Read Hawaii Pidgin Isaiah 25 Bible Online

Isaiah 25 - Hawaii Pidgin bible

Isaiah 25

¹Yahweh, you my God! I goin tell, dat you da greates, I goin tell peopo I know wat good kine God you! Cuz you wen do awesome kine tings Wen you make plan from long time befo, An us guys can trus you fo dat, An we know you tell da truth.

²I goin tell, dat you da greates, Cuz get big towns dat you bus up An make um come one pile rubbish. Get strong towns wea da army guys no can come inside, You make um all fall down. Da place inside odda countries Wea da peopo build palace, No even get one mo town dea now. No way dey goin build um up one mo time.

³Dass why goin get strong peopos Dat show respeck fo you, Yahweh. Peopo from da big towns dat stay real mean, Dey goin stay scared a you.

⁴I goin tell dat you da greates, Yahweh, Cuz you give place Fo da peopo dat no mo notting, fo hide. You, one place fo da peopo Dat need rest an help wen dey get trouble. One place fo go inside From da big rain an da hot sun, Cuz wen da mean guys go afta peopo, Feel jalike wen da hard, cold rain Hit agains one wall,

⁵Wen da army guys from odda place make big noise, Our peopo feel real dry, Jalike dey stay on top one land wea no mo watta, An stay all dry, an da sun hot. But you make all dat stop. You no let dose mean guys sing no moa, Jalike wen da clouds come an make shade.

⁶On top dis mountain, Jerusalem side, Yahweh, Da God Ova All Da Armies, He goin make one big lu`au fo all da diffren peopos. Goin get da bestes kine food, All da bestes kine wine An good kine meat wit plenny good stuff inside da bone, Ol kine wine dat no mo junks awready.

⁷An on top dis mountain too, Yahweh goin do dis Fo all da diffren peopos inside all da countries: He goin take away da sore dey get inside dea heart, An make um know wass fo real. Cuz still yet, jalike dey all get cova ova dea head, An Yahweh goin take away dat cova.

⁸My boss Yahweh stay make peopo So dey no goin mahke no moa, eva. Dey all stay cry now, But he goin wipe off da tear from dea face. Da peopo dat get Yahweh fo dea God, Dey all shame now, all ova da world, Cuz dey wen do bad kine stuff. But he goin take away all dat shame. Dass wat Yahweh tell.

⁹Dat time, peopo goin tell, “Eh! Dis, oua God, fo shua! We wen trus him, An he wen get us outa trouble! Dis Yahweh, da One we trus. Now, us guys can dance an sing, An stay feel real good inside Cuz he wen do dat.

¹⁰An on top dis same mountain, Jerusalem side, Yahweh goin use his powa dea. But da Moab peopo, Odda peopo goin walk all ova dem, Jalike wen dey make someting fo burn fire, Firs dey throw da kukae from da animals An straw from da wheat, an watta inside one hole, Den dey step um down good fo mix da mud.

¹¹Da Moab peopo goin push wit dea hands inside dea Fo stay on top da kukae, Jalike one guy push da watta fo swim. Dey get big head, But God goin make dem come notting, No matta wat dey do wit dea hands.

¹²God goin broke down da strong walls Fo da place wea da Moab peopo like go hide. He goin make da wall fall down to da groun, On top da dirt.