Read Hawaii Pidgin Isaiah 1 Bible Online

Isaiah 1 - Hawaii Pidgin bible

Isaiah 1

¹Isaiah, Amoz boy, he wen talk fo God bout Judah an Jerusalem. Dat time, da king fo da Judah peopo was Uzziah, den Jotham, den Ahaz, an den Hezekiah. Dis book tell wat God wen show him.

²Lissen, erybody on top da earth an inside da sky, Cuz I Yahweh da Good Boss, telling you dis: “I wen take care da Israel peopo Jalike dey my kids, an help um grow up. But still yet, dey go agains me.

³Da cows know who own um, An da donkeys know wea dea owna give um food. But da Israel peopo, dey donno me. Even my own peopo no undastan notting bout me.”

⁴Wo! Erybody from inside dea Stay do plenny bad kine stuff, Dey need punish fo teach um, Dem an dea bruddas, dey no do right kine stuff, Dey da kine peopo dat like bus up eryting! Dey go way from Yahweh. Dey hate da God fo da Israel peopo dat stay good an spesho. Jalike dey no like lissen an stay turn dea back on him.

⁵Eh! How come you guys like Fo God bus up you guys some moa?! How come you guys still stay go agains him?! Yoa head stay sore plenny, awready, An inside, you not strong.

⁶From on top yoa head an undaneat yoa feet You guys no even get one place dat stay good, Ony get cut, scar, black an blue, An bad open kine sore all ova. Nobody clean out da pus, Nobody go put olive oil on top fo make um come soft, An nobody put bandage on top um.

⁷You guys land, nobody can live dea. Yoa big towns stay all burn up. You wen see da odda peopo take away All yoa food from yoa fields an eat um. An peopo from odda places wen take um ova.

⁸My big town dea Jalike one shack in da middo a da grape field, An jalike fo guard one cucumber field, Jalike one big town wit army guys all aroun, Stay getting ready fo bus up da town.

⁹Yahweh, Da God Ova All Da Armies, If he neva leave us guys some peopo ova dea still yet, Us guys goin come like da Sodom peopo, An da Gomorrah peopo -- no mo nobody dea.

¹⁰So, lissen wat Yahweh tell you guys, You leada guys dat ack jalike you from Sodom! Lissen wat oua God stay teach, You peopo dat ack jalike you from Gomorrah!

¹¹Yahweh tell dis: “You tink I need Da plenny sacrifices you guys make?! No way! I get mo den plenny boy kine sheeps Dey can burn up fo make sacrifice, An da fat stuff from da bestes animals. I no need da blood from da bull cows An da bebe sheeps an da boy goats. Dat no make me stay feel good inside.

¹²Wen you guys come fo show face in front me, Who wen tell you guys you gotta do dat? An how come you guys walk all ova my Temple yard, aah?!

¹³No bring me sacrifice dat no mean notting! Da incense you guys burn fo me stay smell, stink. You guys come togedda ery month an ery week But I no like da kine meetings you guys make, Cuz dey ony bad.

¹⁴Yoa new moon meetings An yoa odda spesho religious times, Dey no make me feel good. Dey jalike one heavy ting on top my back Dat I gotta carry. I no goin take um no moa.

¹⁵Wen you guys put up yoa hands fo pray to me I goin look da odda way. No matta you pray plenny long time, I no goin lissen. Yoa hands stay dirty all ova From da blood a da peopo you wen kill.

¹⁶Wash yoaself so you come clean. Throw away all da bad kine stuff you stay do. Stop doing wass wrong, An no do um no moa!

¹⁷Learn how fo do wass good. Go all out fo do wass right. Kokua da peopo dat need help Fo da bad tings da bad guys do to dem. Da kids dat no mo fadda o mudda, help dem. Make argue fo help da wahines dat no mo husban.”

¹⁸Yahweh tell: “Come, us goin talk togedda bout dis ting. No matta all yoa bad kine stuff Look jalike one big red spot now, But dey goin come white jalike da snow. No matta now jalike dey stay dark red, Dey goin come white jalike da wool.

¹⁹If you guys like lissen, An tink da same ting jalike me, You goin eat all da good stuff from da land.

²⁰But if you no lissen an no like do wat I say, Den odda peopo goin come wit dea swords An wipe out you guys. Cuz az me, Yahweh Da Boss, dat say dis.”

²¹Auwe! You see da peopo inside da big town Dat I wen trus befo time, Dey come jalike one wahine dat fool aroun fo money. Befo time, dey stay stick wit me, An wen dey judge peopo, dey do um da right way. All da time dey stay do wass right. But now, ony get guys ova dea dat ony like kill peopo!

²²Jalike you wen melt silva metal, An keep da junks dat come up, But throw way da good kine silva. An yoa good wine jalike ony half watta.

²³Yoa leada guys, dey go agains me. Dey hang aroun wit steala guys. Dey all like get unda da table kine money Fo eryting dey do. Dey no make like one good judge Fo kokua da kids dat no mo fadda o mudda. Dey no even tink notting Bout kokua da wahine dat no mo husban.

²⁴Dass why dis wat Yahweh the Boss, Da God Ova All Da Armies, Da Strong One dat help da Israel peopo, Dis wat he tell: “Auwe! I goin fight an win Ova erybody dat go agains me So dey no can bodda me no moa. I goin pay back erybody dat stay agains me.

²⁵I goin go agains you Jerusalem guys too, Jalike I goin put you inside da fire Fo take out all yoa junk kine stuff from inside you.

²⁶Den I goin bring good kine judge guys fo you guys, jalike befo time. An akamai kine peopo dat can tell you guys wat fo do, Jalike you guys wen get da firs time. Afta dat, peopo goin call you guys ‘Da big town wea erybody do da right ting,’ An ‘Da town wea you can trus da peopo.’-”

²⁷Da peopo dat stay go Mount Zion fo pray, Inside Jerusalem town, God goin help dem get outa trouble, He goin judge dem da right way. Wen dey come back God side, God goin do wass right fo dem.

²⁸But da peopo dat go agains me An da ones dat stay do bad kine stuff, I goin bus up all dem. I Yahweh, an I goin wipe all dem out!

²⁹“Fo shua, you guys goin come shame plenny Cuz you like go down in front da idol kine gods Inside place wea get oak trees an garden.

³⁰Cuz a dat, you guys goin come jalike one oak tree Wit leaf dat stay come all dry up. An jalike one garden Dat no mo watta.

³¹Even da strong guys Goin burn up jalike [one] dry leaf. Eryting dey wen work fo make, Goin come jalike one spark. All da stuff dey wen make, An da guys dat make um, Goin burn up same time, An no mo nobody can pio da fire.