Read Hawaii Pidgin Isaiah 14 Bible Online

Isaiah 14 - Hawaii Pidgin bible

Isaiah 14

¹Yahweh goin show pity fo da Jacob ohana, An he goin pick da Israel peopo one mo time, Fo be his peopo. He goin let dem res on top dea own land. Even peopo from odda place goin come by da Jacob ohana peopo, An goin stick wit dem.

²Da peopos from Babylon goin take da Israel peopo An bring um back inside dea own place. Den da Israel ohana goin take ova dose odda peopos, An da odda peopos, guys an wahines, Goin stay work fo da Israel peopo inside Yahweh land. Befo time, da Babylon peopo make da Israel peopo come prisnas, But now, da ones wen make presha fo da Israel peopo, Dey come dea prisnas.

³Bumbye, Yahweh goin let you rest. Den you no goin feel sore no moa, an you no goin come scared an shake cuz you worry, an goin pau da hard slave kine work dey make you do.

⁴Den you guys goin sing one song fo draw picha bout da Babylon king guys, cuz you guys win awready: Look da ones wen give us hard time, Dey pau awready! Befo time, dey amp out jalike dey da winna, But now, dey no say notting!

⁵Da Babylon king guys dat do real bad kine stuff Wen bus up us guys wit dea club. But da ones dat take ova us guys, An hit us wit dea stick, Now Yahweh broke dea stick.

⁶Da Babylon king guys wen bus up All kine diffren peopos, Cuz dey real huhu, an dey no stop. Az cuz dey real huhu an dey take ova plenny countries An dey no hold back from hurt dem plenny.

⁷But den, all ova da world eryting stay quiet. No mo trouble. Da peopo stay sing cuz dey feel good inside.

⁸Even jalike da pine trees An da cedar trees on top da Lebanon mountain, Dey feel good inside cuz you king guys no mo power. Dey stay sing bout you lidis: “Now dat you no mo power, Nobody come up hea fo chop us down.”

⁹Da peopo down inside Da Mahke Peopo's Place Dey no can wait fo meet you guys Cuz you going down dea too. Da spirits a da mahke leada guys from da whole world Da kings fo all da countries, Dey stand up from dea thrones fo meet you guys.

¹⁰Wen dey meet you guys, dey all goin tell you, “Ho! Now you guys lose yoa powa! You guys stay come jalike us guys!”

¹¹You guys was high makamaka, People play music fo you, But now, you guys come down to Da Mahke Peopo's Place. Da bed you goin get down hea Get worm fo mattress an blanket.

¹²You Babylon kings, ery one a you, You guys wen shine jalike da morning star, Shining plenny even wen da sun start fo come up. But now, look how you guys fall down from outa da sky! God take you an throw you guys down to da earth, No matta befo time you guys strong an bus up all da peopos.

¹³One time you guys wen tink, “I goin go climb up to da sky! I goin put my throne Mo high den God's stars! I goin sit on top da mos far part A da big mountain nort side, Wea all da gods stay come togedda!

¹⁴I goin go up mo high on top a da clouds! I goin make myself come importan Jalike Da God Dass Mo Importan Den All Da Odda Gods!”

¹⁵But now, God bring you guys down to Da Mahke Peopo's Place, Da mos far part a Da Big Black Hole.

¹⁶Da peopo dat see you guys, Dey goin look an look at you. Dey goin tink plenny, an say, “Dis da guy dat wen shake da whole world, An make peopo in all da countries stay scared an shaking?!

¹⁷He make da earth come all empty An bus up all da towns. He no even open da door Fo let da prisona guys go home!”

¹⁸In all da countries, weneva one king mahke, Da peopo erytime let da body stay inside da palace An dey go dea fo show um respeck.

¹⁹But you guys, wen you mahke, Da peopo throw you out on top da groun An no let you lay inside yoa grave, Jalike somebody cut off one branch dat make da tree come sick An throw um outside. Da odda guys dey wen kill wit da sword, same time, Dey go all da way down to da stone inside da Big Black Hole, Dea mahke bodies lay dea on top you, Jalike da body az one blanket fo you.

²⁰Dey no goin bury you guys, Jalike dey bury all da odda king guys, Cuz you wen mess up yoa own land, An kill yoa own peopo. Bumbye, nobody goin talk bout yoa ohana line, Cuz all you Babylon king guys Stay do ony wass bad!

²¹Make ready one place fo kill Erybody dat come from dose king guys, Cuz dea ancesta guys, dey do plenny bad tings. No way, one a dem can stand up fo come king An take ova da world one mo time, An fill up da world wit dea big towns!

²²Yahweh, Da God Ova All Da Armies, he da one tell dis: “Az me, dat goin stand up an fight Agains da Babylon king guys. Bumbye, nobody goin even rememba Da name a da Babylon peopo. Not one a dem goin stay, Same ting fo dea kids An da ones dat come from dea kids.” Az how goin be, Yahweh, Da God Ova All Da Armies, wen say.

²³“I goin make Babylon town come jalike da boonies, One place wea da heron bird live inside da swamp. I goin wipe out Babylon town, Jalike I sweep um wit one broom.” Az how goin be, Yahweh, Da God Ova All Da Armies, wen say.

²⁴Yahweh, Da God Ova All Da Armies, Awready make dis promise: “I wen plan um lidis, dass how goin be. I wen tell dat gotta happen, dass how goin happen.

²⁵Wen da Assyria guys come inside my land, I goin smash dem An step all ova dem On top my mountain. Dey goin try fo put da yoke on top dem, But no goin stay. Dey goin try fo make my peopo carry heavy load on top dea shoulda, But I goin take da load off from dea.”

²⁶Dis, wat I wen plan fo da peopo All ova da world. Dass how I stay ready fo use my powa Fo take charge all da peopos.

²⁷Cuz me, Yahweh, Da God Ova All Da Armies, I awready wen make dis plan. Who can stop me? I stay ready fo use my powa. Who goin make me turn aroun an go home?

²⁸Yahweh wen give me, Isaiah, dis heavy ting fo tell, da same year dat King Ahaz wen mahke:

²⁹Eh! All you Filisha peopo! You betta not stay good inside cuz you tinking lidis, “Da king fo da Assyria peopo dat wen bus us guys up, He mahke, an now dey no mo powa!” But da king guys dat goin come Afta da Assyria king mahke Goin be mo worsa den him! Cuz jalike you kill one snake, One nodda snake goin come from da firs one Dat can kill you wit poison. An you kill dat one, An goin get one nodda snake come from dat one Dat can fly an catch you an bite you.

³⁰Even da mos poor ones from my peopo, Da ones dat no mo notting, Dey goin find food. An my peopo dat get hard time cuz dey need stuff, Dey goin lay down an res, an nobody goin hurt dem. But you Filisha peopo, Yoa mos importan guys goin mahke, Cuz I no let um get notting fo eat. An you odda guys dat still stay alive, You all goin mahke too, cuz no mo food.

³¹Yell, all you peopo inside da town gates! Cry plenny, you peopo inside da big towns! All you Filisha peopo, You so scared, you stay shake! Cuz one strong army come from da north side! Dey burn down da towns. Can see da smoke! [Da army guys / Dey all] stay togedda, Dey no even lose one army guy.

³²Wen da messenja guys from dat army aks you If you guys goin give up, Tell um, “No way! Was Yahweh Dat put his big town Jerusalem [dea / hea]. Fo da peopo dat need help, Dey can go inside Jerusalem An nobody goin hurt um dea.”