Read Hawaii Pidgin Exodus 40 Bible Online

Exodus 40 - Hawaii Pidgin bible

Exodus 40

¹Den Yahweh tell Moses dis:

²“On da numba one month, numba one day, you gotta put up my place, da Tent Fo Come Togedda Wit Me.

³Put da Box Fo Rememba Da Deal Wit Me, inside da Tent. Hang da thick curtain so nobody can see da Box.

⁴Bring da table inside, da odda side a da curtain, an put da tings fo da table on top. Put da stand fo da lamps inside da Tent an put da olive oil lamps up on top.

⁵Da odda side a da curtain, put da gold altar fo burn da incense nex to da Box Fo Rememba God's Deal. Hang up da outside curtain by da puka fo da door, so no can see inside da Tent.

⁶“In front da Tent Fo Come Togedda Wit Me, put da big altar fo burn up da sacrifices inside da middo a da yard nea da place wea da pries guys come inside.

⁷Put da watta tub in da middo, wit da Tent one side an da altar da odda side. Put watta inside da tub.

⁸Put up da poses an da cloth pieces fo make da yard all aroun da Tent. Put up da curtain by da gate fo go inside da yard.

⁹“Den, take da spesho oil fo show wass spesho fo me, an put um on top da Tent an on top all da tings dat stay inside da Tent. Dass fo make eryting dea, spesho fo me.

¹⁰Put da spesho oil on top da big altar fo burn up da sacrifices an all da tings dat dey use fo um, fo make da altar spesho fo me too.

¹¹Same ting, put da spesho oil on top da watta tub an da stand, fo make um spesho fo me.

¹²“Den bring Aaron an his boys fo come by da place fo go inside da Tent Fo Come Togedda Wit Me. Wash dem wit da watta.

¹³Den Put da spesho pries kine clotheses on top Aaron. Put da spesho oil on top him, fo make him spesho fo me, cuz he goin be da pries fo me.

¹⁴Den bring his boys ova dea too. Put da long shirts on top dem.

¹⁵Put da spesho oil on top dem fo make dem spesho fo me, jalike you wen do fo dea fadda, so den dey goin be prieses fo me too. Wen you go put dat spesho oil on top dem, dat mean, dea ohana goin be prieses fo me, dem, an dea kids, an dea kids foeva.”

¹⁶Moses do eryting jalike Yahweh wen tell him fo do.

¹⁷So den, two years afta dey wen go outa Egypt, on da numba one month an da numba one day, dey put up da Tent Fo Come Togedda Wit God.

¹⁸Fo put up da Tent, Moses dem wen put da piers on top da groun, an put da boards inside da pukas in da piers, an da poles dat go across da boards dat stand up. Dey put up da poses.

¹⁹Den dey put da inside tent ova da boards, an dey put da outside tent ova dat, jalike Yahweh wen tell um fo do.

²⁰Den Moses take da two piece flat stone dat God wen write da Deal on top dem, an put um inside da Box Fo Rememba God's Deal. He put da poles inside da rings on top da Box, an put da Cova on top wea da pries make da peopo come right wit God.

²¹Dey carry da Box inside da Tent, an put up da thick curtain so no can see da Box, fo make one room dat ony get da Box Fo Rememba God's Deal inside, jalike Yahweh wen tell Moses fo do.

²²Moses put da table inside da Tent, on da nort side outside da thick curtain.

²³On top da table he put da twelve bread in front Yahweh, jalike Yahweh wen tell um fo do.

²⁴Sout side, inside da Tent Fo Come Togedda Wit God, Moses put da stand fo da olive oil lamps, across da table.

²⁵Moses put da olive oil lamps on top da stand in front Yahweh, jalike Yahweh wen tell um fo do.

²⁶Moses put da gold altar inside da Tent Fo Come Togedda Wit God, in front da thick curtain.

²⁷He burn incense on top da altar, jalike Yahweh tell um fo do.

²⁸Den Moses dem put up da curtain dat go in front da Tent so no can look inside from outside.

²⁹In front da door fo da Tent Fo Come Togedda Wit God, Moses put up da altar fo burn up da sacrifices. Moses wen kill cows fo make sacrifice, an den he burn um up on top da altar. He put wheat on top da altar too fo make sacrifice, jalike Yahweh wen tell um fo do.

³⁰Moses put up da watta tub in da middo, wit da Tent one side an da big altar da odda side. Dey put watta inside so da pries guys can wash.

³²(31-32) Moses an Aaron, an his boys, erytime dey go inside da Tent Fo Come Togedda Wit God, an erytime dey go nea da altar, dey wash dea hands an dea feets, jalike Yahweh wen tell Moses.

³³Den Moses dem put up da poses an da cloth pieces fo make da yard aroun da Tent an da altar, an dey put up da gate curtain so no can look inside da yard from da outside. Dass how Moses pau do da work. Afta Moses pau set up eryting,

³⁴da Cloud Dat Go From Da Groun To Da Sky wen cova da Tent Fo Come Togedda Wit God, an had one awesome light inside da whole Tent dat show dat Yahweh stay inside dea.

³⁵Moses, he no can go inside, cuz da cloud stay on top da Tent an da awesome light inside da whole Tent show dat Yahweh stay inside dea.

³⁶From dat time, erytime da Israel peopo suppose to move camp, da cloud go up from da Tent, an den dey go.

³⁷But, if da cloud no go up, da peopo no move camp. Da ony time dey move camp is wen da cloud go up.

³⁸Day time, da Cloud From Yahweh stay ova da Tent. Night time, inside da Cloud, get fire. All da Israel peopo can see da fire burning dea. Dass how was, all da time da Israel peopo stay go outa Egypt till dey get to dea own land.