Read Hawaii Pidgin Isaiah 32 Bible Online

Isaiah 32 - Hawaii Pidgin bible

Isaiah 32

¹Look! Fo make shua eryting stay right, Goin get da king stay in charge. An goin get odda leada guys, Dat goin judge da right way too.

²Da king, goin be da kine guy Dat goin be jalike one place Fo da peopo hide From da strong wind o da rain, So no can hit um. He goin help da peopo fo res, Jalike one watta ditch inside one dry place, An jalike one big rock Dat make one big shadow In da place wea no mo watta.

³Dat time, da peopo dat can see, Dea eyes no goin stay shut. An da peopo dat can hear, Dey goin lissen good.

⁴Da guys dat talk befo dey tink, Dey goin know an undastan stuff. Da guys dat no can talk good, Dey no goin take long time fo talk, An goin come out good wat dey tell.

⁵Dat time, da stupid kine guys Dat ack like God no matta, Nobody goin say dey get good heart Fo help peopo. Da guys dat fool erybody, Nobody goin get respeck fo dem.

⁶Cuz da stupid kine guys Dat ack like God no matta, Dey talk stupid kine stuff. Dey tink plenny bout how fo make trouble. Az why, wateva God like, dey no like. Az why dey teach Da wrong kine stuff bout Yahweh. Az why dey make shua Da hungry guy no get notting fo eat, An dey no let da guy dat stay thirsty Get [anyting] fo drink.

⁷Da guys dat fool erybody, Eryting dey do, stay bad. Dey make plan fo do stink kine stuff. Az how come dey bulai, So dey can wipe out Da peopo dat no mo notting, No matta da peopo dat really need stuff Even wen dey get um right in front da judge.

⁸But da guys dat get good heart fo help peopo, Dey make real kine plan fo help um. Dey stay solid, Cuz dey like do wateva fo help peopo.

⁹Eh, you wahines dat no stay worry bout notting! Stand up an lissen wat I telling you! You daughtas stay shua notting goin hurt you, Lissen wat I get fo tell you.

¹⁰In litto moa den one year, You guys dat stay shua notting goin hurt you, You goin shake an be scared. Cuz no goin get no mo grapes fo cut, An no goin get no mo fruit fo cut.

¹¹Shake an be scared You wahines dat no care bout notting. Shake an be scared You daughtas dat stay shua notting goin hurt you. Take off yoa clotheses An put burmbag cloth aroun yoa waist Fo show you stay sad an crying.

¹²Pound yoa chest an cry, all you peopo, Cuz no moa, da nice looking fields An da grape plants wit plenny fruit Dat you guys wen get befo time.

¹³Cry fo my peopo's land Dat ony get thorns an thorn bush growing! Cry fo all da house wea erybody Wen dance an sing An fo da town wea dey get plenny party befo time!

¹⁴Erybody goin go way from da palace An leave da big town Dat wen get plenny noise befo time. Da hill wit da strong wall an da towers Goin get pukas an jalike cave inside. Da wild donkeys goin like live dea Cuz no mo peopo, An da goats goin get food fo eat ova dea.

¹⁵Eryting goin stay lidat Till da Spirit from da Mos Importan One come An take charge us guys. Dat time, da place wea nobody live, Goin get fields wea plenny stuff grow. Da field wea peopo tink plenny stuff grow now, Dat time dey goin tink, Look jalike one forest.

¹⁶Da places wea nobody live, Goin get peopo dea, An judges dat judge da right way. Da field wea plenny stuff grow, Goin get peopo dea, Dat do wass right erytime.

¹⁷An cuz peopo stay do wass right, Dat goin make tings come good fo erybody. An wat happen wen dey stay do wass right, Dey goin stay quiet an trus God foeva.

¹⁸My peopo goin stay inside places Wea eryting come good fo dem. Dey goin live inside places Wea dey can stay shua notting bad goin happen, Places wea dey goin res An no need worry bout notting.

¹⁹No matta get rain wit ice Dat make all da trees fall down, An all da buildings inside da big town fall down,

²⁰Afta dat, you guys goin stay feel good inside, Wen you plant yoa seed nea ery stream An let yoa cows an donkey go all ova.