Read Hawaii Pidgin Isaiah 37 Bible Online

Isaiah 37 - Hawaii Pidgin bible

Isaiah 37

¹Wen King Hezekiah hear wat da Assyria guy tell dem, he come real sore inside. He go broke his clotheses, an put on burmbag kine cloth fo show how he feel. Den he go inside da Temple.

²He tell Eliakim, da guy dat stay in charge da palace, Shebna, da secretary guy, an da older pries guys fo put on burmbag cloth an go by Isaiah, Amoz boy, da one dat talk fo God.

³Dey tell Isaiah, “Dis wat King Hezekiah tell: ‘Dis one day all us feel all bum out. God stay show dat us guys wen do wrong, an make us shame. Us stay jalike wen one bebe goin born, but da mudda not strong nuff fo born um.

⁴Maybe yoa God Yahweh wen hear wat da territorial govna guy say, an goin do someting. Cuz da govna guy boss, da Assyria king, wen send da govna ova hea fo talk stink bout Yahweh, da God dat stay alive fo real kine. Da tings dat yoa God Yahweh wen hear dat guy tell, maybe God goin show proof dat dey wrong. Az why you gotta pray fo da peopo dat still yet goin stay alive afta dey do wateva dey goin do.’-”

⁵Afta King Hezekiah helpa guys come by Isaiah,

⁶Isaiah tell dem, “Go tell yoa boss dis, da ting Yahweh tell me awready: ‘No scared cuz a all wat you wen hear, all dat stink stuff da slave guys fo da Assyria king stay tell.

⁷Dis wat I goin do: I goin put one spirit inside da Assyria king fo make um tink how I like. He goin hear wat somebody tell him, an cuz a dat, he goin go back his own country. Den bumbye, I goin make somebody kill um wit one sword, inside his own land.’-”

⁸Den da Assyria territorial govna guy hear dat da Assyria king an his army wen leave Lakish town. So da govna guy go back an find da king fighting agains Libnah town.

⁹Lata, Sennakerib, da Assyria king, hear someting bout Tirhakah, da king from Sudan. Somebody tell Sennakerib, “Tirhakah come out fo fight agains you Assyria guys.” Wen Sennakerib hear dat, he send guys by Hezekiah. He tell dem

¹⁰fo tell Hezekiah da Judah king dis: “I know you stay trus yoa god, so you tink, ‘My God no goin let da Assyria king take ova Jerusalem town.’ But no let yoa god bulai you!

¹¹Tink bout dis: You awready wen hear wat us king guys Assyria side an oua army guys wen do to all da odda countries. We wipe um all out, fo give dea land to oua god. So, you tink you goin get outa dat?! No way!

¹²Da gods fo da peopos from Gozan, Haran, Rezef, an da Eden peopo inside Tel Assar -- you tink dea gods wen get da peopos outa trouble, da time my ancesta guys wipe dem out? Not even!

¹³Now, wea da kings fo Hamath, Arpad, Sefarvaim town, Hena, Iva?! Dey all gone!”

¹⁴Afta Hezekiah read da letta from da messenja guys, he go up to da Temple Fo Yahweh. He spread out da letta in front Yahweh.

¹⁵Den Hezekiah pray to Yahweh:

¹⁶“Yahweh! You, da God Ova All Da Armies. You da God fo us Israel peopo. You get yoa spesho place right hea inside dis Temple, inside da spesho room wit da awesome angel watcha guys on top da Box. You da ony One dass God fo real kine, cuz you da God ova all da kings an dea peopos all ova da world. Was you, da One dat wen make da sky an da earth.

¹⁷Lissen real good, Yahweh! Open yoa eyes an look! Hear all da stuff Sennakerib wen tell fo talk stink bout you, da God Dat Stay Alive Fo Real Kine!

¹⁸“Az true, Yahweh, dat da Assyria king guys wen go wase all da diffren countries an dea land,

¹⁹an throw all da idol kine gods da peopo wen make inside da fire an wipe um out. Cuz dose idols, dey not real gods, but ony wood an stone statue.

²⁰Now, oua God Yahweh, get us outa trouble an no let da Assyria king hurt us. Den, all da kings an dea peopos all ova da world, dey goin know dat you Yahweh, da ony God dass fo real!”

