Read Hawaii Pidgin Exodus 35 Bible Online

Exodus 35 - Hawaii Pidgin bible

Exodus 35

¹Moses tell all da Israel peopo fo come togedda. He tell um, “Dis wat Yahweh say you guys gotta do.

²Get six days you can work. Da numba seven day, you goin res an no work notting. Dat day, spesho fo Yahweh. Anybody dat work dat day, gotta kill um.

³No even make fire inside yoa house dat Res Day.”

⁴Moses tell all da Israel peopo dis too: “Dis wat Yahweh say you guys gotta do.

⁵From da tings you guys get, bring gifs fo Yahweh. Erybody dat like do dat, go bring him gold, an silva, an bronze metal,

⁶blue, an purple, an red wool string, fancy kine cloth made from linen, hair from da goats,

⁷red ledda made from sheep skins, an skin from da dolphin, koa wood,

⁸oil from da olive fo burn inside da lamps, spices fo da oil fo put on top da pries guys fo show God wen pick dem, an fo make da kine incense dat smell real nice,

⁹jewelry stones fo put inside frames on top da ves an da ches piece fo da main pries.

¹⁰“Erybody dat know how fo make stuff good, come make all da tings Yahweh wen say us guys gotta make:

¹¹Fo da Tent, make da inside tent an da cova, da hooks an da boards, da bars an da poses, an da bases dat go undaneat,

¹²da Box Fo Rememba Da Deal, wit da poles, an da gold cova, an da thick curtain so no can see inside,

¹³da Table fo da Breads, wit da poles fo carry da table an all da tings dey use fo da breads dat dey put in front Yahweh, an da breads,

¹⁴da lamp stand fo da light, da tings dey use fo da lamps dey put on top da stand, an da oil from da olive fo da light,

¹⁵da small altar fo da incense wit da poles fo carry um, da spesho oil fo put on top da pries guys head, da incense dat smell nice, da thick cloth dat go in front da door fo da Tent so no can see inside,

¹⁶da big altar wea dey burn up da sacrifices, da bronze grill inside da altar, da poles fo carry um, an all da tings dey use wit da altar, da watta tub an da stand dat go undaneat,

¹⁷da cloth dat go aroun da yard, wit da poses an da bases dat go undaneat, an da thick cloth so no can see inside da yard,

¹⁸da tent pegs fo da main Tent, da pegs fo hold up da poses dat go aroun da yard, an da rope fo dem,

¹⁹da clotheses dey goin weave fo da pries guys wear erytime dey do dea work inside da Place Dass Spesho Fo God, da spesho clotheses fo Aaron da pries guy, an da spesho clotheses fo his boys dat goin do da pries kine work.

²⁰Den all da Israel peopo go way from da place wea Moses talk to dem.

²¹Erybody dat dea heart tell um fo come do um, wen come dea. Erybody dat inside dea heart really like come fo help, dey all bring stuff fo give to Yahweh, fo make da Tent Fo Come Togedda Wit God, an fo all da work, an fo all da clotheses dat stay spesho fo God.

²²Erybody dat inside dea heart like fo help, da men o wahines, dey all come. Dey bring pins an earrings an rings and necklaces, all kine gold tings. Dey all hold up dea gold tings in front Yahweh, an dey give um to him,

²³Erybody dat get stuffs dea place, blue an purple an red wool string, fancy kine linen cloth, hair from goats, red ledda from sheep skins, dolphin skins, dey all bring dea stuffs.

²⁴Erybody dat like give silva o bronze fo make gif fo Yahweh, dey bring um. Erybody dat get koa wood dea place fo all da work dey gotta do, dey bring dat too.

²⁵Had wahines who know how fo make real good kine wool string wit dea own hands. Dey all wen bring da blue an purple an red wool string dey wen make, an same ting fo da fancy kine linen cloth.

²⁶Odda wahines dat really like make da real good kine string outa goat hair, dey wen do dat.

²⁷Da leada guys, dey bring all kine jewelry stones fo make frame an put um on top da ves an da ches piece fo da main pries.

²⁸Dey bring olive oil fo make light inside da lamps, an fo da oil dey use fo show dat God wen pick da new pries guy, an spice fo make da kine incense dat smell real nice.

²⁹Dass how da Israel peopo make. All da guys an da wahines dat inside dea hearts really like do someting fo God, dey bring stuff fo do da work dat Yahweh wen tell um fo do. Dey really like bring um to Yahweh, jalike he tell Moses fo tell da peopo fo do.

³⁰Den Moses tell da Israel peopo, “Yahweh wen pick Bezalel an tell me his name. His fadda, Uri, an his granfadda, Hur, from da Judah ohana.

³¹Bezalel get da kine spirit inside him dat come strait from God, so he real smart fo know how fo make eryting,

³²an how fo figga out how fo make da tings outa gold an silva an bronze,

³³an how fo work wit da jewelry stone dat go inside da frames, an how fo work wit wood -- ery kine ting he goin make, he know how fo figga um.

³⁴An fo teach da odda worka guys wat dey gotta do, God wen give da heart fo teach lidat to Bezalel, an to Oholiab Akisamak boy from da Dan ohana,

³⁵God da one make dem smart fo do any kine work, make tings, figga out da work fo do um, weave cloth wit blue an purple an red wool string, an make fancy kine linen cloth -- all kine tings fo figga out how da stuff goin look like.