Read Hawaii Pidgin Isaiah 36 Bible Online

Isaiah 36 - Hawaii Pidgin bible

Isaiah 36

¹King Hezekiah stay king fo fourteen years, an den Sennakerib, da Assyria king, an his army guys go attack all da big towns inside Judah dat get strong walls aroun um. An dey make da peopo dea prisonas.

²Den da Assyria king Sennakerib send da territorial govna guy fo dat side, an plenny army guys, from Lakish by King Hezekiah inside Jerusalem. Da territorial govna guy stop by da ditch wea da watta from da Mauka Watta Place go, on top da main road dat go da field wea da peopo put da cloth inside da watta an step um fo make um clean.

³Eliakim, Hilkiah's boy, dat was in charge da palace, go out fo meet da territorial govna guy. Shebna da secretary guy, an Joah, Asaf's boy, da guy dat write eryting fo da records, dey go wit Eliakim.

⁴Da Assyria territorial govna guy tell dem fo go tell Hezekiah, “Dis, wat da strong Assyria king like know: Who you stay trus, aah?! Why you tink you can handle da army guys?!

⁵Dis wat I say: All yoa talk, az ony talk dat no mean notting! Fo make war, you gotta get plan an da powa fo fight. But you, no mo da plan o da powa! Cuz you stay go agains me an my army guys, wat odda country you stay trus fo help you?!

⁶Fo shua, I goin tell you who you stay trus! You trus da Egypt army fo help you. But Pharaoh, dea king, he no goin help you. He jalike one smash up bamboo dat make splinters inside yoa hand wen you go lean on top um. Dass how plenny da Pharaoh guy help erybody dat trus him!

⁷An if you guys tell me, ‘We trus our God Yahweh,’ tink bout dis: Hezekiah, he da one wen take down da sacrifice places an da altars wea you guys pray to Yahweh! Hezekiah wen tell da peopo inside Judah an Jerusalem, ‘You guys gotta go down in front Yahweh, ony in front dis Jerusalem altar,’ yeah?

⁸So now, make one bet wit my boss, da Assyria king. I give you guys 2,000 horse if you can get nuff guys fo ride on top um!

⁹How you guys tink you goin make even one small kine officer from my boss army guys turn aroun an go home, no matta you guys trus da Egypt guys fo give you war wagons an guys fo ride on top da horses?!

¹⁰An one mo ting: you guys tink I wen come fo go agains you an yoa country an wipe you guys out, an I no trus Yahweh, o wat?! No way! Was Yahweh himself dat wen tell me fo go agains yoa country an wipe you guys out!”

¹¹Den Eliakim, Shebna, an Joah tell da territorial govna guy, “Talk to us in Aramaic, yoa language, cuz we undastan um. No talk in Hebrew, our language, cuz bumbye all dose peopo dat stay sitting ova dea on top da wall goin hear.”

¹²But da territorial govna guy tell, “You tink az was ony fo you an yoa boss, dat my boss wen tell me fo tell dis stuff? No! He like tell um to all dese guys dat stay sitting ova dea on top da wall. Cuz dose peopo, jalike you, goin come hungry an like drink watta, dat dey goin eat dea own kukae an drink dea own shishi.

¹³Den da territorial govna guy stand up an yell real loud wit da Hebrew language, to da peopo on top da wall, “Lissen up, wat da big king fo Assyria tell!

¹⁴No let King Hezekiah bulai you guys! Cuz he no can get you guys outa trouble!

¹⁵No let Hezekiah tell you guys fo trus Yahweh! Cuz he goin tell you guys, ‘Fo shua, Yahweh goin get us guys outa trouble. He no goin let da Assyria king take ova dis town.’

¹⁶“No lissen Hezekiah! Dis wat da Assyria king tell: ‘Make deal wit me fo no fight! Open da gate an come outside da town! Den all you guys goin eat grape from yoa own garden an fruit from yoa own fig tree, an drink watta from yoa own watta place.

¹⁷Den bumbye, I goin come take you guys to one nodda land jalike yoa own land, one place wit plenny wheat an good wine, an plenny food an grape plants.’

¹⁸“No let Hezekiah bulai you guys an tell, ‘Yahweh goin get us guys outa trouble.’ You tink da gods fo da odda countries wen get dea peopo outa trouble wen da Assyria king wen take ova dem?! No way!

¹⁹Wat wen happen wit da gods fo Hamath, Arpad, an Sefarvaim?! You tink da Samaria gods wen help da Samaria peopo wen I wen take ova dem?! Dey no can.

²⁰You tink dat get even one god from all dose countries dat wen get dea peopo outa trouble wen I go agains dem?! Nah! So, how you tink yoa God Yahweh goin get you guys outa trouble wen I go take ova Jerusalem town?! No can!”

²¹But da three guys stay no tell da Assyria guy notting, cuz King Hezekiah wen tell dem befo time, “Ony lissen an no talk back to him.”

²²Den Eliakim, Hilkiah's boy, dat stay in charge da palace, Shebna, da secretary guy, an Joah, Asaf's boy, dat write da records, dey go back by Hezekiah. Dey rip dea clotheses fo show dey sore inside, an tell him wat da territorial govna guy wen tell.