Read Hawaii Pidgin Ezra 7 Bible Online

Ezra 7 - Hawaii Pidgin bible

Ezra 7

⁵(1-5) Long time afta da Temple pau build, an Artaxerxes was da King Persia side, had one guy Ezra. He come from da pries ohana. Ezra ancesta guy Aaron was da firs main pries. Den afta him come Aaron's boy Eleazar, den Finehas, den Abishua, den Bukki, den Uzzi, den Zerahiah, den Meraiot, den Azariah, den Amariah, den Ahitub, den Zadok, den Shallum, den Hilkiah, den anodda Azariah, den Seraiah. Ezra, he get Seraiah blood.

⁶An Ezra, he know plenny bout da Rules dat Yahweh, da God fo da Israel peopo, wen give to da Israel peopo befo time. An Ezra know how fo teach um. Yahweh, da God dat Ezra pray to, like do good tings fo Ezra, an help um plenny. Az why King Artaxerxes wen give Ezra eryting he aks the king fo give him. So dat time, Ezra wen leave Babylon an go Jerusalem.

⁷Da numba seven year dat Artaxerxes stay King, some a da Israel peopo from Babylon wen go wit Ezra, an some a da pries guys an da pries helpa guys from da Levi ohana, an da guys dat play da music, da guys dat get da job fo watch da Temple gates, an da guys dat stay work fo da Temple. An dey all go Jerusalem togedda.

⁹(8-9) Ezra an da odda peopo wen leave Babylon April 8, dat year. Dey reach Jerusalem dat same year Augus 4, cuz da God dat Ezra pray to, like do good tings fo Ezra an help um plenny.

¹⁰God like Ezra plenny, cuz Ezra erytime make up his mind fo study da Rules dat Yahweh wen give da peopo, an do eryting God say, an teach da Israel peopo da Rules an all da tings God say cuz he da judge.

¹¹Befo Ezra da pries leave Babylon, King Artaxerxes wen give one letta to him, cuz he da one wen study da tings Yahweh say da Israel peopo gotta do an da Rules Yahweh wen give dem. Dis wat da letta say:

¹²“Aloha! Dis letta from me, King Artaxerxes, da king ova all da odda king guys. I write um fo Ezra da pries guy, da one dat teach da Rules from da God Inside Da Sky.

¹³“Dis wat I tell: Any Israel peopo dat live inside da places wea I stay da King, if any a dem like go back Jerusalem side wit you, no matta dey prieses, o Levi ohana peopo, o regula peopo, az okay fo dem go.

¹⁴Me an my seven guys dat help me know wat fo do, we talk bout wat you goin do. An now, we like you fo go find out how eryting stay Judah side an Jerusalem side. You know da Rules from yoa God plenny. Tell me if da peopo ova dea stay do wat da Rules say.

¹⁵We like you take silva an gold wit you, an we stay give you plenny so you can make sacrifice to da God fo da Israel peopo, da God dat stay Jerusalem side.

¹⁶“Wateva silva an gold da peopo all ova da Babylon side give you, an wateva yoa peopo an dea pries guys give you fo build da Temple fo dea God inside Jerusalem, take dat too.

¹⁷Wit da money dat you get, you gotta buy boy kine cows, boy kine sheeps, bebe sheeps, an wheat an wine, fo make sacrifices on top da altar inside da Temple fo yoa God ova dea inside Jerusalem.

¹⁸If still yet get some mo money afta wat you wen buy fo make da sacrifices, den pray fo find out wat yoa God like fo you an yoa guys do wit da extra money, an go do um.

¹⁹Us guys give you plenny tings fo put inside da Temple fo yoa God, fo use dea. Make shua you put eryting inside da Temple fo da God Dat Stay Live Inside Jerusalem.

²⁰An if you need odda tings fo da Temple fo yoa God, you can use some a da tax money dat da govmen guys take fo me, da King.

²¹“Fo all you govmen guys dat take care da money fo me inside da Wes Eufrates Side, me, King Artaxerxes, tell you guys fo do: Give Ezra wateva he aks you guys fo give him. Cuz he one pries, an he teach da Rules from da God Inside Da Sky.

²²Give him up to 7,500 pound silva, nuff wheat dat need 100 donkeys fo carry, nuff wine dat need 100 donkeys fo carry, same ting fo da olive oil, an all da salt he need.

²³Eryting dat Da God Inside Da Sky say do fo his Temple, make shua you guys do um. Cuz no good, make dat God come huhu wit me o wit my boys!

²⁴An one mo ting: Fo da pries guys, dea helpa guys from da Levi ohana, da music guys, da security guards, da worka guys inside da Temple, o odda guys dat stay work fo God's Temple, you govmen guys no mo da right fo tell dem dat dey gotta pay da regula tax o da tax you pay fo bring tings from odda places, o land tax.

²⁵“An you, Ezra, yoa God help you know wat fo do erytime. So, pick guys dat know how fo bring peopo back togedda wen dey huhu, an judge guys too. Dey goin judge all da peopo dat know da Rules from yoa God inside da Wes Eufrates Side. Da peopo ova dea dat donno da Rules, you gotta teach dem da Rules.

²⁶Anybody dat no like do wat da Rules from yoa God tell, o da rules dat I make cuz I da King, go punish dem right den an dea -- kill um, o throw um outa yoa land, o take da tings dey own, o put um inside jail.”

²⁷Den Ezra tell: “I like tell erybody good tings bout Yahweh, da God fo oua ancesta guys. He da one dat wen make King Artaxerxes help fix da Temple Fo Yahweh, Jerusalem side, an make um real nice!

²⁸An I like tell erybody mo plenny good tings bout Yahweh still yet, cuz he wen show erybody dat he stay stick wit his peopo. Yahweh wen make me come tight wit da King, an da guys dat help him know wat fo do, an all da odda govmen peopo! Yahweh, da God I pray to, he like do good tings fo me, an help me plenny. Az why I wen get togedda da leada guys fo da Israel peopo fo come go Jerusalem wit me.