Read Hawaii Pidgin Exodus 25 Bible Online

Exodus 25 - Hawaii Pidgin bible

Exodus 25

¹Yahweh tell Moses dis:

²“Go tell da Israel peopo fo bring me someting dey like give an bring um to me. You guys take wat dey give.

³Dis da kine presents you guys goin let dem give you: gold, an silva, an bronze.

⁴Wool string, blue an purple an dark red. Egypt kine linen cloth. Hair from da goats fo make cloth.

⁵Red leather from sheeps dat gotta dye um. Skins from dolphins. Koa kine wood.

⁶Olive oil fo da lamps. Stuff dat smell nice fo mix wit da olive oil fo put on top da prieses head fo show God wen pick dem, an fo make da incense smell nice.

⁷Blue lapis lazuli stones an odda stones fo put togedda fo make jewelry, fo da ves da main pries guy wear, an fo his ches piece in front.

⁸Den I like da peopo make me one spesho place fo live, so I can stay wit dem.

⁹I goin show you da plan fo my Tent an fo all da stuff inside da Tent, den you guys goin make um all jalike I stay show you.

¹⁰“Tell um fo make one box outa koa wood, three feet nine inch long, two feet three inch wide, two feet three inch high.

¹¹All ova da outside a da box, an all ova da inside, tell um fo put hundred percent pure gold. Den put pure gold molding aroun da top.

¹²Melt gold metal fo make four rings. Put um on top da four feet, two rings one side an two rings da odda side.

¹³Make two poles outa koa wood an cova dem wit gold.

¹⁴Put da poles inside da rings on top da two sides a da box, so can carry um.

¹⁵Da poles gotta stay inside da rings, no take um out.

¹⁶Den put inside da box, da ting I goin give you fo make shua you no foget da Deal I making wit you.

¹⁷“Make one cova fo da box outa pure gold, three feet nine inch long an two feet three inch wide. Dass da place I goin hemo da shame fo all da bad tings da peopo do, fo bring um on da same side wit me.

¹⁸Make two statues dat look like awesome angel watcha guys wit wings. Make um outa gold dat you work wit da hammer from da back side. One a dem go on top one side a da cova, an da odda go on top da odda side a da cova.

¹⁹Da two angel watcha kine statues on da two sides, an da cova, put um all togedda fo come one piece.

²⁰Da statues dat look like awesome angel watcha guys wit wings, make dem jalike dey looking at each odda, ova da cova from da two sides. Make da statues wit da wings spread up ova da cova fo hide da cova. Cuz dass da place wea I goin hemo da shame fo all da bad tings da peopo do, fo bring um on da same side wit me.

²¹Den take da flat stones I goin give you fo make you rememba da Deal I making wit you guys, an put um inside da Box. Den put da cova on top da Box. Dass da place wea I goin hemo da shame fo all da bad tings da peopo do, fo bring um on da same side wit me.

²²Az da place wea I goin meet wit you guys. I goin talk wit you from da spesho place wea I goin hemo da shame fo da bad tings da peopo do, right dea in da middo a da two statues dat look like da awesome angel watcha guys, dat stand ova da Box Fo Rememba My Deal. From dat place, I goin tell you eryting da Israel peopo gotta do.

²³“Make one table from koa wood, three feet long, one an a half feet wide, an two feet three inch high.

²⁴Put pure gold all ova da table, an put gold molding all aroun da top.

²⁵Put three inch edge all aroun da top so notting can fall off da table, wit gold molding all aroun da edge.

²⁶Make four gold ring fo da table, an put da rings on top da four cornas wea da four table legs stay.

²⁷Da rings go nea da edge dat stay aroun da top, fo take da poles fo carry da table.

²⁸Make da poles outa koa wood fo carry da table, an put gold all ova dem.

²⁹Make da dishes an pans an cups an bowls outa pure gold fo go wit da table, fo pour da kine wine offerings you pour out.

³⁰Put da twelve spesho breads on top da table, da ones dat show I stay wit yoa twelve ohanas. Ery day you gotta put new kine breads in front me, fo eva.

³¹“Make one stan fo put da lamps on top, wit gold. Put all da pieces togedda fo make um come one piece pure gold, an use hammer fo shape um. Make da bottom wit da main piece dat go strait up, an da side pieces too, wit cup dat look like da bud a one flowa.

³²From da middo part, six tings goin stick out jalike tree branch. Three branch goin come out one side, an three branch on da odda side.

³³Three small cup on top, dat look jalike da almond flowa, wit da bud part an da flowa, stay on one branch, three on da odda one, an same fo da res a da odda branch too.

³⁴Da main piece in da middo a da lamp stan, dat one get four small cup on top, jalike da almond flowa, wit da bud part an da flowa.

³⁵Da three place wea da two side branch come outa da lamp stan, put one almond flowa bud part in da middo a da two branch, an anodda one on da nex two branch, an same same fo da las two branch.

³⁶Da main piece, an da side pieces, an da almond flowas, all gotta be one piece pure gold, an you shape um wit da hammer.

³⁷Den make seven olive oil lamp fo go on top da lamp stan. Set um up so da light come in front um.

³⁸Da pans fo carry da fire an da covas fo pio da light, make dem outa pure gold too.

³⁹Fo make da lamp stan an all da odda tings, use 75 pound pure gold.

⁴⁰“Make shua you make eryting jalike da plan I stay show you hea on top dis mountain!”