Read Hawaii Pidgin Exodus 15 Bible Online

Exodus 15 - Hawaii Pidgin bible

Exodus 15

¹Den Moses an all da Israel peopo sing fo Yahweh lidis: “I like make song fo Yahweh, Cuz he awesome, da way he make himself big! He wen throw da horses an da guys dat ride um inside da sea.

²Yahweh, he da One dat make me strong an solid, He wen come da One dat get me outa trouble. He da God fo me, an I like tell, he da greates! He was da God fo my fadda guy too, an I going tell, he da bestes!

³Yahweh, he da one dat know how fo fight! Yahweh, dass who him!

⁴“Da Pharaoh guy wen send army guys an wagons fo war. But God, he throw um inside da sea! Even da bestes officer guys dat Pharaoh get, Dey go down awready inside da Red Sea.

⁵Da deep watta wen cova dem. Dey go down deep inside da watta jalike one stone!

⁶“Eh, Yahweh! Awesome, how strong yoa powa! Wit yoa strong right hand you wen bus up Da guys dat stay agains us!

⁷You so big, you wipe out erybody dat go agains you. Wen you come huhu, you burn um up Jalike peopo burn up da junks dat stay Afta dey cut da wheat.

⁸You blow, an da watta pile up. Da flood watta stand up strait, Jalike get one wall fo da waves. Inside da deep sea, Jalike da watta wen come solid.

⁹“Da guys dat stay agains us, dey tell, ‘I goin chase um! I goin catch um up! I goin give my friends dea share A da stuff I goin take away from dem guys! I goin do eryting I like do to dem! I goin pull out my sword an kill um! Wit my own hands I goin make um run away from hea!’

¹⁰But you, God, you wen make yoa wind blow, An da sea cova dem up. Dey wen sink down jalike lead inside da big watta.

¹¹“Eh! Yahweh! From all da gods dat get, No mo nobody jalike you! No mo nobody stay awesome jalike you, Da way you stay good an spesho Wen you do stuff az real awesome An scary fo us!

¹²You wen hold out yoa right hand, An jalike da eart wen swallow dose guys, An dey gone awready!

¹³“You stay wit yoa peopo, An show us wea fo go! You wen pay da price fo get us outa trouble! You strong, dass why you goin help us go Da good an spesho place wea you stay.

¹⁴“Da odda peopos, dey goin hear dis, Dey come scared an shaking! Da peopo dat live inside da Filisha land, Dey come jalike dey hurt plenny!

¹⁵Dat time, da main guys from Edom, Dey lose fight, no can do notting. Da leada guys from Moab, Dey only stand dea an shake! Da peopo dat live Canaan side, Dey all donno wat fo do awready.

¹⁶Dey so much scared an shaking, dey donno wat fo do. Cuz a you, you strong. Dass why dey no move notting. Dey jus stand dea like stone an no talk notting, Till yoa peopo go all da way da odda side, Yahweh, Till da peopo go da odda side, Dey da ones you wen pay fo let um go!

¹⁷“Eh Yahweh! You goin take yoa own peopo To da place you wen make ready fo you live dea. Jalike you stay plant um fo grow On top yoa own mountain, Da place you wen make fo you stay, Da place dass spesho fo you, Boss, Dat you wen make ready wit yoa own hands!

¹⁸Yahweh, he da King foeva an eva!”

¹⁹Afta da horses from Pharaoh, wit da war wagons an da horse riders, go inside da sea, Yahweh make da sea watta go back ova dem. But da Israel guys, dey wen walk thru da middo a da Red Sea on top da dry groun.

²⁰Den Miriam, dass Moses an Aaron sista, she one talka fo God too. She pick up one tambourine. She start fo dance, an all da odda wahines, dey go pick up tambourine too an dance in circle wit her.

²¹Miriam, she give um dis song fo sing back to her: “I sing fo Yahweh! He awesome, fo real kine! Da horses an da guys dat ride um, God throw um all inside da sea!”

²²Afta dat, Moses tell da Israel peopo fo go. Dey go way from da Red Sea an go inside da boonies Shur side. Three day, dey walk. But dey no find watta dea.

²³Dey wen get to Marah. Dey find watta, but dey no can drink da watta Marah side, cuz bitta. (Dass how come da place get da name “Marah,” cuz dat mean “bitta,” dea language, you know.)

²⁴Da peopo, dey grumble agains Moses. Dey tell um, “So, wat we going drink now?!”

²⁵So, Moses yell fo help to Yahweh. Yahweh, he show Moses one kine wood. Moses take da wood an throw um inside da watta, an da watta come okay fo drink. Den God wen make one rule fo da peopo dat stay dea. Same time, God check out da peopo, fo know if dey goin stick wit him.

²⁶God tell dem, “You guys gotta lissen good to me, yoa God Yahweh fo real kine. You guys gotta stay do da right ting in front me, an lissen wat I tell you guys fo do, an keep all da Rules. If you guys do all dat, den I no going hit you guys wit all da kine sick dat I wen bring fo da Egypt peopo. Cuz I Yahweh, an I da one dat make you guys come good.”

²⁷Afta dat, dey go Elim. Ova dea, get twelve puka wea da watta come outa da groun, an get seventy date palm tree. Az wea da peopo make camp nea da watta.