Read Hawaii Pidgin Exodus 38 Bible Online

Exodus 38 - Hawaii Pidgin bible

Exodus 38

¹Bezalel dem wen make da big altar fo burn up da sacrifices. Dey make um outa koa wood, 7 feet 6 inch square, an 4 feet 6 inch high.

²Dey make tings dat look like horn, dat stick out, an put um on top da four corna. All dis, he make um in one piece, den cova da whole ting wit bronze metal.

³Dey use bronze metal too fo make da buckets an da shovels fo take away da ashes, an da bowls, an da forks fo da meat, an da pans fo carry da fire.

⁴Dey make one bronze grill jalike one net. Da grill go inside da middo a da altar, half way down unda da top.

⁵Dey melt bronze metal fo make four rings fo da four cornas a da grill, fo put da poles fo carry um.

⁶Dey make da poles outa koa wood and cova dem wit bronze.

⁷Dey put da poles inside da rings, da two sides a da altar, so can carry um. Dey make da altar wit notting inside, jus boards aroun da outside.

⁸Bezalel dem make da watta tub an da stand, from da bronze mirrors dey get from da wahines dat work just outside da door in front da Tent Fo Come Togedda Wit God.

⁹Nex, Bezalel dem make fo da yard aroun da Tent Fo Come Togedda Wit God, one fence. Da sout side, get 50 yards fancy kine linen cloth,

¹⁰wit 20 poses an 20 bronze piers undaneat. Da top a da poses, get silva hooks an straps.

¹¹Da nort side, same ting.

¹²Da wes side, had 25 yards fancy kine linen cloth, wit 10 poses an 10 bronze piers undaneat. Da top a da poses, get silva hooks an straps.

¹³Da eas side, dass da front side, get 25 yards fancy kine linen cloth --

¹⁴but dey wen put 7 an a half yards on top three poses an three piers da one side a da door,

¹⁵an 7 an a half yards on top three poses an three piers da odda side a da door.

¹⁶All da curtains dat go aroun da yard, dey make um wit fancy kine linen cloth.

¹⁷All da piers dat go undaneat da poses, dey make um outa bronze metal. Da hooks an da straps on top a da poses, dey make um outa silva, an cova da top part a da poses wit silva.

¹⁸Fo da gate in front da yard, dey weave one curtain outa fancy linen, an den dey take da blue an purple an red wool string an make pichas all ova. Da front curtain, 10 yards long an 7 feet 6 inch high. Same ting fo da odda curtains dat go aroun da yard, dey all 7 feet 6 inch high.

¹⁹Da gate curtain get 4 poses. Ery pos get bronze pier undaneat. Da hooks on top fo hold da curtain, dey make um outa silva, an dey cova da tops a da poses an make da straps aroun um wit silva.

²⁰Da pegs fo da Tent an da yard, dey make all dem outa bronze.

²¹So, all dis az how many tings dey check out fo Da Tent Fo Come Togedda Wit God, dass Da Tent Fo Rememba Da Deal. Moses wen tell um fo check out eryting. Da Levi ohana guys do da work fo check um out, an Itamar da pries, Aaron boy, was in charge.

²²(Bezalel, Uri boy an Hur grankid, from da Judah ohana, he da one dat make eryting Yahweh wen tell Moses dey gotta make.

²³Da guy dat work wit him, Oholiab, Ahisamak boy from da Dan ohana. He real good fo cut wood an metal, an fo tink how fo make tings, an how fo make picha on top da fancy linen cloth wit blue an purple and red wool string.)

²⁴All da gold dey wen use fo make da spesho tings fo God, dat da peopo wen give, was 2,195 pound.

²⁵Da silva from da tax wen da Levi ohana guys wen count da peopo was 7,550 pound.

²⁶Da Levi guys wen count 603,550 mens dat make 20 years o moa, an wen da guys write dea name, da Levi ohana guys charge erybody one half shekel.

²⁷Da builda guys wen use 7,500 pound silva fo melt an make da piers dat go undaneat da boards fo da main tent an undaneat da poses fo da thick curtain inside da Tent, 100 piers wit 75 pounds silva ery pier.

²⁸Da odda 50 pound, dey use um fo make da hooks an da straps on top da poses, an fo cova da top part a da poses.

²⁹Da bronze dat da peopo wen bring fo gifs to God was 5,310 pound.

³⁰Dey use dat fo make da piers fo da poses in front da Tent Fo Come Togedda Wit God, an fo da big altar an da bronze grill dat get inside, an da bronze pans an tings dat dey use fo dat altar,

³¹an fo da piers fo da poses dat go aroun da yard, an fo da poses fo da gate, an da pegs fo da ropes fo da Tent an da poses fo go aroun da yard.