Read Hawaii Pidgin Nehemiah 1 Bible Online

Nehemiah 1 - Hawaii Pidgin bible

Nehemiah 1

¹Dis da story Nehemiah wen tell bout wat wen happen to him. He Hakaliah boy. He tell dis: Artaxerxes was king inside Persia. Was Novemba, da numba 20 year dat he stay king. Datime, I stay live inside Susa town. One big town wit strong walls wea da king live.

²One a my bruddas, Hanani, come fo visit me ova dea wit some odda guys dat jus come back from da Judah land. I aks dem bout Jerusalem town, an bout the Jewish peopo dat da Babylon army wen go take Babylon side befo time, an now dey go back Judah side fo live.

³Den dey tell me, “Da Babylon king wen take away oua peopo from dea land an bring um ova hea, Babylon side. Lata, plenny peopo wen go back Jerusalem side fo live inside Judah. But tings no stay good ova dea too you know. Cuz stay real hard fo dem, an da odda peopos ova dea stay make dem plenny shame. Da Babylon army guys wen broke down da strong walls aroun Jerusalem town, an burn down da gates.

⁴Wen I hear dis, I sit down an cry plenny. Fo days I cry, an no eat notting so I can pray. I stay pray in front da God dat live inside da sky.

⁵Dis wat I tell: “Yahweh, you da God dat live inside da sky! You da big an awesome God. You wen make one deal fo da peopo dat get love an aloha fo you, da ones dat stay do wat you tell um fo do. An you stay stick wit yoa peopo cuz you wen make dat deal wit dem.

⁶Try look down hea. I stay praying day time an nite time, fo you help yoa peopo, da Israel peopo. I stay tell you strait, us Israel peopo wen do plenny bad kine tings agains you. Me an all my ohana peopo, wen do bad kine tings!

⁷We stay do real bad kine tings agains you. We no do da tings you stay tell us fo do. You wen give yoa worka guy Moses yoa Rules an all da tings we gotta do, but we no do um.

⁸“No foget wat you wen tell yoa worka guy Moses. You tell um: ‘If da way you guys ack, show I no can trus you, den I goin make you guys go all ova da place, fo live unda all da diffren peopos.

⁹But if you guys come back an change how you ack, be my guys, an stay do all da tings I say you gotta do, den I goin bring you guys back. I goin bring you guys togedda ova dea, da place I wen pick fo show wat kine God me, so dat you guys can show respeck fo me. No matta you guys stay far place all ova da world, I goin bring you guys back!’

¹⁰“All us guys, we get you fo oua boss. Us da peopo you wen get outa trouble, cuz you strong, an you get plenny powa!

¹¹Eh! You my boss, so I pray hard to you, an I like you fo lissen good. Get odda peopo, you da boss fo dem too, an dey stay good inside cuz dey know wat kine God you, no matta dey scared wen dey in front you. Dey stay aksing you da same ting. So I like you make eryting come good fo me today. Cuz I goin aks da King fo do someting real good fo me, an I aksing you fo make him lissen to me.” Dat time, I was da king guy, in charge a da wine da king goin drink.