Read Hawaii Pidgin Exodus 19 Bible Online

Exodus 19 - Hawaii Pidgin bible

Exodus 19

¹Three month afta da Israel peopo go outa da Egypt land, da same day get new moon, dey come inside da boonies Sinai side.

²Afta dey go from Refidim to da boonies Sinai side, dey make camp ova dea inside da boonies, down side Mount Sinai.

³Wen dey get dea, Moses go up da mountain, da place wea God stay. Yahweh call Moses from on top da mountain. He tell um, “Moses! Dis wat you gotta tell da peopo dat come from da Jacob ohana (az da Israel peopo):

⁴You guys see awready wat I wen do to da Egypt peopo. You guys know dat was me da One dat take you guys outa Egypt, jalike I one eagle bird an I carry you guys away from dea on my wings, an I bring you guys ova hea by me.

⁵So den, if you guys lissen to wat I tell you guys fo do, an stick wit da deal I wen make fo you guys, den fo shua you goin be my peopo, an I goin figga, ‘Dose Israel peopo, dey da bestes ting I get, from all da peopos all ova da world!’ An you guys know dis awready: da whole world, dass mines.

⁶But you guys, you goin be da prieses fo me an I goin be yoa king. You guys goin be one nation dass spesho fo me!” Dass wat you goin tell da Israel peopo.

⁷Moses go back. He tell da older leadas fo da peopo fo come by him. He tell dem eryting dat Yahweh wen tell him dat dey gotta do.

⁸Da peopo, dey tell Moses all togedda, jalike one voice, “Eryting Yahweh say, we goin do um!” Moses go back by Yahweh an tell um wat da peopo wen say.

⁹Yahweh tell Moses, “I going by you inside one heavy cloud. I goin do dat, so da peopo goin hear me wen I talk to you. Cuz a dat, dey goin stay trus you foeva.” Afta Moses tell God wat da peopo wen promise fo do,

¹⁰Yahweh tell Moses, “Go by da peopo. Today an tomorrow, make shua dey make sacrifice fo make um come spesho fo me. Dey gotta wash dea clotheses, too.

¹¹Da numba three day, dey gotta be ready! Cuz dat day, me, Yahweh, I goin come down on da top a Mount Sinai, inside one heavy cloud in front all da peopo.

¹²You gotta show da peopo wea no can go, all aroun da mountain. Tell um, ‘Watch out! You no can go up da mountain! No even put yoa feet on top da mountain! Anybody touch da mountain, dey gotta mahke, cuz az ony fo God dat place!

¹³Anybody go dea, all da peopo going throw rocks fo kill um, o shoot um wit arrow, cuz dey no can touch da guy. No matta one animal o one guy, if dey touch da kapu mountain, dey no can live!’ Ony afta da peopo hear one long trumpet sound from da sheep horn, den dey can go up da mountain.”

¹⁴Afta Moses come back down da mountain by da peopo one mo time, he tell um fo make sacrifice fo make um come spesho fo God. Dey wash dea clotheses.

¹⁵Moses tell um, “Make yoaself ready fo da numba three day. You guys, no go sleep wit one wahine.”

¹⁶Morning time, da numba three day, get thunda an lightning, an one heavy cloud ova da mountain top. Had loud noise jalike from one sheep horn. All da peopo inside da camp, dey stay scared an shaking!

¹⁷Den Moses take da peopo outa da camp fo meet God. Dey go stand down side da mountain.

¹⁸All ova Mount Sinai, get plenny smoke, cuz Yahweh wen come down from inside dea, burning jalike fire. Da smoke go up jalike da smoke from one place wea dey melt da metal. Da whole mountain, stay shake plenny!

¹⁹Da horn noise dey hear, stay coming mo strong erytime. Erytime Moses say someting, God talk back to Moses, an sound jalike thunda.

²⁰Dass how Yahweh wen come down to da top part a Mount Sinai. Yahweh tell Moses fo come all da way up da mountain by him. An Moses go dea.

²¹Yahweh tell Moses, “Go down now. Tell da peopo fo watch out. No good dey go broke da kapu rule an come up hea fo look me, Yahweh. Cuz if dey do dat, plenny a dem goin mahke!

²²Same ting fo da pries guys. Bumbye wen dey come in front me, Yahweh, dey gotta make demself spesho fo me. Cuz if dey no stay right, I goin go agains dem an dey goin mahke too!”

²³Moses tell Yahweh, “Da peopo no can come up Mount Sinai. Cuz you wen tell us, ‘Watch out! Make kapu all aroun da mountain, fo keep um spesho fo me!’-”

²⁴Yahweh tell Moses, “Go now. Go back down. Den bring Aaron back up hea wit you. But no let da prieses o da peopo broke da kapu rule fo come up hea by me, Yahweh. Cuz if dey do dat, dey goin mahke fo shua!”

²⁵So Moses go back down by da peopo an tell um dat.