Read Hawaii Pidgin Esther 2 Bible Online

Esther 2 - Hawaii Pidgin bible

Esther 2

¹Lata, afta King Xerxes no stay huhu no moa, he rememba Vashti an wat she wen do, an wat he tell erybody dey gotta do bout her.

²Den da guys dat work fo da king fo take care him, dey tell him, “Az good if some guys go look fo some young an good looking wahines fo da king, dat no sleep wit one guy still yet.

³You can pick guys from ery districk inside da land fo help find all dose good looking young wahines an bring um inside da place wea da king's wifes stay, inside da strong walls Susa side. Hegai, da guy dat no can get kids an da king stay put him fo take care da odda wahines, he can take charge dem too. Den da spesho peopo dat know how fo make dem mo pretty still yet, can do dat.

⁴Den da one dat da king like da mostes can come queen, cuz Vashti not da queen no moa.” Da king like wat his guys tell him, so he do dat.

⁵Now inside da Susa strong walls, had one Jewish guy from da Benjamin ohana, dat get da name Mordecai. He Jair's boy, Shimei's grankid, an Kish great grankid.

⁶Befo time, Nebukadnezzar, da king fo Babylon, wen take Kish prisona from Jerusalem, wit King Coniah da king fo Judah, an odda peopo.

⁷Mordecai wen come da hanai fadda fo his uncle girl Hadassah, cuz her no mo fadda an mudda. Her Persia name Esther, dat mean “Star.” She real good looking, wit one awesome figure. From da time her fadda an mudda mahke, Mordecai take her jalike his own girl.

⁸Afta erybody hear wat da king tell, an da rule he wen make bout Vashti, plenny young wahines come togedda inside da strong walls Susa town, an dey stay wit Hegai in charge a dem. Da palace peopo take Esther to da King's palace an make Hegai stay in charge a her too.

⁹Hegai like Esther plenny, an he do plenny nice tings fo her. He tell da helpa wahines fo make her come mo pretty still yet, an make spesho food dass ony fo her. He pick seven young wahines from King Xerxes palace fo take care her. He move Esther an her wahines to da bestes place inside wea all da wahines stay.

¹⁰Now Esther no tell nobody bout her ohana, o dat she Jewish, cuz Mordecai wen tell her fo no tell dem.

¹¹Ery day Mordecai walk outside da yard nea wea da wahines stay, fo find out how Esther an wat stay happen to her.

¹²Befo one wahine's turn come fo go inside sleep wit King Xerxes, dey gotta pau twelve month wit da palace wahines dat make da young wahines come mo good looking. Dass six month wit myrrh oil, an six month wit odda perfume an fo put make up on dea face.

¹³Dis az how dey go inside by da king. Dey can take wateva dey like from da wahine place to da king's palace.

¹⁴Wen dark time almos come, dey go ova dea, an in da morning come back to one diffren place wea da king's odda wifes stay. Shaashagaz, one nodda guy dat take care da wahines fo da king, stay in charge a da ones ova dea. Dey no go back fo sleep wit da king, ony if he like her, an call her back by her name.

¹⁶(15-16) Was January, da numba seven year wen Xerxes stay king. Az wen dey take Esther to King Xerxes palace. (She Mordecai uncle Abihail's girl, dat Mordecai wen hanai.) Wen she go, she neva aks fo notting, ony wat Hegai, da guy dat stay in charge da wahines, tell her. Now, wen erybody see Esther, dey like her plenny.

¹⁷Da king wen like Esther mo den all da odda wahines. He tink her da bestes an he like do nice tings fo her. So he put da queen's crown on top her head an make her da queen, cuz Vashti not da queen no moa.

¹⁸Den da king make one big party fo Esther, an tell all da ali`i an da leadas fo come. He make one spesho day fo all da districks, an give erybody plenny gifs.

¹⁹Wen dey bring all da young girls again da nex time, Mordecai stay sitting by da king's gate.

²⁰But Esther still yet neva tell nobody bout her ohana, o dat she Jewish, jalike Mordecai wen tell her. Cuz she still yet do eryting he tell her, jalike he wen teach her fo do, small kid time.

²¹Wen Mordecai stay sitting by da king's gate, Bigtana and Teresh, two a da king's palace guys dat stay watch da gate, wen come huhu, an make plan fo kill King Xerxes.

²²But Mordecai find out bout dat, an tell Queen Esther. Den Esther tell da king bout um, an dat Mordecai da guy wen find um out.

²³Wen da police guys check out wat she tell, an find out az wass true, dey hang da two palace guys. An dey write all dat inside da record book fo da king.