Read Hawaii Pidgin Isaiah 18 Bible Online

Isaiah 18 - Hawaii Pidgin bible

Isaiah 18

¹Auwe! fo da peopo inside da land Wea da bugs stay dat make noise wit dea wings all da time, Da land mo far from hea den Sudan, Wea da big rivas come togedda.

²Dea govmen send dea messenja guys on top da watta. Dey go inside da kine boat dey make wit papyrus kine reed, Eh, you messenja guys! Go fast to dat odda country far away. To da peopo ova dea, Da tall guys wit smooth skin, Erybody scared dem. Den go from dea, go even mo far still yet. Get one real strong peopo ova dea Dat stay bus up erybody, Ova dea wea da big rivas cut thru dea land.

³God tell dis: “All you peopo dat stay live inside da world, Wen I put up my war flag on top da mountains, You goin see um. An wen da horn make noise, You goin hear um.”

⁴Dis da ting Yahweh tell me: “I goin look down from wea I stay, But I goin stay quiet, Jalike da hot air look like stay move wit da light, But no mo noise notting, An jalike da watta dat stay on top da grass make one cloud Wen come real hot wen dey cutting da plants, But stay quiet.’

⁵Jalike befo dey cut da food, Wen no mo flower awready An da grape start fo come ripe litto bit, God goin cut off da small branch dat no mo grape Jalike he use da pruning shear, Den he throw um away,

⁶Eh, I talking bout Assyria, you know! All dea army guys goin mahke an dea bodies stay dea, Jalike God wen prune um. All thru da summa time, da scavenja birds from da mountains goin eat dea bodies, An all thru da winta time, da wild animals goin eat um.

⁷Dat time, peopo goin bring gifs Fo Yahweh, Da God Ova All Da Armies. An who goin bring da gifs? Fo shua, dose same peopo from far place, Da tall guys dat get smooth skin, Dat erybody scared dem. An from da land even mo far still yet, Da real strong kine peopo ova dea Dat stay bus up erybody, Ova dea wea da big rivas cut thru dea land. Dey da ones goin bring gifs to Jerusalem town fo him, cuz dass da place fo find out wat kine God Yahweh.