Read Hawaii Pidgin Isaiah 15 Bible Online

Isaiah 15 - Hawaii Pidgin bible

Isaiah 15

¹Me, Isaiah, I get heavy kine stuff fo tell bout wat I see goin happen to da Moab peopo: Ony one nite, Ar town goin come wipe out! Dass how da Moab land goin come all bus up. Ony one nite, Kir town goin come wipe out too! Dass how da Moab land goin come all bus up.

²Da Moab peopo go up to dea temple, An da Dibon peopo go up da sacrifice place on top da hill, Fo cry. Cuz Nebo an Medeba stay bus up, Da Moab peopo yell plenny. Dey cut off dea hair an all dea beard Fo show dey stay sore inside.

³Inside da street, da peopo tie burmbag cloth aroun dea waist Fo show dey stay sore inside. On top da flat roof, an inside da street, Erybody stay crying an yelling plenny.

⁴Da Heshbon an Elealeh peopo stay cry. You can hear dea voice from far place, Even from Jahaz town. Dass why da army guys from Moab stay yell, But inside, dey stay scared an shaking!

⁵My heart stay cry fo da Moab peopo. Da peopo from dea run all da way to Zoar town An to Eglat-Shelishiyah. I stay cry, cuz dey go up da way fo go to Luhit, An dey still stay cry wen dey going. I stay cry, cuz on top da road to Horonaim, Da peopo stay yelling An telling bout dea place Wea eryting stay broke.

⁶I stay cry, cuz da watta from Nimrim Stay all dry up, An cuz da grass fo da animals stay getting dry, No mo green tings lef dea.

⁷Dass why, all da stuffs dey still get An da stuffs dey wen stash fo demself, Dey take wateva dey can carry Fo run away da odda side Poplar Tree Gulch.

⁸I stay cry, cuz from one side da Moab land to da odda side, Can hear da peopo crying All da way to Eglayim an Beer-Elim side.

⁹I stay cry, cuz da stream dat go by Dimon Stay full wit blood, not watta. But God still goin bring Mo bad kine stuff fo da Dimon peopo: Da Moab peopo dat run away, An da peopo dat stay dea on top da land too, Da lion goin chase um an get um.