Read Hawaii Pidgin Isaiah 24 Bible Online

Isaiah 24 - Hawaii Pidgin bible

Isaiah 24

¹Yahweh, he stay ready fo wipe out da whole earth An make um come empty! He goin change da mountain an valley An all da peopo goin go all ova da place.

²Goin be same same fo all a dem, Da pries guys an da regula peopo, Da slave guys an da boss guys, Da worka girl an da lady she work fo, Da guy dat buy stuff an da guy dat sell stuff, Da guy dat lend stuff an da guy dat borrow, Da loan shark guys an da guys dey wen lend um.

³All ova da world, no goin get notting inside dea, Jalike somebody wen go rip off eryting! Dis wat Yahweh tell.

⁴Da earth, jalike stay sore inside, an all dry up. Ery place peopo live, jalike dey stay tired, an all dry up. Da big name peopo, jalike dey all tired too.

⁵Da whole world, Jalike stay pilau awready Cuz a da peopo dat live dea. Az cuz dey no do da stuff God wen teach um, An broke da Rules, Da deal God wen make wit dem foeva.

⁶Dass why God put kahuna on top da earth Fo burn up eryting. All da peopo dat live dea, Dey gotta suffa cuz dey wen do wrong. Dass why, from da ones dat live on top da earth, Ony litto bit peopo stay now.

⁷Da grape plant no grow nice, Da juice from da grape fo make wine, look funny kine. Da kine peopo dat like party an feel good, Dey stay moan.

⁸Good fun, da tambourine, but now no mo noise. Da noise from da party guys, all gone. Good fun, da guitar, but dat stay pau too.

⁹Nobody drink wine an sing no moa. Wen dey drink beer, taste bad.

¹⁰Da big town stay all bus up, No mo notting inside dea. All da door fo ery house stay shut So nobody can come inside.

¹¹Da peopo stay yell on da street, Cuz no mo notting fo drink. Befo time dey dance an sing plenny, But all dat pau, Jalike wen da sun go down an eryting come dark. Da army guys wen take to dea own country Eryting dat wen make da peopo dance an sing.

¹²Inside da big town, eryting stay bus up An ony rubbish dea. Even da town gate stay all smash.

¹³An dass how goin be, Right dea inside da middle a da land, Wit odda peopos all aroun dea. Ony litto bit peopo going stay, Jalike wen dey wack da olive tree wit sticks Till only litto bit olive stay on top, An jalike wen dey cut da grapes An leave litto bit grape Fo da poor peopo da no mo notting.

¹⁴Bumbye, da peopo dat still stay inside da land, Dey goin yell plenny an sing Cuz dey stay feel good inside. From da wes side nea da big sea, Da peopo goin yell Bout how awesome Yahweh stay.

¹⁵Dass why you peopo dat live eas side Wea da sun come up, Make shua da peopo dea show respeck fo Yahweh! An you guys dat live dea on top da islands, Make shua da peopo dea know wat kine God Yahweh, Da God fo us Israel peopo!

¹⁶From da mos far places on top da earth We hear peopo sing, “Da peopo dat do da right ting erytime, Dey look real good!” But me, I tell dis: “Auwe! Jalike I stay come poho! Cuz get peopo, I no trus dem. Dey tell, dey stay my side. But dey trick me Wen I wen trus dem.

¹⁷You peopo dat live on top da earth, You goin come real scared an shaking, Jalike you fall inside one deep hole, An somebody catch you in dea trap!

¹⁸Anybody run away from some scary kine noise, Dey goin fall down inside da deep hole. Anybody climb outa da deep hole, Somebody goin catch dem in da trap. Az goin be jalike da time Da big watta from inside da sky wen come down, Jalike dey wen open da sky fo let da watta come down, An jalike undaneat da earth, da foundation stay shake!

¹⁹Da earth stay all bus up. Da earth stay all crack. Da earth stay shake plenny.

²⁰Da earth move dis way an dat way Jalike one guy dat drink plenny An jalike one shack ready fo fall down. Da peopo all ova da world stay go agains God, Dass someting real bad fo dem Dat make um fall down, An dey no can get up no moa.

²¹Dat time, Yahweh goin punish All da bad angel army guys inside da sky dat get powa dea. An da kings on top da earth dat get powa dea.

²²He goin bring dem togedda An put um inside one jail, Jalike dey prisonas all tie up inside one hole. He goin lock dem up dea, jalike inside one jail. Afta long time, den he goin punish dem.

²³Den da bright moon no need shine, Cuz no need da light. An da hot sun no need shine, Cuz no need um fo stay warm. Az cuz dat time, Yahweh Da God Ova All Da Armies goin be da king On top Zion hill wea da Temple stay Inside Jerusalem town. In front da older guys dat lead his peopo He goin show how awesome he stay.