Read Hawaii Pidgin Isaiah 20 Bible Online

Isaiah 20 - Hawaii Pidgin bible

Isaiah 20

¹Was da year King Sargon from Assyria wen send one a da main general guys wit his army guys fo go agains Ashdod town inside Judah an take ova da town.

²Dat time, Yahweh wen tell me, Isaiah, Amoz boy, fo talk fo him. He tell me, “Hemo da burmbag cloth from yoa body, an take off da slippa from yoa feets.” So I do dat. I take um off an go naked an barefeet.

³Lata, Yahweh tell, “Wat my worka guy Isaiah wen do, go naked an barefeet fo three year, az jalike one sign fo [blow da peopo mind, bout / show da peopo] wat goin happen to da Egypt peopo an da Sudan peopo.

⁴So da king fo Assyria goin take da prisonas from Egypt an Sudan go outa dea country naked an barefeet. No matta dey young o old, dea okole an dea private goin be naked, an dat goin make da Egypt peopo shame.

⁵Da Judah peopo dat wen trus da Sudan peopo an talk big bout da Egypt peopo, dey goin lose fight an come shame too.

⁶Dat time, da peopo dat stay live hea nea da Judah coast, dey goin tell, “Eh, us guys wen trus dose Egypt an Sudan peopo! Us wen run away an go by dem, fo help us fo get outa da trouble da Assyria king like bring us. If dat wen come to dem, den how us guys goin get outa dis bad kine stuff?! [No way!]”