Read Hawaii Pidgin Nehemiah 4 Bible Online

Nehemiah 4 - Hawaii Pidgin bible

Nehemiah 4

¹Wen Sanballat find out dat us guys stay building da wall one mo time, he get real mad, an he make fun a us Jews.

²In front his friends an in front da Samaria army guys, Sanballat tell, “Wat dese Jewish guys stay doing?! Dey tink dey can build dat wall one mo time?! Dey tink dey can make sacrifice ova dea?! Dey tink dey can finish da work in one day?! Dey tink dey can find da big stones inside da dirt piles an make um so dey come good again?! cuz dey stay all burn up. No way dey can!”

³Tobiah, da Ammon guy, he stan dea nex to Sanballat. He tell: “Dass right! Wat dey stay build, if one wild dog climb on top um, da whole stone wall goin fall down!”

⁴I pray: “God, you da God fo us guys pray to, so lissen to us! Dey no like us guys. Da shame dey like us guys feel, Make um so dey da ones dat shame! Make odda peopo take ova dem An make um prisonas dat gotta go live anodda land!

⁵No hide da bad tings dey do. No take away dea shame, No foget da bad kine tings dey do. Cuz dey make da builda guys come real sore inside dea heart.”

⁶Now, us guys wen build da wall till da whole wall stay join togedda awready an no mo puka, an ony half way mo high fo build. Dat happen cuz da peopo work wit all dea heart.

⁷But den, Sanballat an Tobiah an da Arab guys an da Ammon guys an da Ashdod guys, dey wen hear dat da work fo fix da Jerusalem town wall going good, an dat da peopo start fo fill up da places wea da wall stay bus up. Sanballat dem come real huhu bout dat.

⁸Dey all make plan fo come fight da Jerusalem town an make da peopo dea come all mix up.

⁹But us guys pray to oua God, an put security guards day time an nite time all ova da place fo watch out fo dem guys.

¹⁰But da Judah ohana guys tell, “Da guys dat bring da stuff fo fix da wall, dey tired awready. Get so plenny junks from da bus up wall, us guys no can build da new wall.”

¹¹An da guys dat stay agains us tell, “Wen us guys go afta da Jewish guys, dey no goin know we dea, an dey no goin see us till we stay right dea wit dem. Den we kill um an make da work stop.”

¹²Den da Jewish peopo dat live nea da guys dat stay agains us, dey come Jerusalem plenny times an tell us, “From ery place da Sanballat guys live, dey goin come back hea an fight us guys!”

¹³Az why I put peopo, one ohana fo ery place, behind da low places wea da wall no stay fix yet, wit swords an spears an bows an arrows.

¹⁴Afta I wen check how dey all stay, den I stand up in front da ali`i guys, da main leada guys, an all da odda guys. I tell um, “No scared dose Sanballat peopo! Tink plenny bout da Boss. He awesome, an good you scared a him. So den, fight fo help yoa brudda guys, an yoa boys an girls, yoa wifes, an yoa houses!”

¹⁵Da guys dat stay agains us find out dat us guys know wat dey was goin do, an dat God jam up dea plan awready. So us guys go back fo work on da wall, an ery guy stay work on da wall jalike befo.

¹⁶From dat time, half my young guys do da construction work, an da odda half make ready da spears, an da shields, da bows an arrows, an da chain kine body armor. Da leada guys wen stay right dea behind da Judah peopo.

¹⁷Da guys building da wall, an da guys bringing dem stuff, dey do dea work so ery guy get one hand fo do da work, an in da odda hand he get someting fo fight wit.

¹⁸Ery builda guy get one sword he tie aroun him. Da guy dat blow da sheep horn trumpet, he stay by me.

¹⁹I tell da ali`i guys, da main leada guys, an all da odda guys, “Get peopo stay working all ova da place, you know. An all us guys stay far from da nex guy on top da wall.

²⁰Any place you hear da trumpet noise, dass da place you gotta go fo meet us. Oua God, he goin fight fo help us!”

²¹Az how us guys do da work. Half da guys stay ready wit da spears, from befo da sun come up till you can see da stars.

²²I tell da peopo dat time too, “Ery guy, him an da ones dat work fo him, dey gotta stay nite time inside Jerusalem, so nite time dey can help guard, an day time dey work.”

²³All dat time, me an my worka guys an da security guard guys dat stay by me, we neva take off oua clotheses. Ery guy get someting fo fight wit, even wen he go fo drink watta.