Read Hawaii Pidgin Esther 1 Bible Online

Esther 1 - Hawaii Pidgin bible

Esther 1

¹Dis wat wen happen wen Xerxes was king fo da 127 districks dat get dea own local govmen, from India to Sudan.

²Dat time, King Xerxes stay sit on top his throne inside Susa town, wea get strong wall.

³In da numba three year wen he stay king, he make one big party fo all da ali`i an his govmen guys. Da army leada guys fo Persia an Media, da princes, an da ali`i fo da districks dat get dea own local govmen, dey all stay dea.

⁴Fo six month he show um all da big awesome rich stuff he own cuz he da king fo all dat.

⁵Afta da six month pau, he make one big party an last fo seven days, inside da yard aroun da garden inside his palace, fo all da peopo dat stay inside Susa town wit da strong walls, from da mos importan peopo to da regula peopo.

⁶Da garden dey wen hang blue an white linen cloth, an get white an purple linen rope fo tie um to silva rings on top marble stone poses. Had gold an silva couches on top one floor wit color pichas dey make from dark red stone, white marble, da inside a da pearl oysta shell, an spesho kine brick wit all kine color.

⁷Dey give da peopo wine in fancy kine gold cup dat cost plenny, ery one differen. Had plenny wine, cuz da king get plenny fo give dem.

⁸Da king tell da guys dat stay in charge da wine, fo give erybody wateva dey like, an no stop um fo drink um dea own way how dey like.

⁹Same time Queen Vashti make one big party, fo all da wahines dat stay inside King Xerxes palace too.

¹⁰On da numba seven day, King Xerxes stay tipsy from da wine. He tell da seven palace guys dat work fo him, Mehuman, Bizta, Harbona, Bigta, Abagta, Zetar, an Carcas,

¹¹fo bring Queen Vashti in front him, wit her queen kine crown on top her head, so Xerxes can show all da peopo an ali`i guys dat stay dea how pretty she stay.

¹²But wen da helpa guys go tell her wat da king say, she no like go. Den da king come huhu an real mad agains her.

¹³Da king go talk to da guys dat undastan eryting bout wass happening, cuz he do dat erytime he like know bout da rules wat da judge guys gotta do.

¹⁴Had seven ali`i guys from Persia an Media dat stay good friends wit da king: Carshena, Shetar, Admata, Tarshish, Meres, Marsena, an Memucan. Dey da ony ones can go talk to da king weneva dey like, an dey stay da main leadas fo da country.

¹⁵King Xerxes aks dem, “Wat da rules say I gotta do bout Queen Vashti? I da king, an my palace guys wen tell her wat I say awready, but she no like do wat I wen tell her fo do.”

¹⁶Den Memucan stand in front da king an da ali`i. He tell, “No was jus agains you, da king, dat Queen Vashti wen go do dis kine ting. She do um agains da ali`i guys too, an agains da peopo inside all da districks wea you, King Xerxes, stay da king.

¹⁷You know, all da wahines goin hear wat da queen wen do, an dey goin tink dey can make to dea husbans jalike dey no need lissen to dem. Dey goin tell, ‘King Xerxes wen tell his guys fo bring Queen Vashti in front him, but she neva go.’

¹⁸Az why today, da ali`i wahines from Persia an Media who stay hear awready wat da queen wen do, dey goin talk to all da ali`i guys lidat too. Dey no goin show respeck, an dey goin make argue.

¹⁹“So, if you like, you go send out dis rule, an tell yoa peopo fo write um inside da rules fo Persia an Media. Den no mo nobody can change da rule: Vashti no goin eva come again wea King Xerxes stay. Den you goin make anodda wahine da queen, somebody mo betta den Vashti dat goin lissen wat her husban tell.

²⁰Den, wen erybody all ova dis big wide land hear dis importan rule da king tell, all da wahines goin show respeck fo dea husbands, from da mos important one to da one dat not importan.”

²¹Da king an his ali`i guys wen like wat Memucan tell, so da king do wat Memucan say.

²²He send messenja guys all ova da land wit lettas fo da main guys inside ery districk, fo ery peopo in dea own language an alphabets, telling dem dat ery man gotta be da main leada guy inside his own house.