Read Hawaii Pidgin Nehemiah 11 Bible Online

Nehemiah 11 - Hawaii Pidgin bible

Nehemiah 11

¹Now, da leada guys fo da peopo live inside Jerusalem town. So all da odda peopo wen pull name fo pick one ohana from ery ten ohanas. Da ones dey pick, gotta move house fo live inside Jerusalem, da town dat stay spesho fo God. Da odda nine ohanas stay inside dea own towns.

²Get odda peopo wen like go live inside Jerusalem town too, an da odda peopo wen tell dem, “Us guys like fo God do good tings fo you guys!”

³Dis da names a da main leada guys fo da districk, dat wen go live inside Jerusalem town. (Inside da odda Judah towns, all da Israel peopo dat stay dea, live on top dea own land, da peopo an da prieses an da Levi ohana guys, da guys dat stay work inside da Temple, an odda peopo dat come from da guys dat wen work fo King Solomon.)

⁴But inside Jerusalem town, get some a da peopo from da Judah an da Benjamin ohanas dat live dea too. From da Judah ohana: Ataiah, his fadda Uzziah an his odda ancesta guys Zekariah, Amariah, Shefatiah, Mahalalel, all da way back to Perez.

⁵Ma`aseiah, his fadda Baruk an his odda ancesta guys Col-hozeh, Hazaiah, Adaiah, Joiarib, anodda Zekariah, all da way back to da guy from Shiloh.

⁶Get 468 army guys dat good fo fight an get Perez fo dea ancesta guy, dat live inside Jerusalem town.

⁷From da Benjamin ohana: Sallu, his fadda Meshullam, his odda ancestas Joed, Pedaiah, Kolaiah, anodda Ma`aseiah, Itiel, all da way back to Jeshaiah.

⁸Sallu get two guys dat follow him, Gabbai an Sallai. Dat make 928 guys.

⁹Joel, Zikri boy, stay in charge a dem, an Judah, Hassenuah boy, stay da numba two guy in charge a da big town.

¹⁰From da pries guys, get Jedaiah Joiarib boy, Jakin,

¹¹Seriah Hilkiah boy, his odda ancesta guys Meshullam, Zadok, Meraiot, an Ahitub, dat befo time was da guy in charge a da Temple Fo God.

¹²Wit dea helpa guys dat stay do da work fo da Temple, get 822 guys. An get Adaiah, Jeroham boy, dat get ancestas Pelaliah, Amzi, anodda Zekariah, Pash-hur, an Malkijah.

¹³Adiah get odda helpa guys dat was da main guys fo da ol ohanas, an togedda dey make 242 guys. Amash-sai, Azarel boy, his ancestas Ahzai, Meshillemot, an Immer.

¹⁴Wit dem an all dea helpa army guys dat stay good fo fight, 128, wit Zabdiel, Haggedolim boy, ova dem.

¹⁵Da Levi ohana guys: Shemaiah Hasshub boy, wit ancestas Azrikam, Hashabiah, an Bunni.

¹⁶Had Shabbetai and Jozabad too, dat was da two leadas fo da Levi ohana peopo an dat stay in charge a da guys dat do da work outside da Temple Fo God.

¹⁷Mattaniah, Mica boy, wit ancestas Zabdi an Asaf, was da leada dat help da peopo start fo tell God “Mahalo plenny!” an pray to God, an His helpa guy was Bakbukiah, an den Abda Shammua wit ancestas Galal an Jedutun.

¹⁸All da Levi ohana guys dat stay live inside Jerusalem, da Town Dass Spesho Fo God, dey 284 guys.

¹⁹Da guys dat watch da gates fo da Temple, Akkub an Talmon an dea helpas, 172 guys dat stay watch da gates.

²⁰All da odda pries guys an Levi ohana guys an da res a da Israel peopo, dey live inside da small towns Judah side, an erybody dea get dea own ohana land.

²¹But da guys dat stay work inside da Temple Fo God, dey live on top Ofel Hill nea da Temple, an Ziha an Gishpa stay in charge a dem.

²²Inside Jerusalem, da guy dat stay in charge a da Levi ohana guys was Uzzi, Bani boy, his odda ancestas Hashabiah, Mattaniah, an Mica. All dese guys come from Asaf. Dey da singa guys, an dey stay in charge a da music fo da Temple Fo God.

²³Befo time, was da King dat tell da singa guys wat dey gotta do, an dass wat dey do ery day.

²⁴Petahiah Meshezabel boy, wit Zerah an Judah fo his ancestas, he da one dat talk fo da King bout eryting da peopo need.

²⁵Had plenny small towns dat no mo strong wall, wit dea fields. Some a da Judah peopo wen live inside Kiriat-Arba an da small towns aroun dea, oddas inside Dibon an da towns ova dea, oddas inside Jekabzeel an da towns ova dea,

²⁶an inside odda small towns too, Jeshua, Moladah, Bet-Pelet,

²⁷Hazar-Shual, Beer-Sheba an da small towns aroun dea,

²⁸Ziklag, Meconah an da towns dea,

²⁹En-rimmon, Zorah, Jarmut,

³⁰Zanoah, Adullam, da small towns dea, Lakish an da fields aroun da town, Azekah an da small towns dea. So dey wen make house from Beer-sheba to da Hinnom Valley.

³¹Da Benjamin peopo, dey live Geba town an da odda side, Mikmash, Aija, Bethel an da towns aroun dea,

³²Anatot, Nob, Ananiah,

³³Hazor, Ramah, Gittaim,

³⁴Hadid, Zeboim, Neballat,

³⁵Lod, an Ono inside da valley wea da guys dat make fancy kine tings live.

³⁶Some ohanas from da Levi peopo dat stay inside Judah wen go live wit da Benjamin peopo.