Read Hawaii Pidgin Exodus 14 Bible Online

Exodus 14 - Hawaii Pidgin bible

Exodus 14

¹Yahweh tell Moses:

²“Tell da Israel peopo fo go back an go da odda way. Dey gotta make camp in front Pi-Hahirot, wit one Egypt town wit strong walls one side an da Red Sea da odda side, across Ba`al-Zefon. Dey goin make camp up side da Red Sea, da odda side Ba`al-Zefon.

³Da Pharaoh guy, he goin tink: ‘Eh! Da Israel peopo, dey stay inside da boonies, an dey donno wea dey going! Ery side, ony get boonies!’

⁴I goin make da Pharaoh guy come hard head, so he goin like go afta you guys. Wen he do dat, I goin use da Pharaoh guy an all his army guys, fo show erybody how awesome I stay. Da Egypt peopo goin find out dat I Yahweh fo real kine!” So da Israel peopo do wat God tell um fo do.

⁵Da Egypt army guys tell da king fo da Egypt peopo dat da Israel peopo wen go way awready from Egypt. Den da Pharaoh guy an all da palace peopo change dea mind bout da Israel peopo. Dey tell, “Wat we wen do? We wen let go da Israel peopo, an now, dey no stay work fo us guys no moa!”

⁶Da Pharaoh guy tell his guys fo get his war wagons ready, an he take his own army guys wit him.

⁷He take 600 war wagon, an da spesho one fo go wit him. He take all da war wagons dat get inside Egypt. Ery war wagon get one army officer guy inside.

⁸Yahweh make da Pharaoh guy come hard head. Dass why him an da oddas wen go afta da Israel peopo. But da Israel peopo, dey stay go outa Egypt, jalike dey no scared notting.

⁹But da Egypt army guys go afta dem, wit all da war wagons an da horses from da Pharaoh guy, an horse rida guys an infantry guys. Dey catch up da Israel peopo ova dea wea dey wen make camp, by da watta nea Pi-Hahirot, across Ba`al-Zefon.

¹⁰Da Pharaoh guy, he coming nea now. Da Israel peopo, dey look an see da Egypt peopo coming afta dem! Da Israel peopo come real scared! Dey yell fo help to Yahweh.

¹¹Dey tell Moses, “Why?! Neva have nuff graveyard Egypt side, fo bury us guys back dea, o wat?! So den, how come you bring us guys hea inside da boonies? Ony fo us mahke, o wat?! Wat you tink you doing to us now, wen you take us guys outa Egypt?!

¹²Us guys wen tell you Egypt side, ‘Leave us alone! We goin stay work fo da Egypt peopo. Cuz mo betta fo us guys work fo dem, den go mahke ova hea inside da boonies!’-”

¹³Moses tell da peopo, “No scared! Stand right dea, an watch. You guys goin see Yahweh get you guys outa trouble, an he goin do dat today. You see dose Egypt guys ova dea? From today, you no goin see dem no moa, eva!

¹⁴Yahweh, he da one goin fight fo help you guys. You guys, jus shut up an watch now!”

¹⁵Den Yahweh tell Moses, “Eh! How come you yelling to me fo help you? Tell da Israel peopo make ready fo go.

¹⁶You take yoa walking stick, an hold um out ova da sea, fo make da watta go one side an da odda side. Den da Israel peopo goin go thru da middo a da Red Sea, an da groun in da middo goin be dry.

¹⁷You know wat I doing? I making da Egypt army guys get real hard head, so dey goin chase afta you guys. Den, I goin use da Pharaoh guy an all his army guys an his war wagons an his horse rida guys, fo make erybody know how awesome I stay!

¹⁸Wen I make lidat to da Pharaoh guy an his war wagons an his horse rida guys, an I show erybody how awesome I stay, den da Egypt peopo goin know fo shua, dat I Yahweh fo real kine!”

¹⁹Da angel messenja guy from God, da one befo time wen go in front a da Israel army guys, he wen go move da odda side, fo stay behin dem. Da cloud dat go from da groun to da sky, move from in front dem, an go behin dem.

²⁰So da cloud go inside da middo a da Egypt guys an da Israel guys, wit da Egypt army guys camp one side, an da Israel army guys camp da odda side. Da cloud come dark, no mo da light dat nite, so da guys dat stay one side no can go nea da guys dat stay da odda side.

²¹Den Moses hold his hand out ova da sea. Yahweh make da wind blow strong on top da watta from da east side all dat nite. Da wind, push da sea watta one side an da odda side an make da sea bottom dry land!

²²An da Israel peopo wen go thru da middo inside da Red Sea, but da groun wea dey walking was dry awready. Da watta, stay fo dem jalike one wall on da right side an one nodda wall on da left side.

²³Da Egypt army guys, dey go chase afta da Israel peopo. All da horses from da Pharaoh guy, an da war wagons, an da horse rida guys, dey all go follow dem, wea had watta befo time.

²⁴Early morning time, befo get light, Yahweh look down outa da fire an da cloud dat go up inside da sky. He check out da Egypt army guys camp. He make all da Egypt army guys so dey donno wat dey doing o wea dey going.

²⁵God make da wheels fo dea war wagons go come off, so dey no can move how dey like. Da Egypt guys, dey tinking, “Mo betta us guys get away from dose Israel guys, cuz dass dea god Yahweh stay fighting fo dem, an agains us Egypt guys!”

²⁶Den, Yahweh tell Moses, “Hold out yoa hand ova da Red Sea, so da watta can go back an go ova da Egypt guys an dea war wagons an dea horse rida guys.”

²⁷So wen stay coming light, morning time, Moses hold out his hand ova da sea. Da Red Sea watta go back jalike was befo time. Da Egypt guys, dey see wass happening, an dey try fo run da odda way. But Yahweh throw um all inside da watta.

²⁸Da watta come back an cova ova da war wagons, an da horse rida guys, an all da Pharaoh army guys dat wen go chase da Israel peopo inside da Red Sea. Not even one a dem wen get outa dea.

²⁹But da Israel peopo, dey wen walk thru da Red Sea from one side to da odda side, an da groun was dry, an da watta wen stay jalike two wall fo dem, right side an left side.

³⁰Dat day, Yahweh wen get da Israel peopo outa trouble from da Egypt army guys. Da Israel peopo wen see da mahke Egypt guys bodies on top da beach.

³¹Wen da Israel peopo see how Yahweh wen use his awesome kine powa fo wipe out da Egypt guys, da peopo come scared an get plenny respeck fo Yahweh. Cuz a dat, dey stay trus Yahweh an his worka guy Moses.