Read Hawaii Pidgin Isaiah 13 Bible Online

Isaiah 13 - Hawaii Pidgin bible

Isaiah 13

¹Me, Isaiah, Amoz boy, I get heavy kine stuff fo tell bout wat I see goin happen to Babylon.

²“Eh you army guys dat goin go afta da Babylon town! Put one flag up on top one hill wea no mo tree, So da odda army guys can see. Yell loud to dem. Wave yoa hand, fo tell dem wen fo go inside Babylon, Inside da gate wea da Babylon ali`i guys stay.

³God wen awready tell da army guys Dat goin do dis spesho job fo him, ‘Come! Punish da peopo I stay huhu wit! My guys goin feel real good Wen I win dis war!’

⁴Lissen! Get big noise on top da mountains, Sound jalike get plenny diffren peopos on top dea! Lissen! Da king guys an dea nations, Dey coming togedda fo fight Babylon! Yahweh, da God Ova All Da Armies, He stay make ready one army Fo go make war.

⁵His army guys all stay come from far place, From unda da mos far part a da sky. Az Yahweh coming wit dem, An he goin use dat army Fo punish da peopo he stay huhu wit. Yahweh goin wipe out da whole land!

⁶You Babylon peopo, Cry an yell cuz you stay feel sore inside, Cuz Yahweh, his day stay come nea! Da God Dat Get All Da Powa, He goin wipe out da bad guys.

⁷Cuz a dis, all da Babylon peopo goin come weak An lose fight.

⁸Dey stay real scared an lose fight. Dey feel sore inside, an no can keep still Jalike one wahine dat goin born one bebe. Dey look at each odda An dea face stay all red from da fire, Cuz Babylon town stay burn!

⁹Look! Yahweh, his day stay come fo judge da peopo! Wen dat happen, he no goin give chance notting. He still stay huhu, An he no goin take da bad kine stuff peopo do. He goin make da land wea no mo notting dea, An goin wipe out all da peopo dea dat doing bad kine stuff.

¹⁰Da stars in da sky an da kine pichas dey make Dey no goin get light dey make. Da sun goin come up dark. Da moon no goin get light.

¹¹I goin make bad kine stuff happen To da peopo all ova da world Cuz dey ony do bad kine stuff. I goin make all da peopo dat tink dey big, Pau get big head. I goin make all da ones dat make erybody scared a dem Come notting.

¹²I goin leave ony litto bit peopo alive, Jalike get ony litto bit bestes kine gold dat come from Ofir.

¹³Dass why I goin make da sky shake An da groun goin move from da place he stay, Cuz dass da time dat me, Yahweh, Da God Ova All Da Armies, I still stay huhu, an I no goin take wat da peopo do.

¹⁴Den, jalike wen peopo chase da small deer, An jalike wen da sheep get no mo nobody dat keep um togedda, Erybody goin go back to dea own peopo. Dey all goin run away to dea own land.

¹⁵Erybody dat da army guys catch, Goin get stab. Erybody dey grab Dey goin kill dem wit da sword.

¹⁶Da army guys goin kill dea bebes in front dem, An steal all da stuffs inside dea houses, An rape dea wifes.

¹⁷But you know wat I goin do?! I goin make da Mede peopo go agains da Babylon guys. Da Mede guys, dey only like win. You give um silva kine stuff, dey no care fo dat. You give um gold, dat no make dem stay good inside.

¹⁸Dey goin use bow an arrow Fo kill young guys from Babylon. Dey no goin pity da small bebes. O look at yoa kids wit aloha.

¹⁹From all da diffren countries, Babylon, da mos awesome looking one. All da peopo dea feel real good Cuz Babylon stay da leada. But God goin wipe dem out Jalike he wen wipe out Sodom an Gomorrah.

²⁰Peopo no goin live ova dea no moa. Not even dea kids o grankids goin make house dea. No guys from Arabia goin come dea fo put up his tent no moa. No sheep farma guys goin bring his sheeps fo rest ova dea no moa.

²¹But ony da kine animals dat live inside da boonies Goin live ova dea. Plenny jackal kine wild dogs goin make house ova dea. Da owls goin stay dea, An da wild goats goin jump aroun ova dea.

²²Da hyena an da jackal kine wild dogs goin howl Inside da fancy kine palaces ova dea. Da Babylon town ony get litto mo time! No mo plenny time fo wait awready!