Read Hawaii Pidgin Isaiah 12 Bible Online

Isaiah 12 - Hawaii Pidgin bible

Isaiah 12

¹Dat time, you goin say, “I goin tell erybody dat you good, Yahweh. No matta you was huhu wit me, Now you no stay huhu wit me no moa, An you take away da sore from inside my heart.

²Fo shua, He da God get me outa trouble. I goin trus him an no stay scared. Cuz Yahweh, da One make me strong An give me powa. He come awready da One get me outa trouble.”

³Bumbye, all you guys goin stay feel good inside, Cuz Yahweh get you guys outa trouble, Jalike you guys stay good inside Wen you like drink watta, An you get um outa one puka.

⁴Dat time, you guys goin tell, “Tell Yahweh ‘Mahalo!’ Aks him fo help you cuz you know wat kine God him! Go by all da diffren peopos Fo make shua dey know wat kine tings he can do! Help erybody fo rememba Dat wen you know wat kine God him, You know he da greates!

⁵Sing bout Yahweh, Cuz he do awesome kine stuff. Let peopo all ova da world know bout dis!

⁶Yell loud, call out cuz you guys feel good inside, All you peopo dat live inside Jerusalem town! Cuz da Good An Spesho God fo da Israel peopo Stay wit all you guys, Az why you know he da greates!”