Read Hawaii Pidgin Ezra 8 Bible Online

Ezra 8 - Hawaii Pidgin bible

Ezra 8

¹Dis da ohana names dey wen write down, fo da ohana leada guys dat come back wit me from Babylon. Dat time, Artaxerxes was da king.

²From da Finehas ohana: Gershom. From da Itamar ohana: Daniel.

³From da David ohana: Hattush Shekanaiah boy. From da Parosh ohana: Zekaraiah, an dey write down 150 odda guys too from dat ohana.

⁴From da Pahat-Moab ohana: Eliho`enai Zerahaiah boy, wit 200 odda guys.

⁵From da Zattu ohana: Shecanaiah Jahazi`el boy, wit 300 odda guys.

⁶From da Adin ohana: Eben Jonatan boy, wit 50 odda guys.

⁷From da Elam ohana: Isaiah Atalaiah boy, wit 70 odda guys.

⁸From da Shefataiah ohana: Zebedaiah Michael boy, wit 80 odda guys.

⁹From da Joab ohana: Obadaiah Jehi`el boy, wit 218 odda guys.

¹⁰From da Bani ohana: Shelomit Josifaiah boy, wit 160 odda guys.

¹¹From da Bebai ohana: Zekaraiah Bebai boy, wit 28 odda guys.

¹²From da Azgad ohana: Johanan Hakkatan boy, wit 110 odda guys.

¹³From da Adonikam ohana: Elifelet, Jeiel, Shemaiah, wit 60 odda guys. (Dey no come wit da oddas, dey come afta.)

¹⁴From da Bigvai ohana: Utai an Zabbud, wit 70 odda guys. All dese, da guys wen come back wit me.

¹⁵Befo we go, I wen tell erybody fo come togedda by da Ahava Watta Ditch. All us guys make camp dea three days. I check da names fo da pries guys an fo da regula peopo. I find out, dat no mo nobody goin go from da pries helpa guys from da Levi ohana!

¹⁶So I send peopo fo tell da leada guys Eliezer, Ariel, Shemaiah, Elnatan, Jarib, da odda Elnatan guy, Nathan, Zekariah, an Meshullam, fo meet wit me. I send odda guys fo tell Joiarib an one nodda Elnatan guy fo come too, cuz dey know wat fo do erytime.

¹⁷Den I tell all dose guys fo go by Iddo, da leada fo da Levi ohana peopo Kasifia side, an talk to Iddo an his ohana peopo an da guys from Kasifia side dat suppose to work inside da Temple. Dey suppose to aks Iddo guys fo send us some Levi guys fo work inside da Temple Fo Oua God, Jerusalem side.

¹⁸Da God us guys pray to, he like do good tings fo us, an help us plenny. Dass why dey send us one guy Sherebaiah, wit his bruddas an dea boys, all togedda 18 guys. Sherebaiah guys, dey da kine guys dat undastan plenny stuff. Sherebiah come from Mahli, an Mahli come from Levi, Israel boy.

¹⁹Dey send one nodda guy Hashabaiah, an Jeshaiah dat come from Merari, wit his bruddas an dea boys, all a dem 20 guys.

²⁰Dey send 220 guys fo work inside da Temple too. (Befo time, King David an his govmen guys wen set up da Temple worka guys fo help da Levi guys.) Dey write down all dea names.

²¹By da Ahava Watta Ditch, I tell erybody fo no eat so dey can pray, an fo come togedda in front God an show dat we need him plenny. We aks God fo take us to Jerusalem, fo watch us an nobody get hurt -- us guys, our kids, an all da stuffs we taking wit us.

²²I shame aks da King fo send army guys an horse rida guys fo go wit us and make shua nobody come agains us guys wen we stay going. Cuz us guys wen tell da King befo time, “Our God, he stay take care all da peopo dat stay pray to him, but he stay huhu an make strong agains all da peopo dat ack jalike he notting.”

²³Dass why us guys skip food so we can pray. We aks God plenny fo take care us. An he lissen, an he take care us.

²⁴Den I wen pick twelve a da main pries guys: Sherebaiah, Hashabaiah, an ten odda leada guys from da prieses.

²⁵I make dem in charge a da Temple kine stuffs, da silva, da gold, da gold bowls. Had plenny odda stuffs dat da king an his leada guys, an da Israel peopo dat was dea, wen give us guys fo put inside da Temple Fo God.

²⁶Wen I give dem all da stuffs dat cos plenny dat we goin take, I weigh eryting. Dis how much eryting weigh: Silva, 24 ton. Tings made wit silva, 7,500 poun. Gold, 7,500 poun.

²⁷Gold bowl, 20, dat cost 1,000 piece gold money from Persia. Tings made wit da bestes kine bronze metal, shiny kine jalike one mirra, cos plenny jalike dey was gold.

²⁸I tell da pries leada guys: “You guys stay real spesho fo Yahweh now. Same ting wit all dese tings fo da Temple, dey spesho fo Yahweh too. All dis silva an gold kine stuff, da peopo wen take um to Yahweh, cuz dey like. He da God dat oua ancesta guys wen pray to.

²⁹Take good care all dis tings. Wen you come to Jerusalem, go check how much dey weigh fo make shua you neva lose notting. Weigh eryting in front da main pries guys, da Levi ohana guys, an da leadas fo da Israel ohanas, right dea by da storage places fo da Temple Fo Yahweh, ova dea inside Jerusalem.”

³⁰Afta dey weigh eryting, da pries guys an da Levi ohana guys take all da silva an gold kine stuff inside da Temple Fo God inside Jerusalem.

³¹April 19, we leave our camp nex to da Ahava Watta Ditch, fo go Jerusalem. Da God us guys stay pray to, like do good tings fo us an help us plenny. Az why God wen take care us guys all da way. Da peopo dat like go agains us guys an da guys dat like jump us, he no let dem hurt us.

³²Den we reach Jerusalem an res dea three days.

³³Da numba four day afta we come Jerusalem, we go da Temple Fo Oua God. Ova dea we weigh da silva metal an da gold metal an all da bowls an odda tings. We give eryting to Meremot Uriah's boy, da pries guy, an to Eleazar Finehas boy. Two a da Levi ohana guys, Jozabad Jeshua's boy an Noadaiah Binnui's boy, dey wen check um too.

³⁴Dey wen count eryting an weigh eryting fo make shua us guys no lose notting. Right den an dea, dey make da Temple record, dat tell how much da whole ting weigh.

³⁵Den, all da peopo dat wen come back from Babylon bring animals fo make sacrifice. Dey make da kine sacrifice dat you burn up eryting fo da God Fo Da Israel Peopo -- 12 boy kine cows fo all da Israel peopo, 96 boy kine sheeps, 77 bebe sheeps. Dey kill 12 boy kine goats fo hemo da shame fo da bad kine tings dey wen do. Ery one a da sacrifice, dey burn um all up.

³⁶Den dey take da lettas from da King dat tell da govmen guys wat dey gotta do. Dey give da lettas to da King helpa guys, an da territorial govna guys fo da Wes Eufrates Side. Da govmen peopo wen do plenny kine stuff fo help da peopo, an fo build da Temple Fo God.