Read Hawaii Pidgin Isaiah 30 Bible Online

Isaiah 30 - Hawaii Pidgin bible

Isaiah 30

¹Dis, one message from Yahweh: “Auwe! to da hard head peopo Dat stay go agains me! Dey make plan an do um, But da plan, not from me. Dey make deal wit peopo from odda country, But my Spirit neva tell dem fo do dat. Dey do one bad ting, Den anodda mo worsa ting.

²Befo dey go Egypt side, Dey neva aks me firs bout dat. Dey aks da Pharaoh guy fo help dem An let dem stay wit him So notting goin hurt dem.

³But if you tink Pharaoh da one goin help you guys, He no can! If you tink da Egypt peopo goin let you guys stay wit dem So notting goin hurt you, Dey still no can, An you goin come shame too!

⁴No matta da Pharaoh guy Get army officer guys north side inside Zoan, An no matta he send messenja guys south side by Hanes,

⁵Erybody dat aks da Pharaoh guy fo help dem Goin come shame. Cuz da Egypt peopo no can do notting good fo dem. Dey no goin help dem, Dey no goin do notting good fo dem. Dey ony goin make da Judah shame An make fun a dem!”

⁶I get real bad stuff fo tell bout wat I see goin happen wit da animals peopo (use fo cross da boonies in da Negev, from Judah to Egypt: “Da Judah peopo going thru da Negev land Wea erybody get hard time An suffa plenny. Get plenny lions ova dea. Get all kine snake dat can kill you, An da kine snake dat you no see um an come out bite you An make you feel jalike you burning up. Da Judah peopo take dea rich stuffs dea On top donkeys an camels, Fo pay da Egypt peopo fo help dem. But da Egypt peopo no goin do notting good fo dem!

⁷Da Egypt peopo, even if dey try kokua da Judah peopo No goin help da Judah peopo notting. Az why I call da Egypt peopo, ‘Da proud fake crocodile Dat ony make plenny noise!’

⁸“Now go. Write um fo dem, wat I jus wen tell you On top one flat board, So goin stay. Den da peopo goin know bumbye an foeva Wat I stay tell you now.

⁹Go do dat, cuz dis peopo, Dey hard head, Ony like go agains Yahweh. Dey jalike kids dat stay bulai erybody. Yahweh stay teach dem plenny, But dey no like lissen.

¹⁰Dey tell da guys dat can see Wass goin come bumbye, jalike one dream, Fo no see stuff wen you dream! Dey tell da guys dat talk fo God, “No tell us wat God say Bout wat stay right! Tell us ony da kine stuff dat make us feel good inside. Tell us dat God wen say all nice kine stuff, No matta az not true!

¹¹Go find anodda way fo how you talk! Go pick one diffren road! No tell us we gotta come in front God, Da One dat stay good an spesho fo da Israel peopo!”

¹²Dass why Da One dat stay good an spesho fo da Israel peopo tell dis: “You guys, you ack Jalike dis stuff I stay tell, no good! An you guys stay shua Dat you goin come out okay, If you make hard time fo peopo An bulai dem! Az how you guys tink.

¹³An cuz you make lidat, Dis how goin be wen I punish you guys. Jalike wen get one high wall wit one small crack, An da crack come mo big, An da wall by da crack push out, An bang! da whole ting come out.

¹⁴Da wall goin broke jalike one clay pot. Goin all broke in small pieces, Cuz I no goin hold back notting. Da small pieces dat stay, No goin be big nuff fo take hot coal from da fire, O even fo get watta from da watta place.”

¹⁵But dis message come from my boss Yahweh too, Da One dat stay good an spesho fo da Israel peopo: “Az fo how you guys get outa trouble, You gotta come back my side, So den you can get res inside. Fo you guys come strong inside, You gotta stay quiet an trus me.” But you guys still no like lissen!

¹⁶Dass how come you guys wen tell, “No way! We goin ride horse an run away!” So den, you guys goin run away! You guys wen tell, “We goin ride horse dat run real fas!” But da guys dat come chase you guys, Dey get fast horse too.

