Read Hawaii Pidgin Exodus 16 Bible Online

Exodus 16 - Hawaii Pidgin bible

Exodus 16

¹Lata, da mont numba two, day numba 15 afta dey go way from da Egypt land, all da Israel ohana peopo go way togedda from Elim. Dey go inside da boonies Sin side. Afta you go way from Elim, firs you come by Sin, den you come Sinai Mountain.

²Ova dea inside da boonies, all da Israel peopo make grumble agains Moses an Aaron.

³Dey tell Moses an Aaron, “Mo betta Yahweh wen kill us guys inside da Egypt land! Cuz ova dea, had meat fo us eat, an plenny bread! But you guys, you make us guys come ova hea inside da boonies! An now, us so hungry, we goin mahke cuz a dat!”

⁴Yahweh tell Moses, “You know wat I goin do? I goin make bread come down outa da sky jalike rain fo you guys. Ery day, da peopo goin go out an pick up food from da groun. Dey gotta ony pick up nuff fo dat day. Dass fo check out da peopo, fo find out if dey goin stay do how I teach um fo do, o not.

⁵But ery week, day numba six, dey gotta bring in two times mo den wat dey pick up da odda days, fo dat day an fo da Res Day too.”

⁶So Moses an Aaron tell all da Israel peopo, “Eh! Today, sun down time, you guys goin know fo shua dat Yahweh, not us, wen get you guys outa Egypt!

⁷An tomorrow, morning time, you guys goin see how awesome Yahweh stay. You goin see dat he lissen, no matta you guys grumbling agains him. Me an Aaron, you guys grumble agains us, but az no big deal. But you guys donno, you stay grumbling agains God, not us!”

⁸Moses say dis too: “Yahweh goin give you guys all da meat you can eat, sun down time, an all da bread you can eat, morning time. Dass cuz Yahweh hear you guys grumbling agains him. Dat no mean notting fo me an Aaron, cuz you guys no stay grumbling agains us guys, you stay grumbling agains Yahweh!”

⁹Moses tell Aaron fo tell all da Israel peopo dis: “Go ova dea by da place Yahweh stay, cuz he hear wat you guys say wen you grumble.”

¹⁰Aaron was telling dat to all da Israel peopo togedda, an wen dey turn aroun an look ova dea inside da boonies, you know wat? Wen dey look da cloud, dey see how awesome Yahweh stay!

¹¹Yahweh tell Moses:

¹²“I hear da Israel peopo stay grumbling. Tell um dis: ‘Wen da sun go down, you guys goin eat meat. Tomorrow, morning time, you guys goin get all da bread you can eat. Den you guys goin know dat me, Yahweh, I da God fo you guys.’-”

¹³Evening time, had quail birds, an dey come down all ova da camp. Da nex morning, had dew on top da groun all aroun da camp.

¹⁴Wen da dew dry up all ova da boonies, on top da groun had thin small kine flake, jalike da white frost dat get cold time.

¹⁵Wen da Israel peopo see um, an dey aksing each odda: “Eh! Wass dat?” Cuz dey neva know wat kine stuff dat, az why. Moses tell um, “Dass da kine bread dat Yahweh give you guys fo eat.

¹⁶Dis wat Yahweh say you guys gotta do: Ery guy, go pick up how plenny you need fo eat. Fo erybody dat stay inside yoa tent, go get two pound.”

¹⁷Da Israel peopo do wat Moses tell um. Had peopo dat pick up plenny, an odda peopo dat pick up ony litto bit.

¹⁸But wen dey check out how much, da peopo dat wen pick up plenny neva have mo plenny den dey need, an da peopo dat wen pick up litto bit, dey neva need mo plenny. Erybody pick up ony how much dey need fo eat.

¹⁹Moses tell um, “No keep notting till morning time. You gotta eat um all up today.”

²⁰But had some peopo dat neva lissen to Moses. Dey wen keep some a da stuff till da nex morning. But dat stuff get plenny worm inside an smell bad. Moses come huhu wit dem.

²¹Ery day, morning time, dey go pick up da stuff. Erybody pick up ony how much dey need fo eat. Afta da sun come hot, da stuff melt an no can see um no moa.

²²On da numba six day inside da week, dey pick up double da food dey goin need, cuz dey need bout four poun fo one guy. All da leada guys fo da peopo go tell Moses dat dea peopo wen do dat.

²³Moses tell um, “Dis wat Yahweh tell you guys fo do: Tomorrow, dass da Res Day, spesho fo ony Yahweh. So today, bake wateva you guys like bake, an boil wateva you guys like boil. Keep wateva get lef fo eat tomorrow morning.”

²⁴So dey keep um till da nex day, jalike Moses wen tell um. Neva come stink, an neva get worm inside.

²⁵Moses tell um, “Eat um today, cuz dis day, da Res Day, fo you guys tink ony bout Yahweh. Today, you guys no goin find notting fo eat on top da groun.

²⁶Six days you goin pick up da food. But da numba seven day, dass da Res Day. Dat day, you no goin find food notting.”

²⁷Still yet, da numba seven day, had some peopo dat go out fo pick up food. But dey no find notting.

²⁸Den Yahweh tell Moses, “How much time you guys no goin do wat I tell you fo do, an no lissen to my Rules?!

²⁹Make shua you guys know dis: I Yahweh, an I stay give you guys da Res Day fo res. Dass why, da numba six day, I give you guys food fo two days. So, da numba seven day, erybody gotta stay dea own place an no go outside.”

³⁰So, da peopo wen res, da numba seven day.

³¹Da Israel ohana peopo give da stuff da name “Manna,” cuz sound kinda like “Wass dat?” dea language. Look kinda like coriander seed, white kine, an taste kinda like cracka wit litto bit honey.

³²Moses tell, “Dis wat Yahweh tell you fo do. Keep some a da manna, two pound, fo all da peopo dat goin come from you guys bumbye, foeva. Dass so da peopo goin see da bread I wen give you guys fo eat inside da boonies, da time I wen bring you guys outa da Egypt land.”

³³Den Moses tell Aaron, “Take one jar. Put two pound manna inside. Put um in front Yahweh, fo keep um fo all da peopo dat goin come from dese guys bumbye, foeva.”

³⁴Aaron do wat Yahweh wen tell Moses. Aaron put da manna in front da Box Fo Rememba Da Deal God Wen Make, fo keep um.

³⁵Da Israel peopo wen eat da manna fo forty year, all da time till dey get to da land wea dey goin make house. Wen dey come jus outside da Canaan land, da manna pau.

³⁶(Need ten two-pound kine measure fo make one efah, you know.)