Read Hawaii Pidgin Exodus 1 Bible Online

Exodus 1 - Hawaii Pidgin bible

Exodus 1

¹Dis, da names fo da Israel boys dat wen go Egypt side wit dea fadda Jacob an dea ohanas:

²Reuben, Simeon, Levi, an Judah;

³Issachar, Zebulun, an Benjamin;

⁴Dan an Naftali, Gad an Asher.

⁵Joseph, he awready stay Egypt side, da time all da ohanas wen go dea. Had seventy peopo from Jacob ohana dat wen go Egypt wit him.

⁶Lata, Joseph wen mahke, an all his brudda guys too, all da peopo from dat time.

⁷But da Israel ohana peopo (az Jacob dem), dey wen get plenny kids an grandkids. Dey wen come choke plenny peopo, an dey fill up da land.

⁸Long time afta, had one new king dat take ova da Egypt peopo. Dat king, he neva know notting bout Joseph an wat he do.

⁹Da king tell his peopo, “You know wat?! Dat Israel ohana peopo, dey coming so plenny, dey awready mo strong den us guys.

¹⁰So! Us guys gotta be smart fo figga how fo make shua dey no come mo plenny. Cuz bumbye if get war, no good if dey go help da guys dat fight agains us, an afta dat, dey go outa our land.”

¹¹So da Egypt peopo wen make da Israel peopo dea slave guys. Dey wen give um mean kine luna guys. Dey give um real plenny work, an make dem feel jalike dey notting. Was da Israel peopo dat wen build two towns wit plenny warehouse inside fo da Pharaoh guy (dass how dey call da king guy fo Egypt, you know). Da towns, dey give um da name Pitom an Ramses.

¹²But no matta da Egypt peopo still give da Israel peopo real hard time erytime, da Israel peopo stay come mo plenny still yet. Erytime da Egypt guys see one Israel guy, bodda dem plenny an scare dem.

¹³Dass why da Egypt peopo wen bus up da Israel peopo fo make um do slave kine work, an dey wen make da Israel peopo come sore inside, cuz dey make um work so hard.

¹⁴Da Egypt peopo no give da Israel peopo chance notting. Dey make um make plenny mud fo make brick, an dey make um work long day inside da fields. Cuz if dey no do dat, da Egypt peopo bus um up.

¹⁵Had two Israel wahines, dea name Shifrah and Pu`ah. Dey help da odda Israel wahines wen dey born dea kids. Da king fo Egypt tell um,

¹⁶“Erytime wen you stay help da Israel wahines born one bebe, an you see um ova dea on top da spesho stone fo born bebe, if get boy kine, kill um! If get girl kine, let um live.”

¹⁷But da helpa wahines, dey mo scared fo go agains God. Az why dey neva do wat da king guy tell um. Dey let da boy kine bebes live too.

¹⁸Lata, da king guy wen tell da helpa wahines fo come by him. He tell um, “Wassa matta wit you? How come you guys doing dis ting, hah? Why you stay let da boys live!”

¹⁹Da helpa wahines, dey tell da Pharaoh guy, “Eh, you know, da Israel wahines, dey not slow like da Egypt wahines. Befo us guys can get dea fo help dem, da bebe born awready!”

²⁰God, he wen do good tings fo da helpa wahines cuz a wat dey wen do. Cuz dey neva kill da boys, da Israel peopo wen come mo plenny, an dey come plenny strong.

²¹An cuz da helpa wahines mo scared a God den dey scared a da king, God give dem kids fo dea own ohana too.

²²Den, da Pharaoh guy tell all his peopo, “All da small boy kine bebes from da Israel peopo, throw um inside da Nile Riva! But da girl kine, let um live.”