Read Hawaii Pidgin Nehemiah 13 Bible Online

Nehemiah 13 - Hawaii Pidgin bible

Nehemiah 13

¹Dat same day, da leada guys read from da book Moses wen write, cuz dey like da peopo lissen. Dey find out inside da book, dat nobody from da Ammon peopo o da Moab peopo can get da right fo come one Israel guy, fo come togedda wit da Israel peopo an show God love an respeck.

²Cuz long time befo, wen da Israel peopo come outa da boonies, da Ammon an Moab peopo neva go out fo meet da Israel peopo an tell um aloha an give um bread an watta. Dey wen pay Balaam fo put bad kine kahuna on top da Israel peopo. But oua God wen take da bad ting Balaam like do an make um come good.

³Wen da peopo hear wat da Rules from God tell, dey make all da peopo from da odda nations hemo demself from da Israel peopo.

⁴Befo now, had one pries guy Eliashib, dat da main pries guys wen put in charge a da storage rooms inside da Temple Fo Oua God. Eliashib, he Tobiah's relative.

⁵Elishiab wen fix up fo Tobiah, one big room inside da Temple. Befo time, inside dat room dey stay stash da wheat dat da peopo bring to da Temple, an da incense, da spesho dishes, an da ten percen a da wheat, wine, an olive oil. Cuz God wen tell da peopo fo give all dat to da Levi ohana peopo, an da singa guys, an da security guard guys. He tell um fo give stuff to da pries guys too. All dat, dey stay stash inside dat room.

⁶Da time Eliashib do all dat fo Tobiah, I no stay Jerusalem town. I wen go back Babylon side by King Artaxerxes. Was da year numba 32 dat he stay king. Lata, I wen aks da King fo let me go back Jerusalem town.

⁷Da king let me go Jerusalem side. Den I wen find out da bad ting Eliashib wen do fo help Tobiah, fixing up one room fo Tobiah inside da yard, inside da Temple Fo God.

⁸I come plenny huhu, an I throw all Tobiah furnitures an stuffs outa dat room.

⁹Den I tell da pries guys fo make sacrifice, so can use da storage rooms fo God one mo time. Den I bring back all da bowls an tings fo da Temple Fo God, an da incense an da wheat fo make sacrifice.

¹⁰Den I find out da guys in charge a da stuff peopo bring to da Temple, neva give da Levi ohana guys da tings. Cuz a dat, da Levi ohana guys an da singa guys, dat help da odda peopo show love an respeck fo God, dey neva stick aroun, cuz dey gotta farm dea own fields.

¹¹So I tell da guys in charge dey not doing da right ting. I tell, “How come nobody do notting fo da Temple Fo God, aah?” An I make dem come togedda and tell erybody wat dea job suppose to be.

¹²Afta dat, all da Judah peopo wen bring da ten percen a da wheat, an wine, an olive oil dey wen get. Dey put um all inside da storage places inside da Temple.

¹³I wen make guys stay in charge a da money an da storage places. Get da pries guy Shelemiah, da guy Zadok dat stay teach da Rules From God, an Pedaiah from da Levi ohana. Fo dese guys I give um Hanan fo helpa, Zakkur's boy an Mattaniah's grankid. Cuz dese da guys erybody can trus. Dea job was fo make shua da guys dat work wit dem get da stuffs fo give to da Levi ohana guys an da prieses.

¹⁴Eh my God! No foget dis ting I wen do cuz I stay stick wit you! No wipe out da good tings I wen do fo da Temple Fo My God an fo take care da place!

¹⁵Dat time, I see one nodda ting happen Judah side. On da Res Day, I see da peopo smashing grape wit dea feets fo make wine, an bringing plenny wheat an putting um on top da donkeys. I see um bringing wine, grape, fig, an all kine heavy stuff inside Jerusalem town, on da Res Day. Right den an dea, I tell um “No sell food on da Res Day!”

¹⁶Same time, had peopo from Tyre town dat live inside Jerusalem town. On da Res Day dey wen bring fishes an all kine stuff fo sell to da Judah peopo, inside Jerusalem.

¹⁷Den I tell off da Judah ali`i guys: “Wat you guys doing?! Real pilau, you know! You ack jalike da Res Day da same, jalike da odda days!

¹⁸You guys stay make jalike yoa ancesta guys. Az why God wen wipe out all us guys an bus up oua town! An den, you guys like make God mo plenny huhu wit us Israel guys, cuz you stay ack jalike da Res Day da same, jalike da odda days!”

¹⁹Da day befo da Res Day, da time wen start fo come dark litto bit, I tell um fo shut da Jerusalem town gates. I tell um, “You betta not open da gates till da Res Day pau.” I put some a my own worka guys in charge a da gates, so nobody can bring even one load inside, on da Res Day.

²⁰One o two times, da guys who get store, an da guys dat like sell all kine stuffs on top da streets, gotta stay all nite outside Jerusalem town.

²¹I talk mean to dem: “You guys no can do how you stay doing. How come you guys stay all nite in front da gate?! You do dat one mo time, I put you in jail!” From dat time dey no come inside da town, on da Res Day.

²²I tell da Levi ohana guys fo make da sacrifices so dey can work fo God, den come an be security guards by da gates, fo make shua da Res Day stay spesho fo God. Eh my God, try no foget dis ting I wen do, an tink good bout me! Let me go, an no hurt me, Cuz you stay stick wit yoa peopo all da time!

²³Dat time too, I wen see Jewish guys dat wen marry wahines from Ashdod, Ammon, an Moab.

²⁴Half a dea kids talk Ashdod kine. Dey donno how fo talk Judah kine, cuz dey use da odda peopos language.

²⁵I tell dem strait, “Az wrong!” I tell um off. I bus um up. I even pull out da hair from some a da guys! Den I make dem make one strong promise an aks God fo wipe dem out if dey no do wat dey say dey goin do. Dis da promise: “You guys, no goin let yoa daughtas marry da guys from da odda peopos. You no goin marry da wahines from da odda peopos, an you no goin let yoa boys marry dem.

²⁶Even King Solomon wen do bad kine tings, cuz a da wahines from da odda peopos he wen marry! Him, he was mo awesome den all da odda king guys. His God get choke plenny love an aloha fo Solomon, an God make him da king ova all da Israel peopo. But still yet, was da wahines from da odda peopos dat wen make Solomon do bad kine tings.

²⁷So, wat you tink? You tink az good fo us hear now, dat oua God no can trus you guys, cuz you marry da wahines from da odda peopos?!”

²⁸Jehoiada da pries guy, his fadda Eliashib da main pries guy, he had one boy dat marry da daughta a Sanballat da Horon guy. I wen throw out da boy an no let um come wea I stay.

²⁹Eh my God, no foget dat kine bad peopo. Dey make da pries guys come pilau, So dey no can work fo you, Cuz dey wen broke da deal you wen make Fo da pries guys an da Levi ohana guys.

³⁰Dass how I wen get rid a all da stuff dat come from da odda peopos. I set up da jobs fo da pries guys an da Levi ohana guys, so dat ery one a dem know wat dey suppose to do.

³¹I make shua dat da peopo bring da pries guys wood, fo burn da sacrifices, wen dey suppose to make sacrifice. I make shua dey get da bestes stuff dat da peopo cut from wat dey wen plant. Eh my God! No foget me! Do good tings fo me.