Read Hawaii Pidgin Isaiah 16 Bible Online

Isaiah 16 - Hawaii Pidgin bible

Isaiah 16

¹You guys dat stay in charge a da Moab land, Inside Sela town, nex to da boonies, Give baby sheeps to Jerusalem, Fo gif, fo show you an dem stay da same side. Take um to Zion Hill, Jerusalem side.

²Da Moab wahines dat run away Fo go cross ova da Arnon Stream, Dey goin hang aroun dea an donno wea fo go, Jalike wen somebody throw da baby birds outa dea nest.

³Dey like tell da Judah leada guys: “Make like one judge An tell us guys wat fo do! Noon time, wen da sun stay high, Make yoa shadow dark jalike nite time, Fo hide us guys dat stay run away, An no let nobody know wea we stay!

⁴Let us Moab peopo dat no mo place fo stay Make house wit you guys. Be da place so us guys can hide dea So da guys dat like wipe us out no can find us!” Cuz bumbye, no goin get da guys dat bus up you guys inside yoa land. Dat all goin pau.

⁵Dat time, goin get one new king Dat goin stay tight wit his peopo. Dat king, goin come from King David's ohana, An da peopo goin trus him. He goin be da judge, An he goin work hard fo judge erybody da right way. He no goin wase time notting Fo make shua eryting dat happen, stay right.

⁶We wen hear dat da Moab peopo get real big head. Dey plenny high nose. Dey go any place dey like. But all dea big kine talk, Az not true, an no mean notting!

⁷Auwe! Ass why da Moab peopo Cry an yell togedda fo dea country. Dey make noise an cry, Cuz no mo da raisin candy from Kir-Hereset. Ony get bus up peopo ova dea.

⁸Da grape fields Heshbon side An da grape plants Sibmah side Stay all dry up. Da leadas a da diffren countries Wen tell dea army guys Fo go smash down da red grape plant. Befo time, had grape farm all da way to Jazer, An da shoots from da vine go [out] all ova da place, To da boonies an all da way down To da odda side a da sea.

⁹Dass why I stay cry plenny Da same way da Jazer peopo cry Fo da grape plants Sibmah side. I cry mo plenny Fo da Heshbon an Elealeh peopo. Befo time, wen da Moab peopo bring dea summer fruit An cut da wheat, Erybody yell plenny, Cuz dey feel good inside. But now, da peopo no yell dat way no moa Cuz no mo notting fo cut.

¹⁰Nobody stay feel good inside Nobody dance an sing Inside da farms an fields, Cuz no mo grapes fo make wine. I make um so no mo party ova dea.

¹¹Dass why I stay cry inside fo da Moab peopo Eryting inside me stay crying, Jalike one sad song you play wit da harp. How I tink an how I feel, I feel real sore inside fo da Kir-Hareset peopo.

¹²Bumbye, no matta da Moab peopo go up Da sacrifice places fo dea gods on top da hills, An no matta dey work plenny hard an stay tired Fo go pray inside da temple dat stay spesho fo dea gods, All dat, no goin do notting fo dem!

¹³Dass wat Yahweh tell bout da Moab peopo long time ago.

¹⁴An now Yahweh tell dis too: “Da Moab peopo, get choke plenny a dem, an dey awesome. But ony three year from today, jalike da day one work contrack pau, nobody goin tink da Moab peopo stay awesome. Cuz dat time, ony goin get litto bit Moab peopo inside dea. All da odda Moab peopo, gone awready! Da ones dat stay back, dey no can do notting, cuz dey no mo powa.”