Read Hawaii Pidgin Isaiah 2 Bible Online

Isaiah 2 - Hawaii Pidgin bible

Isaiah 2

¹Dis wat Yahweh Da Boss wen show Isaiah, Amoz boy, bout da peopo inside Judah an Jerusalem:

²Bumbye, wen da world almos goin pau, God goin make da hill wea da Temple Fo Yahweh stay Come da mos importan place in da whole world, Mo importan den da odda hills. Den all da peopo from odda countries Goin stay come dea.

³Den plenny peopos goin go dea an say, “Come on. We go up da hill wea da Temple stay, Da Temple Fo Yahweh, Jacob's God. He goin teach us guys wat he like us fo do, An we goin do um.” Wat Yahweh teach goin come from him, From da Zion Hill inside Jerusalem town.

⁴Wen diffren countries tink diffren kine bout someting, Yahweh goin be da judge dat tell who a dem stay right. He goin tell wat peopos stay right An wat peopos stay wrong. Den dey goin take dea swords, An make um come plows. Dey goin take dea spears, An make um come knife fo prune da plants. Dat time, no country goin fight agains anodda country no moa. Dey no even goin know how fo fight an make war no moa.

⁵You peopo inside Jacob's ohana, Come. Us go walk Wit light from Yahweh, an do wass right.

⁶Cuz Yahweh, you wen leave yoa peopo awready, Da Jacob ohana peopo. Dey lissen to da odda peopo from da east side, Babylon side, So now dey even go call da spirit from da mahke peopo Fo come tell um wat goin happen bumbye, Jalike da Filisha peopo stay do. Yoa peopo stay make deal wit da odda peopos Dat donno you.

⁷All ova da Israel peopo land, Get plenny silva an gold An mo plenny rich kine stuffs den can count. All ova da land, get plenny horse An mo plenny war wagons den can count.

⁸An all ova dea land, get plenny idol kine gods. Dey go down an show respeck Fo all da stuff dey make wit dea own hands.

⁹But now, erybody goin come shame. Dey no goin get big head no moa. Eh Yahweh! No let go dat kine peopo!

¹⁰You Jacob ohana peopo, Go down deep inside da rocks, Hide yoaself inside da groun, Cuz you stay scared an shaking From all da stuff Yahweh goin do Cuz he da awesome King!

¹¹Anybody dat get real high nose, Dey goin come shame. Anybody stay real high makamaka, Dey goin come notting. Dat time, Yahweh da ony One Da peopo goin talk good bout.

¹²Yahweh, he da God Ova All Da Armies. Goin come one day, he goin go Agains erybody dat get big head, An agains all da high makamaka peopo. God goin bring down da kine peopo dat tink dey importan. He goin make all dat kine peopo come notting.

¹³No matta da peopo tink dey importan Jalike da tall cedar trees inside Lebanon An da oak trees inside Bashan, Dey goin fall down.

¹⁴If dey tink dey tall Jalike da tall mountains an hills,

¹⁵An da tall towers, An da strong walls nobody can bus up, Yahweh can bus um up.

¹⁶If peopo tink dey strong like da big boats dat go Spain, Da nice looking boats, Yahweh can sink um.

¹⁷Anybody stay get real high nose, Dey goin come notting. Anybody stay real high makamaka, Dey goin come shame. Dat time, Yahweh da ony One Da peopo goin talk good bout.

¹⁸Da idol kine gods, God goin broke um down.

¹⁹Peopo goin go inside caves inside da big rocks, An inside da big kine pukas undeaneat da groun, Cuz dey real scared Yahweh. He stay awesome cuz he da king, An he goin start fo shake up erybody inside da world.

²⁰Dat time, da idol kine gods Dat da peopo wen make from da silva an gold Fo go down and show um respeck, Dey goin throw um all away To da bats an da rats.

²¹Dey goin go inside da cracks in da rocks An da pukas in da pali, Cuz dey real scared Yahweh. He stay awesome cuz he da king, An he goin start fo shake up erybody inside da world.

²²No trus da peopo! Da ones dat stay breave da air an stay alive, But wat you can trus dem fo do fo you, aah?! Notting!