Read Hawaii Pidgin Exodus 28 Bible Online

Exodus 28 - Hawaii Pidgin bible

Exodus 28

¹Moses, tell yoa brudda Aaron an his boys fo come in front you: Aaron, His boys Nadab an Abihu, Eleazar an Itamar, I wen pick dem outa all da Israel peopo cuz I like dem be da pries guys fo me.

²“Make spesho kine clotheses fo yoa brudda Aaron fo show he stay spesho fo me, God. Make um real awesome kine, so erybody show him plenny respeck.

³Talk to all da kine peopo dat I awready wen make dem know how fo sew clotheses, fo make um. Tell all dem fo make da spesho clotheses fo Aaron, cuz he goin be spesho fo me, an be da pries guy fo me.

⁴Dese da kine clotheses dey gotta make: Da ches piece, Da ves, Da robe, Da shirt fo undaneat da robe, made wit small kine squares all ova, Da pries kine hat, Da sash. Dey goin make all dis kine clotheses fo Aaron, an same ting fo his boys, so dey can be pries guys fo me.

⁵Da peopo dat know how fo make stuff, let dem use da gold string, da blue wool string, da purple wool string, da red wool string, an da fancy kine linen cloth fo make um.

⁶“Make da pries kine ves wit gold, an wool string (blue, purple, an red), an fancy kine linen string, an dis az da kine work da real smart guys going make.

⁷On top da two shouldas, dey gotta put two shoulda piece dat hold togedda da front side an da back side.

⁸Dey goin weave one fancy kine waist band an sew um to da ves. Dey goin weave um from da same ting -- gold, an blue, purple, an red wool string, an fancy kine linen string.

⁹“Take two blue lapis lazuli stone, an cut da names on top da stones, fo da twelve Israel boys.

¹⁰Put da names fo six a da boys on top one stone, an da names fo da odda six boys on top da odda stone. Start wit da one dat wen born firs, an go all da way to da one dat wen born last.

¹¹Cut da alphabets on top da stones jalike da jewel guys make. Den make gold frame fo da two stone.

¹²Den sew da stones on top da two shoulda pieces. Dose two stones, dey fo make da pries guy rememba da Israel peopo. Cuz Aaron, erytime wen he go in front Yahweh, he take dea ohana names dea, on top his two shouldas, so he rememba bout dem.

¹³“Make gold frames fo da stones.

¹⁴An make two chains outa pure gold dat you work wit da hammer, plenny small chains twist togedda jalike one thick string. Put togedda da chains an da frames wit da stones inside.

¹⁵“Make one ches piece fo use if dey gotta know how fo do da right ting. Weave um outa gold, an blue, purple, an red wool string, an fancy kine linen string, da same style jalike da ves.

¹⁶Fold um in half an sew da sides fo make one small bag dass square, eight inch by eight inch.

¹⁷Den put um on top da ches piece, one side. Put twelve fancy jewelry kine stones wit frames. Make four row, wit three stone ery row: Firs row, red ruby, yellow chrysolite, an green emerald.

¹⁸Da secon row, put light green turquoise, dark blue lapis lazuli, an white moonstone.

¹⁹Da third row, put jacint, agate, amethyst,

²⁰Da las row, put beryl, onyx, jasper. Put gold frame aroun ery stone fo hold um.

²¹Ery stone, az fo one a da Israel ohanas. Cut da stone fo put dea names jalike fo make one seal, twelve name on top da twelve stone, fo da twelve Israel ohanas.

²²“On top da ches piece, make plenny small chains outa pure gold an twist um togedda jalike one thick string.

²³Make two gold rings fo da ches piece, an put um on da two top cornas.

²⁴Hook da two chains to da two rings in da corna.

²⁵Den, hook da odda side a da two chains to da two gold frames on top da shouldas fo da ves. Let da ches piece hang down in front from da two shouldas.

²⁶“Make two mo gold rings, an put um da two sides a da ches piece, da bottom side wea da ches piece meet da ves.

²⁷Den, make two mo gold rings. Put um on top da ves, down from da shoulda pieces, front side, near da place wea da waist band come togedda wit da ves.

²⁸Tie da ches piece wit blue wool string, from da bottom ches piece rings to da rings on top da ves. Tie um so da ches piece stay right on top da fancy waist band, an no come off.

²⁹“Erytime Aaron go inside da Place Dat Stay Spesho Fo God, he goin carry da names fo da Israel ohanas on top his heart, cuz dey write um on top da ches piece dat dey use wen dey gotta know how fo do da right ting. Aaron goin do dis an tink bout all da Israel ohanas erytime he go in front Yahweh.

³⁰“Inside da ches piece dey use wen dey gotta know how fo do, put da Urim an da Tumim. Erytime Aaron go in front Yahweh, da Urim an da Tumim goin be dea, on top his heart. So wen Aaron gotta find out wat da Israel peopo gotta do, he goin get da tings he need fo find out, right dea on top his heart, all da time.

³¹“Make da robe dat go wit da ves ony wit da blue kine wool cloth.

³²Make one puka fo da head inside da middle a da robe, an weave extra stuff all aroun da puka, fo make um thick so no goin rip, jalike how dey make da metal kine shirt da army guys wear.

³³Da side nea da floor, take blue an purple an red wool string, an sew pichas dat look like pomegranate fruits. In da middle a da fruits, put small kine gold bell,

³⁴so get bell, den pomegranate, den bell, den pomegranate, all aroun da bottom.

³⁵Aaron gotta wear dat wen he do his work. Da bells goin make noise wen he go inside da Real, Real Spesho Place in front Yahweh, an wen he come outside he no mahke.

³⁶“Make one small piece gold fo go on top Aaron forehead. Cut um on top da gold jalike fo one seal, fo say “Spesho Fo Yahweh.”

³⁷Tie one blue wool string an put um on da hat from da front, so den da gold ting erytime stay wit da hat.

³⁸Wen Aaron put on da hat, da gold piece goin touch his forehead. Dass cuz maybe bumbye, da Israel peopo no do someting da right way, wen dey bring presents fo God an like make um spesho for him, an da gold piece goin show dat Aaron take da blame fo dat. Den Yahweh goin like take da presents dat da peopo bring fo him.

³⁹“Weave da long shirt outa fancy kine linen cloth, wit small squares all ova. Make da pries kine hat outa da linen cloth too. Da sash, weave um fo make picha all ova, plenny diffren colors.

⁴⁰“Same ting fo da Aaron boys. Make shirt an sash fo dem, an pries kine hat, real good looking kine, dat show dat dis az serious kine stuff dey goin do.

⁴¹Afta you put all dis clotheses on top yoa brudda Aaron an his boys, put olive oil on top dea head fo show I wen pick dem, an in front erybody, give dem da kuleana fo be prieses an work fo me.

⁴²“Make beebeedees outa linen cloth fo cova up dea privates, eryting from da waist to da thigh.

⁴³Erytime Aaron an his boys go inside da Tent Wea Dey Come Togedda Wit Me, an erytime dey come nea da altar fo do someting inside da Spesho Place, dey gotta wear dis -- no good dey do someting bad an I gotta punish dem an dey mahke. “Dass da Rule fo da Priest Guys, fo Aaron an his boys, an all da ones dat goin come from dem, foeva.”