Read Hawaii Pidgin Isaiah 21 Bible Online

Isaiah 21 - Hawaii Pidgin bible

Isaiah 21

¹Get heavy kine stuff fo tell too, bout wat goin happen to da Babylon land, Da Boonies By Da Sea: “One army go come agains Babylon, From one land wea da peopo real tough An erybody stay scared a dem! Dey goin go quick thru da Babylon land, Jalike da kine big storm wind dat blow hard Outa da boonies an go thru da south part a Judah.”

²God wen show me stuff Dat make me real bum out jalike one bad dream: “Jalike da guy dat like set up his bruddas, He goin do um. Da guy dat like bus up eryting, He goin bus um up. Da Babylon guys goin make plenny peopo suffa an moan, But I goin make da Babylon guys stop all dat! You Elam army guys, go afta Babylon town! You Media army guys, make camp all aroun Babylon too, So nobody can go inside dea o come outside!”

³Wen I hear dis, I come plenny sore inside An I move my body. Da pain stay grab me, Jalike wen one wahine start fo born one bebe. I stay all mix up an no can tink, Cuz a wat I wen hear. Bodda me plenny an scare me, Wat I wen see.

⁴I no can tink good! I stay shake cuz I real scared! I wait fo da light come litto bit, But now da light come, I stay scared even mo plenny!

⁵Eh, you Babylon leada guys! Make da table ready fo one lu`au! Lay down da mats! Eat an drink! But look! Make shua yoa shields stay ready! Cuz you goin fight, right now!

⁶Dis, az wat God my boss tell me: “Go put one watcha guy outside Fo tell us wat he see.

⁷If he see war wagons An plenny horse wit um, Guys riding on top donkeys, An on top camels, Den he gotta look real good, An lissen!”

⁸Den da watcha guy talk loud, Jalike one lion: “Eh boss, ery day I stay on top hea Looking all da time, Ery nite I stay hea stand, all nite.

⁹An now, look! Get one guy inside one war wagon coming, Wit two horse pulling um.” Den somebody tell, “Babylon town, stay all bus up! All da idol kine gods fo Babylon, Stay all smash an all on top da groun!”

¹⁰God tell, “Auwe! My Israel peopo, You poor guys stay all bus up, Jalike wen dey smash da wheat on top da groun Fo take out da junk kine stuffs.” Dass wat I wen hear from Yahweh, Da God Ova All Da Armies, An da God fo da Israel peopo. He wen tell me all dat, fo help you guys.

¹¹Get heavy kine stuff fo tell bout Dumah, Da Edom land, wea nobody stay awready. Somebody stay yell to me From Seir Mountain, Edom side: “You dat stay watch ova dea, How much time lef dis nite? Wen da dark time goin pau?”

¹²Da watcha guy tell um, “Morning stay coming, An den da nite come. If you guys ova dea like aks, az okay. Go, den come back again an aks.”

¹³“I get heavy kine stuff fo tell bout da boonies up country da east side from Judah: You Dedan peopo, You get wagons fo carry stuffs fo sell, An you make camp nite time wea get plenny tree Inside da boonies up country.

¹⁴You peopo dat stay live inside da Tema land, Go bring watta fo da thirsty peopo, An go take food to da peopo Dat stay run away from Babylon.

¹⁵Dey wen run away From da guys dat stay chase um wit swords, An from da guys wit bow an arrow dat stay ready fo shoot um, From all da bad kine stuff you get wen get war.”

¹⁶Dis da ting God my boss tell me: “Befo pau one year, jalike one guy dat get work contrack mark how many days moa till da contrack pau, all da rich stuff inside Kedar goin pau.

¹⁷Ony goin get litto bit mo guys from da Kedar army dat know how fo fight good wit bow an arrow, dat still stay alive.” Dass wat Yahweh tell, da God fo da Israel peopo.