Read Hawaii Pidgin Isaiah 3 Bible Online

Isaiah 3 - Hawaii Pidgin bible

Isaiah 3

¹Den Isaiah tell, “Look! Yahweh, Da God Ova All Da Armies, He goin take away all da stuff From da peopo inside Jerusalem an Judah, All da stuff dey need fo take care dem, All da food fo eat an da watta fo drink.

²He goin wipe out all da real spesho army guys an da regula army guys, All da judges an da guys dat talk fo God, All da guys dat can tell wass goin happen bumbye, All da olda leadas,

³All da army captains, All da odda kine importan peopo, All da akamai guys dat tell da peopo wat fo do, All da guys dat get da smarts fo make real nice tings wit dea hands, An all da guys dat undastan how fo make kahuna kine chants.

⁴He goin take young kine boys an make um dea leadas. Peopo dat stay make any kine, dey goin take charge a dem.

⁵Da peopo goin give each odda hard time, Friend agains friend. Da young guys goin make any kine to da ol guys Jalike dey own dem an dey hate dem. Da guys dat erybody get respeck fo, Da no good guys goin bus um up.

⁶One guy goin grab one a his bruddas From inside dea fadda house An say, ‘Come on, you get one robe, So you be our leada, You take care all dis trouble!’

⁷But dat time, da brudda goin yell, ‘I no can take care all dis trouble! I no mo food an clotheses inside my house. No make me da leada fo all dis peopo.’

⁸You know, da peopo inside Jerusalem, Jalike dey no can walk strait. Da peopo inside Judah, Jalike dey stay fall down too. Cuz wit wat dey say, An wit wat dey do, Dey talk stink Yahweh An go agains him. Dey tink he no good, no matta he awesome.

⁹Da way dea face look, Show dey no stay do da right kine ting. Dey talk big bout da bad kine stuff dey do, Jalike da peopo inside Sodom. Dey no try hide um. Auwe! Dey da one dat hurt demself mo worsa.

¹⁰Tell da guys dat do da right kine stuff, Dat eryting goin come out good fo dem. Cuz dey goin get wat dey work fo, Wit da good kine stuff dey make.

¹¹Auwe! fo da guys dat do bad kine stuff, Cuz eryting goin come out bad fo dem! Jalike wat dey do, Dass wat dey goin get.

¹²Da ones dat give my peopo presha, Dey stay ack jalike dey young kids. My peopo get wahines in charge a dem. Lissen, my peopo, Da ones dat tell you guys wea fo go, Dey stay take you guys da wrong way. Dey stay mess up you guys plenny, So you donno wea da right way fo go.

¹³But Yahweh, he go in front da court fo make argue. He stand up fo judge da peopo.

¹⁴Yahweh da One goin judge da older leadas An da odda ones dat stay lead his peopo. He tell dem, “You, jalike da guys Dat wen bus up my grape fields. All da stuff you guys wen rip off From da peopo dat no mo notting, All dat stuff you guys take um Inside yoa houses.

¹⁵Wat you guys tinking Wen you go smash my peopo, aah?! Da peopo dat no mo notting, How come you go rub dea face inside da dirt, aah?!” Yahweh, Da God Ova All Da Armies, Dass wat he tell.

¹⁶One nodda time, Yahweh tell dis: “Cuz da wahines inside Jerusalem, Dey ack high nose, Dey walk an hold up dea neck sexy kine. Dey check out guys wit dea eye. Dey walk jalike dey fashion models. Dey wear jangly kine jewel on top dea feets an ankles.

¹⁷I goin put sore all ova dea head. I goin make all da Jerusalem wahines come bolohead.”

¹⁸Den Isaiah tell, “Dat time, my Boss goin grab All da fancy kine stuff dey get And throw um away, All da jangly kine jewel on top dea feets an ankles An da bands fo put aroun dea heads, An dea moon kine necklaces,

¹⁹An dea earrings an bracelets, An da nice kine cloth fo cova dea face,

²⁰Da crowns on top dea head, An da nice kine chain fo dea ankle, An da fancy kine cloth fo tie aroun dea waist, Da perfume bottles, Da jewel fo make da bad kine spirits go way,

²¹An da rings fo dea fingas an dea nose,

²²Da fancy kine clotheses, coats, da purses,

²³Da mirrors, da linen undawears, Da fancy kine cloth on top dea head, an da stoles/shawls.

²⁴Now dey get perfume, But den dey smell bad. Now dey get one fancy kine cloth aroun da waist, But lata dey goin get ony one rope. Now dey get nice style hair, But den dey goin come bolohead. Now dey get fancy kine clotheses, But den dey get ony burmbag clotheses. Now dey nice looking, But den dey get burn scar all ova dem.

²⁵Yoa army guys, dey goin mahke from da sword wen dey fighting Even yoa real strong guys goin mahke in da war.

²⁶Inside da gates a Jerusalem town, Da wahines goin sit down on top da groun, An cry an stay sore inside cuz no mo dea guys.