Read Hawaii Pidgin Exodus 37 Bible Online

Exodus 37 - Hawaii Pidgin bible

Exodus 37

¹Bezalel make da Box Fo Rememba Da Deal. Dey make um outa koa wood, 3 feet 9 inch long an 2 feet 3 inch wide an 2 feet 3 inch high.

²He cova da inside an da outside wit pure gold, an he put gold molding all aroun da top.

³He melt gold metal fo make four rings fo da bottom cornas a da Box, two rings one side an two rings da odda side.

⁴Den he make poles outa koa wood an cova dem wit gold.

⁵He put da poles inside da rings on top da two sides a da Box, so da peopo can use um fo carry da Box.

⁶Den Bezalel make one cova fo da Box outa pure gold, 3 feet 9 inch long an 2 feet 3 inch wide. Dat cova, fo show dat God goin hemo da shame fo all da bad tings da peopo do, so dey can come back same side wit him.

⁷He make two statues dat look like awesome angel watcha guys. He make um outa gold dat you work wit da hammer.

⁸One a da statues go on top one side a da cova, an da odda go on top da odda side a da cova. Da two angel kine statues an da cova, he put um all togedda fo come one piece gold.

⁹Da statues dat look like da awesome angel watcha guys, Bezalel make um jalike dey looking down on top da cova from da two sides. He make da statues wit da wings open wide ova da cova, da place wea God hemo da shame fo all da bad tings da peopo do, so dey can come back same side wit him.

¹⁰Bezalel dem make one table outa koa wood, 3 feet long, 1 foot 6 inch wide, 2 feet 3 inch high.

¹¹Den dey put pure gold all ova da table, an put gold molding aroun da top.

¹²He put 3 inch rim all aroun da top so notting can fall off da table, wit gold molding all aroun da top a da rim.

¹³He melt gold metal fo make four ring fo da table, an put da four rings by da cornas, wea da four legs stay.

¹⁴Da rings go right unda da rim dat stay aroun da top, fo hold da poles fo carry da table.

¹⁵Da poles, dey make um outa koa wood fo carry da table, an put gold all ova dem.

¹⁶Dey make dishes an pans an cups an bowls outa gold fo go wit da table, fo pour out da kine wine offerings.

¹⁷Bezalel dem make one gold stand fo put da lamps on top. Dey make um from pure gold, an put um togedda fo come one piece pure gold, an dey use da hammer fo shape um. Dey make da bottom, an da main piece go strait up, an da side piece wit cup dat look like da bud fo one flowa.

¹⁸From da main middle piece, three side pieces come out one side, an three from da odda side.

¹⁹Ery side piece get three small cup on top. Da cup, dey wen make um look jalike da almond flowa on top da branch, wit da bud part an da flowa, an same ting fo da six branches da come outa da main piece.

²⁰Da main piece inside da middo, dat one get four small cup on top, jalike da almond flowa, wit da bud part an da flowa.

²¹Da three place wea da side pieces come outa da main piece, make one almond flowa unda each place.

²²Da main piece, da side pieces, an da almond flowas, dey make um wit da hammer, an come all one piece pure gold.

²³Bezalel dem make da seven olive oil lamp fo go on top da lamp stand, an da pans fo carry da fire an da tings fo pio da light, dey make um all outa pure gold.

²⁴Fo make da lamp stand an all da tools, dey use 75 pound pure gold.

²⁵Den Bezalel dem wen make da altar fo burn incense on top, outa koa wood. Dey make um square, 18 inch by 18 inch, an 3 feet high, wit tings jalike horns coming out from da cornas.

²⁶Dey put pure gold all ova da altar -- on top, da sides, da tings jalike horns, eryting. An dey put gold molding aroun da top.

²⁷Down from da molding, dey put two gold rings one side, an two gold rings da odda side. Da rings, fo hold da poles fo carry da altar.

²⁸Dey make da poles outa koa wood, an put gold all ova dem.

²⁹Dey make da oil dass spesho fo God, fo put on top da prieses fo show dat God wen pick um. Dey make da incense dat smell nice, same way peopo make perfume.