Read Hawaii Pidgin Exodus 6 Bible Online

Exodus 6 - Hawaii Pidgin bible

Exodus 6

¹Yahweh tell Moses: “Now, time awready. You goin see wat I goin do to da Pharaoh guy. Cuz I get mo powa den him, he goin make da peopo go way. Cuz I get da powa fo make him presha, he goin throw da peopo outa his land!”

²An God tell Moses dis: “Me, I Yahweh.

³Da times I let Abraham an Isaac an Jacob see me, dey wen call me Da God Dat Get All Da Powa. But I neva let dem know me wit my real name Yahweh.

⁴Same time, I keeping da promise I wen make wit yoa ancesta guys. I wen make promise I goin give um da Canaan land, da same place wea dey stay making house fo live dea short time.

⁵“I hear how da Israel peopo moaning, cuz da Egypt peopo making dem work fo dem. I rememba da promise I wen make wit dem.

⁶So den, go tell da Israel peopo dis: I Yahweh. I goin take you guys away from da hard work dat da Egypt peopo make you guys do. Dey make you guys work hard fo dem, but I goin get you guys outa all dat. I mo strong den da Egypt peopo, an I goin bus um up. I da judge, so I goin punish dem plenny.

⁷I goin make you guys come my peopo, an I goin come da God for you guys. Den you guys goin know dat I Yahweh, da God fo you guys, da One dat get you guys out from da hard work dat da Egypt peopo make you guys do.

⁸I goin take you guys ova dea, da same place I was talking bout dat time I wen make strong promise to Abraham an Isaac an Jacob. Me, Yahweh, I give dat land to you guys, fo you be da ownas.”

⁹So, Moses wen tell da Israel peopo wat God wen say. But dey no like lissen Moses, cuz inside, dey all hamajang from da hard kine presha dey get cuz dey slaves.

¹⁰Lata, Yahweh wen talk to Moses. He tell um,

¹¹“Go back now. Tell da Pharaoh guy, da King fo Egypt, fo let da Israel peopo go way from his land.”

¹²But Moses, he talk strait wit Yahweh. He say, “Eh! Da Israel peopo, dey no even lissen to me. So, how come you tink da Pharaoh guy goin lissen? I no good fo talk, you know!”

¹³Yahweh talk to Moses an Aaron. He tell um how dey gotta do bout da Israel peopo an da Pharaoh guy, da King a Egypt, fo get da Israel peopo outa da Egypt land.

¹⁴Dis da leada guys fo da diffren ohanas: Reuben, da numba one boy dat come from Israel, da leada guys fo da ohanas dat come from him was Hanok an Pallu an Hezron an Carmi. Da Reuben ohanas, come from dose guys.

¹⁵Fo da Simeon ohana, da leada guys Jemu`el, Jamin, Ohad, Jakin, Zohar, an Sha`ul. Sha`ul mudda was one Canaan wahine. Dey da leadas fo da Simeon ohanas.

¹⁶Dis da names fo da Levi ohana, from da oldes to da younges: dey Gershon an Kohat an Merari. (Levi dea fadda wen live 137 year.)

¹⁷Gershon boys, dey Libni an Shime`i, wit dea ohanas.

¹⁸Kohat boys, dey Amram, Izhar, Hebron, an Uzzi`el. (Kohat dea fadda wen live 133 year.)

¹⁹Merari boys, dey Mahli an Mushi. Dis, da leada guys fo da ohanas dat come from Levi, from da oldes to da younges.

²⁰Amram wen marry Jokebed. She Amram fadda sista. Jokebed wen born Aaron and Moses fo Amram. (Amram, he wen live 137 year.)

²¹Izhar boys, Korah, Nefeg, an Zikri.

²²Uzzi`el boys, Misha`el, Alzafan, an Sitri.

²³Aaron wen marry Elisheba. She Amminadab daughta an Nakshon sista. Elisheba wen born Nadab an Abihu an Eleazar an Itamar fo Aaron.

²⁴Korah boys, Assir, Elkanah, an Abiasaf. Da Korah ohanas come from dem.

²⁵Eleazar, Aaron boy, he wen marry one a Puti`el daughtas. She wen born Finehas fo Eleazar. All dem, dey da leadas fo da diffren ohanas dat come from Levi.

²⁶Dis Aaron an Moses guys I writing bout hea, dey da same ones Yahweh wen tell, “Go take da Israel peopo outa da Egypt land, wit ery ohana all togedda same place, jalike one army.”

²⁷Moses an Aaron, dey da same guys dat wen go tell da Pharaoh guy, da King fo Egypt, dat he gotta let da Israel peopo go way from Egypt.

²⁸Dat time, inside da Egypt land, dass how Yahweh wen talk to Moses an Aaron.

²⁹Yahweh tell dem, “I Yahweh. So, go tell da Pharaoh guy, da King fo Egypt, eryting dat I stay telling you.”

³⁰But Moses, he talk strait to Yahweh. He say, “Eh! I no good fo talk, you know! So, how come you tink da Pharaoh guy goin lissen me?”