Read Hawaii Pidgin Esther 6 Bible Online

Esther 6 - Hawaii Pidgin bible

Esther 6

¹Dat nite da king no can sleep, so he aks his guys fo bring da record book, da one wea dey write down eryting dat happen from da time he wen come one king. He like fo somebody read um fo him.

²Inside dea, dey read, dat befo time, Mordecai find out dat two a King Xerxes guys dat guard da doors, Bigtana an Teresh, make plan fo kill da king, an Mordecai tell da king's helpa guys, an dey write um inside da book.

³Afta da king hear dis, he aks, “How we wen show respeck to Mordecai fo do dis?” Da king's helpa guys tell him, “We neva do notting fo him.”

⁴Da king tell, “Who stay outside, inside da palace yard right now?” Now Haman jus wen come inside da palace yard fo go aks da king fo tell his guys fo hang Mordecai on top da pos Haman wen set up, fo hang um.

⁵Da king's helpa guys tell him, “Haman stay standing outside dea.” Da king tell dem, “Bring him inside.”

⁶Wen Haman come inside, da king aks him, “Wat I goin do fo one guy, wen I really like show respeck fo him?” Now Haman stay tinking, “Fo shua, az me he talking bout, cuz no mo nobody da king get mo respeck fo den me!”

⁷So he tell da king, “Da guy da king really like show respect fo,

⁸tell yoa guys fo bring one king kine robe fo him, an one horse da king wen awready ride, dat get one king's mark on top da horse head.

⁹Den give da robe an da horse to one a da king's bestes ali`i fo put da robe on top da guy you really like show respect fo, an fo lead da guy on top da horse thru da streets inside da big town, an call out in front him, “Dis da kine ting dat da king like do fo da guy he really like show respeck fo!”

¹⁰Den da king tell Haman, “Go right now. Get da robe an da horse, an do jalike you wen say fo Mordecai da Jew, dat stay sit by da king's gate. Make shua you do eryting jalike you wen tell!”

¹¹So Haman go get da robe an da horse. He put da robe on top Mordecai, an lead him thru da streets on top da horse, an call out in front him, “Dis da kine ting da king like do fo da guy he really like show respeck fo!”

¹²Afta dat Mordecai go back by da king's gate. But Haman run home quick. He put one cloth ova his head fo cover um, cuz he stay sore inside.

¹³He tell his wife Zeresh an his friends eryting dat wen happen to him. Da guys dat tell him wat fo do, an his wife Zeresh tell him, “You know, cuz Mordecai one Jew, az why you lose out awready! You no can stand agains him. Fo shua, no way you can win!”

¹⁴An wen dey still yet talk wit him, da guys dat work fo da king, da kine no can make kids, dey come fo take Haman away quick time to da big dinna Esther wen make.