel good inside, cuz he wen make King Darius come nice an tink diffren bout da Israel peopo den he tink befo time. Az why King Darius help um fo build da House Fo Da God Fo Da Israel Peopo, one mo time.