Read Hawaii Pidgin Isaiah 31 Bible Online

Isaiah 31 - Hawaii Pidgin bible

Isaiah 31

¹Auwe! fo da peopo dat go Egypt side Fo get help erytime! Dey stay shua dey goin come okay If dey buy plenny horse dea. Dey trus da war wagons, cuz dey get plenny, An plenny guys fo ride horse. But dey no go to Yahweh, Da Good an Spesho One fo da Israel peopo. Dey no aks him wat fo do.

²But no matta wat da guys tink, Yahweh know wat fo do erytime, An he can make bad tings happen too. Wen Yahweh tell someting, He no need change his mind bumbye. He goin go agains da ohanas dat do bad kine stuff. An agains da peopo dat help dem.

³Still yet, da Egypt guys, dey ony peopo. Dey not God. Dea horses, dey ony animals, Dey not spirits. Wen Yahweh put up his hand fo bus um up, Da guys dat help dem, Jalike dey goin trip. An da guys dey help, Jalike dey goin fall down. All a dem goin wipe out togedda.

⁴Dis da ting Yahweh tell me: “Jalike how da lion make noise Wen he catch one sheep, An jalike peopo call plenny sheep farma guys Fo come help dem catch da lion, But da lion, he no scared dem. He no care dat dey stay yelling, No bodda him dey make big noise. Same ting, wen Yahweh, Da God Ova All Da Armies, come, He goin come down an fight, An no scared, jalike da lion, On top da hill wea da Temple stay.

⁵Jalike wen da mudda birds stay fly ova da nes So notting hurt da bebe birds, Same ting wit Yahweh Da God Ova All Da Armies, He no goin let notting hurt da Jerusalem peopo. He goin take care dem An get dem outa trouble. He goin pass ova dem jalike Moses time, An save dem.”

⁶You Israel peopo, go back to Yahweh! You wen go agains him, real bad.

⁷Cuz wen you go back, all you guys goin go agains da idol kine gods dat you guys wen make wit yoa own hands outa silva an gold. Az was bad, you wen do dat!

⁸God goin use one sword dat peopo neva make Dat goin kill da Assyria guys. He goin use one sword dat neva come from dis world An dat goin wipe um out. Da Assyria army guys goin run away from dat sword. Odda peopo goin take dea young guys away An make um work fo dem.

⁹Da big rock wea da Assyria guys like hide, Dey goin run pass um Cuz dey plenny scared. Wen dea officer guys see Yahweh's flag fo war, Dey goin come scared an lose fight.” Dis word come strait from Yahweh: Wea can see da light from his fire Inside da Temple on top Mount Zion. Can see wea he burn up his rubbish Inside Jerusalem town.