Read Hawaii Pidgin Isaiah 10 Bible Online

Isaiah 10 - Hawaii Pidgin bible

Isaiah 10

¹Auwe! fo da guys dat make all kine rules dat not right, An write all kine rules dat make humbug fo da peopo!

²Dey make da peopo dat no mo notting No can get help from da judge. Dey take away da rights From my peopo wen dey get hard time. Dey steal stuffs from da widows An da kids dat no mo fadda o mudda.

³But wat you guys goin do Wen da time come fo God punish you guys? Wen da army guys come from far Wipe you guys out jalike one storm? Wat peopo you guys goin run to, Fo dem help you guys? Wea you guys goin leave all yoa rich stuffs Wen you run away?

⁴Ony one ting you can do -- give up Cuz wat goin happen to you, mo worsa den da prisona guys! O you can fall down on top da groun wit da odda mahke bodies, Cuz wat goin happen to you, mo worsa den wat happen to da guys dey kill! An Yahweh stay huhu wit da Israel peopo still yet, An he stay ready fo bus um up.

⁵[God tell:] “Auwe! fo you guys! I goin use da Assyria peopo jalike one club fo punish you, Cuz I stay huhu wit you Israel peopo, An I goin make da Assyria guys wack you!

⁶I goin send da Assyria army guys agains my peopo Dat ack jalike I no matta. I no can take awready Da bad kine stuff da Israel peopo stay do. Dass why I tell da Assyria peopo Fo come take da Israel peopo's rich stuff An take um all away. Jalike dey goin walk top da Israel peopo An push um down jalike dey mud on top da streets.

⁷But da Assyria guys, dey no tink like me. Dey no make same kine plan jalike me. Dea plan, diffren kine, Cuz dey ony like wipe out eryting, An kill plenny diffren peopos.

⁸Da Assyria king tell: ‘Eh, oua army general guys, All a dem, dey king guys too!

⁹Us guys awready win an take ova Calno an Carkemish, Hamat an Arpa, Samaria an Damascus!

¹⁰We wen take ova diffren lands dat get dea own kings befo time, An da idol kine gods for dose lands, was moa strong Den da Jerusalem an Samaria kine idol gods.

¹¹Us guys wen win ova Samaria town an dea idol gods. Now we goin do da same ting to Jerusalem town An da idol kine gods dea.’-”

¹²Wen God my Boss pau do all he goin do on top Mount Zion inside Jerusalem town wea da Temple stay, den God goin tell, “Now I goin punish da king fo Assyria, cuz he get big head an high nose.

¹³Cuz da Assyria king tink, ‘I can do all dis cuz I strong, An I know wat fo do erytime, Cuz I undastan plenny stuff. I wen take away da lines dat stay block off So all da countries come part a my country. I wen take all dea rich stuffs. An take down dea kings, Cuz I one real strong guy.

¹⁴I find all da silva an gold Dat da diffren peopos get. I grab um, jalike somebody take eggs from one nest! I take away stuff from peopo all ova da world, Jalike somebody take da eggs dat da mudda bird leave. Wen I do dat, nobody say notting, O flap da wing, No even open da mouth, an no squawk.’-”

¹⁵You tink da ax mo betta den da guy dat swing um? Da saw mo betta den da guy dat use um? You tink da club goin lift da guy dat carry um? Da walking stick goin lift somebody dat using um? No way!

¹⁶Cuz a dat, Yahweh da Boss, da God Ova All Da Armies, He goin make da big Assyria army guys Come sick an skinny, An come mo an mo weak like get feva. Fo shua, God goin light one fire Dat goin burn up all da awesome stuff Dat da Assyria king wen get.

¹⁷Da God dat give da Israel peopo light, Fo da Assyria peopo, he goin come jalike one fire. Da One dat stay good an spesho fo da Israel peopo Goin burn up da Assyria peopo. In one day, dat fire goin burn up All da Assyria peopo, jalike dey kukus an weeds.

¹⁸Da Assyria king get any kine awesome forest An plenny place fo grow fruit tree. Yahweh goin make all dat come pau, Inside an outside, Jalike wen one sick guy come poho.

¹⁹Ony litto bit trees goin stay Inside da Assyria king forest. Not too much, even one young boy can count um.

²⁰Dat time goin come, An some a da Israel peopo dat still stay alive An da ones from da Jacob ohana dat get away, Dey no goin trus da Assyria king no moa, Da one dat wen wack um. But dey goin trus Yahweh fo real kine, Da One dat stay good an spesho fo da Israel peopo.

²¹Ony some a da Jacob peopo goin come back hea An trus da Real God dat get all da power.

²²No matta you Israel peopo Get plenny, jalike da sand by da sea, Ony some a dem goin come back. God say all da oddas goin wipe out, Jalike wen da big watta carry um away, Cuz az da right ting fo him do.

²³Cuz Yahweh make up his mind awready Fo wipe out da peopo. My Boss Yahweh, Da God Ova All Da Armies, He da One stay doing dis Ery place inside da whole world.

²⁴Dass da ting my Boss Yahweh tell, Da God Ova All Da Armies. He tell: “My peopo dat stay in Jerusalem town, lissen! No scared da Assyria guys! No matta dey beat you guys wit sticks, An pick up dea club fo hit you, Jalike da Egypt guys do befo time!

²⁵But ony litto bit mo time now, Den I no goin stay huhu wit you guys no moa. I goin come huhu wit da Assyria guys An go wipe dem out.”

²⁶Dat time, Yahweh Da God Ova All Da Armies Goin bring somebody fo wack da Assyria guys wit one whip, Jalike befo time, wen he let Gideon win Ova da Midian guys at da Oreb Rock. Jalike da time da peopo come outa Egypt, An Moses hold out da walking stick Ova da Red Sea.

²⁷Dat time, da Assyria peopo no goin be dea, Jalike wen God go hemo One heavy load from yoa back, O jalike wen God open da yoke from yoa neck, An den you goin be big an strong again.

²⁸Look! Da Assyria army stay coming! Awready dey come Ayath, an den pass by Migron. Dey leave some guys Mikmash side fo guard dea stuffs dea.

²⁹Dey go ova Mikmash Pass. Dey tell, “Eh, we stay Geba town tonite!” Da peopo inside Ramah town, dey scared and shaking. All da peopo inside Gibeah, Saul's town, dey running.

³⁰You peopo inside Bat-Gallim, Yell Cuz you all stay real scared. Watch out, you Laishah peopo! Auwe! fo da peopo inside Anatot!

³¹Da Madmenah peopo, dey running away. Da peopo dat live Gebim town, dey look fo one place fo hide.

³²Da same day, da Assyria army guys goin stop by Nob town. Dey show punch from ova dea, Fo scare da peopo dat live Jerusalem town on top Mount Zion.

³³But you know, Da Boss, dass Yahweh Da God Ova All Da Armies, He goin wipe out da Assyria army an dea mo bigga leadas, Jalike he chop down one big tree wit da ax!

³⁴He goin chop down da Assyria guys, Jalike wen somebody cut inside da forest wit one ax, Jalike wen da awesome big trees inside Lebanon fall down.