Read Hawaii Pidgin Nehemiah 3 Bible Online

Nehemiah 3 - Hawaii Pidgin bible

Nehemiah 3

¹Da main pries guy Eliashib an da odda prieses wen start da job. Dey build da Gate Fo Da Sheeps an put up da big doors dea. Den dey make sacrifice fo make dat place spesho fo God, from da gate to da Towa Fo Da Hundred Army Guys an da Hananel Towa.

²Nex to dem, da guys from Jericho town build one part a da wall. Nex to dem, Zakkur Imri boy build anodda part.

³Hassenaah's boy an his ohana build da Fish Gate. Firs dey put da beams ova da top, den da big doors, da beams fo lock da doors, an da strong bars so nobody can broke da doors.

⁴Meremot, dass Uriah boy an Hakkoz grankid, an his ohana fix da nex wall. Meshullam, dass Berekiah boy an Meshezabel grankid, an his ohana fix da nex wall. Zadok, Baana boy, an his ohana fix da nex wall.

⁵Nex to dem da guys from Tekoa town fix da nex wall. But dea main ali`i guys, dey no like do dat kine hard work, no matta dey get one boss ova dem.

⁶Joiada Paseah's boy an Meshullam Besodeiah's boy, dey fix da Ol Gate. Dey put new beams on da top, den dey put da big doors, da big kine bolt fo lock da door, an da strong bars so nobody can broke down da door.

⁷Nex to dem, Melatiah from Gibeon town an Jadon from Meronot town Mizpah side wen fix da wall, no matta dey from da Wes Eufrates Districk an get diffren govna ova dea.

⁸Uzziel Harhaiah boy, one a da guys dat make gold kine jewelry, fix da odda side da wall nex to dem. Nex to him Hananiah, one a da guys dat make perfume, fix da wall nex to dem. Dass how dey make da Jerusalem wall come good again all da way to da Wide Wall.

⁹Refaiah Hur's boy, dat stay in charge a half da Jerusalem Districk, he fix da nex wall.

¹⁰Nex to dem Jedaiah Harumaf's boy fix part a da wall da odda side from his house, an Hattush Hashabneiah's boy fix da odda part a da wall nex to him.

¹¹Malkijah Harim's boy an Hasshub Pahat-Moab's boy fix anodda part, an dey fix da Towa Wea Get Ovens too.

¹²Shallum Hallohesh boy, dat stay in charge da odda half da Jerusalem Districk, fix da nex wall, an his girls help him.

¹³Da Valley Gate, Hanun an da peopo dat live Zanoah, dey fix um. Dey build dat gate one mo time, den dey put up da big doors, da big kine bolt fo lock da door, an da strong bars so nobody can broke down da door. Dey fix da wall 500 yards from da Towa Dat Get Ovens, all da way to da Opala Gate.

¹⁴Da Opala Gate, Rekab's boy Malkijah, da one in charge a da Bet-Hakkerem Districk, dat fix um. Him an his guys fix um one mo time an put up da big doors, da big kine bolt fo lock da doors, an strong bars so nobody can broke down da door.

¹⁵Da Fountain Gate, Shallun Kol-Hozeh's boy, dat stay in charge a da Mizpah Districk, wen fix um. Him an his guys fix um one mo time an put roof on top. Den dey put up da big doors, da big kine bolt fo lock da doors, an da strong bars so nobody can broke down da door. Dey build da part a da wall dat go by da Siloam Watta Place wea da watta tunnel come out, to da King's Park, an from dea to da stone steps dat go down from King David's Town.

¹⁶Afta dem da odda Nehemiah Azbuk's boy, he stay in charge a half da Bet-Zur Districk, fix da wall. He start from across King David's Ohana tombs, an go to da watta place dey wen dig befo time, an to da house fo da army guys.

¹⁷Nex to him, da Levi ohana guys fix da wall, unda Rehum Bani's boy. Nex to dem, Hashabiah, da guy dat stay in charge a half da Keilah Districk, him an his guys do da work fo his districk.

¹⁸Nex to him, some odda guys from da same ohana: Binnui Henada's boy, dat stay in charge a da odda half Keilah Districk,

¹⁹an nex to him Ezer Jeshua's boy, da main guy fo Mizpah, fix anodda part across wea you go up to da place wea dey keep da tings dey use fo da army, ova dea wea da wall stay stick out.

²⁰Afta him Baruk Zabbai's boy really like help too, so he fix anodda part a da wall, all da way from wea da wall stick out, to da door fo Eliashib's house (Eliashib, he da main pries guy).

²¹Nex to him, Meremot Uriah's boy an Hakkoz grankid fix anodda part a da wall, from da front door fo Eliashib house to da odda side a da house.

²²From dea, da pries guys dat live inside da odda small towns near Jerusalem fix da wall.

²³Afta dem, Benjamin an Hashub fix da wall in front dea house. Afta dem, Azariah Maaseiah's boy an Ananiah grankid fix da wall nea his house.

²⁴Afta him, Binnui Henadad's boy fix anodda part a da wall, from Azariah house to da nex place da wall stick out, an from dea to da corner,

²⁵an Palal Uzai's boy fix da odda side wea da wall stick out an wea da towa stay on top da house wea da King wen live befo time, da mauka side house nea to da yard dat da prison guard guys use. Nex to him, Pedaiah Parosh's boy

²⁶an da guys dat live on top Ofel Hill an work inside da Temple wen fix da wall ova on da eas side, across da Watta Gate an da towa dat stick out from da wall.

²⁷Afta dem, da Tekoa town guys fix anodda part a da wall from across da big towa dat stick outa da wall, to da Ofel Hill wall.

²⁸From mauka da Horse Gate, some a da pries guys fix da wall. Ery one a dem fix da wall in front dea own house.

²⁹Nex to dem, Zadok Immer's boy fix da wall da odda side his place. Nex to him, Shemaiah Shekaniah's boy, dat stay in charge a da Eas Gate, fix da wall.

³⁰Nex to him, Hananiah Shelemiah's boy and Hanun Zalaf's numba six boy fix anodda part. Afta dem, Meshullam Berekiah's boy fix da wall nea da room wea he stay.

³¹Nex to him, Malkijah, one a da guys dat make gold jewelry, fix da wall all da way to wea da worka guys fo da Temple an da guys dat own da stores live, across da Gate Wea Da Army Guys Make Ready Fo Fight, an from dea to da place wea get one room on top da wall nea da corner.

³²An from dea to da Sheep Gate, da guys dat make da gold jewelry an da guys dat own da stores fix da wall.