¹⁷One tousand a you guys goin run away Wen one a dea guys tell dat he goin hurt um. An if five a dea guys tell dat dey goin hurt you guys, All da res a you guys goin run away, Till you da ony one stay dea. Goin be jalike one pos Dat stand alone on top one mountain, Jalike one flag on top da hill.”

¹⁸Dass how come Yahweh stay wait, Cuz he stay ready fo do good tings fo you guys. He goin stand up Fo show you guys pity an love. Cuz Yahweh, he da kine God Dat judge da right way erytime. An all da peopo dat stay wait fo him, Dey can stay good inside.

¹⁹Cuz you peopo dat live inside Jerusalem town, You no goin cry no moa. Wen you guys yell to Yahweh fo help you, He goin do um. Fo shua he goin do good tings fo you. He goin hear you guys, An right den an dea he goin help you.

²⁰My Boss goin give you guys hard time, Jalike he give you guys Ony bread fo eat an watta fo drink. But den, da guys dat stay teach you, Dey no goin hide from you guys no moa. You goin can see dem wit yoa own eye.

²¹Den, even if you go da wrong way, Jalike you leave da road An go da right side o da lef side, You goin hear somebody behind you tell, “Eh! Da right way, stay ova hea! Go dat way!”

²²Den you guys goin make pilau yoa idol kine gods, Even da kine dat get silva an gold all ova. You goin throw um away Jalike one pilau kine rag. You goin tell da idol kine gods, “Get away from hea!”

²³Yahweh goin send rain Fo da seeds you guys goin plant inside da groun. Da food dat da groun bring up From da seeds you guys plant Goin be good kine, an goin get plenny. Dat time yoa cows goin get plenny fo eat Inside da big field.

²⁴Da cows an donkeys dat plow da ground Goin eat spesho kine cow food Dat you guys make, An get salt inside, An no mo junks in um Cuz da peopo use shovel an pitchfork Fo throw um up in da air An let da wind clean um.

²⁵But befo dat happen, Plenny peopo goin mahke, An da high towers goin fall down! Lata, goin get plenny watta fall down From da high mountains an hills. An fill da stream an da watta ditch.

²⁶Da moon goin shine strong, Jalike da sun. An da light from da sun goin come Seven times mo bright den befo, Jalike you get all da light from seven days, In one day! Az how goin happen Afta Yahweh wack his peopo. Den, Yahweh goin fix um Ery place da bone stay broke, An he goin bandage Da cut he wen give dem.

²⁷Look! You know wat kine God Yahweh! Now he come from far place. He stay real huhu, Jalike he burning, An plenny smoke coming outa him! Da ony ting he talk bout, Wat da guys dat stay agains him stay do, He no goin take dat. Wen he talk, jalike wat he tell, Goin burn eryting up.

²⁸Wen he breathe, jalike one river Dat run fas, Dat no can stay inside da stream, But reach up to da peopo's neck. He shake da peopo inside diffren countries Jalike dey stay inside one strainer, An dey no can do notting. Jalike he put one bridle inside dea mout Dat make da diffren peopos go da wrong way.

²⁹But you Judah guys goin sing, Jalike you sing Da nite you make yoaself spesho fo God Befo one spesho religious time. You goin stay feel real good inside Jalike wen peopo play flute An go up da hill wea Yahweh stay. He jalike one solid Rock fo da Israel peopo.

³⁰Yahweh goin make peopo hear his awesome voice, An see his arm come down, Jalike az his powa. Cuz he stay huhu, Jalike da fire stay burn up eryting, An strong wind an rain An ice fall down from da sky jalike rocks.

³¹Wen Yahweh start fo yell, He goin make da Assyria army guys lose fight. Jalike he use his big stick fo hit dem.

³²Ery time Yahweh hit da Assyria guys Wit da stick he use fo punish dem, Da Judah peopo goin play music Wit tambourine an guitar, Wen Yahweh stay fight dem Wit his strong power.

³³Da place outside Jerusalem Wea da peopo dat donno God Burn up dea own kids Fo make sacrifice fo dea idol kine gods, From long time, jalike dat place stay ready Fo burn up da Assyria king. Somebody wen make da burning place Real deep an real wide. Get plenny fire An plenny wood all pile up dea. Wen Yahweh blow on top um, Make um start fo burn, Jalike one lava riva from inside one volcano Make da wood pile burn.