²¹Den Isaiah, Amoz boy, send dis letta to Hezekiah: Dis da ting Yahweh, da God fo da Israel peopo, tell me: “Cuz you wen pray to me bout Sennakerib, da Assyria king,

²²Dis wat I tell agains Sennakerib: ‘My peopo inside Jerusalem town Dey jalike one young wahine Dat tink you no good, an dey laugh at you. Jalike one wahine dat shake her head an look Wen you stay running away!

²³Who you wen make shame, Sennakerib?! Who you talk stink bout, aah?! You wen go talk strong agains me! You ack high nose agains me, Da Good An Spesho God fo da Israel peopo!

²⁴You wen send guys dat work fo you, Dat wen try make me, da Boss, shame. You wen tell, “Me, Sennakerib, I get plenny war wagon! I can go on top a da high mountains, To da mos far part a da Lebanon mountains, Fo cut down da mos tall cedar trees An da bestes pine trees! Me, I da kine guy can go all da way to da end A da mos high places, Da forest wea da bestes tree grow!

²⁵Me, Sennakerib, I dig pukas fo watta inside odda peopo countries. An drink da watta from ova dea. Wen I go thru da streams Wea da Nile Riva split up, Egypt makai side, I make um all come dry!”

²⁶“‘Sennakerib, you neva hear, o wat? From long time I, Yahweh, wen start fo make all dis happen, Befo time, I wen make da plan dat way awready, An now I stay make um happen -- Fo you bus up da towns dat get strong walls An make um come pile a stone,

²⁷An fo you make da peopo dat live dose towns So dey no mo powa. Dey lose fight an come shame. Dey come jalike da plants dat grow inside one field, Da young green grass O da grass dat grow on top da roof O on top wea you plow fo plant da wheat, Dat da sun burn um befo can grow.

²⁸“‘But I know wea you stay, Sennakerib. I know wen you come an go. I know how you yell an stay hot agains me!

²⁹Cuz you stay hot fo go agains me, An I hear how big head you stay Cuz you tink az easy fo handle me, I, Yahweh, goin make you my prisona Fo do wateva I like, Jalike I put one hook inside yoa nose, An one bit inside yoa mout, jalike you one horse. An I goin make you go back yoa own place On top da same road wea you wen come from.’

³⁰“An fo you, Hezekiah, dis da sign I, Yahweh, give you: You goin eat! Dis year, eat da wheat dat grow dea awready From da wheat seed dat fall down las year wen dey cut da food. Da year numba two, eat wateva come up from dat. But da year numba three, plant seed an cut um fo food. Plant grape fo make grape farm, an eat da grapes.

³¹One mo time, goin get some a da Judah peopo Dat da Assyria guys wen leave dea. Dey goin be jalike one plant Dat da root go down an da fruit come up.”

³²Cuz da res a da peopo from Jerusalem goin come. Goin get peopo dat da Assyria guys leave behind wea da Temple stay. Yahweh, Da God Ova All Da Armies, He goin do um, cuz az wat he really like do.

³³Az why dis wat Yahweh tell bout da Assyria king: “No way he goin come inside Jerusalem town. His guys no goin shoot arrow ova hea. Dey no goin get dea shield fo fight agains oua army guys, O pile up dirt by da wall So dea army guys can run ova da top.

³⁴Da same way he wen come, Da same way he goin go back. He no goin come inside dis big town.” Az wat Yahweh tell.

³⁵An he tell, “I no goin let da Assyria army come inside dis town! I goin get da peopo hea outa trouble! I goin do all dat fo me An fo da promise I wen make to King David, my worka guy.”

³⁶Den one angel messenja guy from Yahweh go out fo fight. He kill 185,000 army guys inside da Assyria camp. Wen da odda peopo get up early da nex morning, get plenny mahke bodies all ova da place!

³⁷Az why Sennakerib, da Assyria king, get outa dea quick an go way. He go back Nineveh town an stay ova dea.

³⁸Lata, one time wen Sennakerib go down fo pray inside da temple fo his god Nisrok inside Nineveh, his own boys Adramalek and Sharezer wen take dea sword an kill him. Den dey run away to da Ararat land. Esarhaddon, Sennakerib's odda boy, come da nex king fo da Assyria peopo.