Read Hawaii Pidgin Isaiah 4 Bible Online

Isaiah 4 - Hawaii Pidgin bible

Isaiah 4

¹Dat time, afta plenny guys mahke in da war time, Seven wahines goin grab one a da guys dat still stay dea. Dey goin tell um, “Ony marry us So us can get yoa name, So peopo no talk bad bout us An make us shame cuz we no mo husban. We goin eat our own food, An wea our own clotheses.”

²Dat time, goin get one guy, Yahweh goin give him da right fo be king, Cuz he jalike one shoot Dat Yahweh make come up from da king ohana. Dat guy, goin be real good looking an stay awesome. Erybody goin know bout da stuff dat grow on top da land, Dat goin come real awesome, An da Israel peopo dat still yet stay alive dat time Goin feel real good inside bout all dat, An all da odda peopo goin get respeck fo dem.

³All da peopo dat still yet stay alive inside Jerusalem town, Peopo goin call dem “Spesho fo God” Cuz dea name goin stay write down.

⁴My boss goin clean up All da pilau kine stuff da Jerusalem wahines wen do. Jalike he goin wash clean da Jerusalem peopo Cuz dey wen make plenny oddas bleed an mahke. His Spirit goin be dea Judge An wit jalike one fire, he goin clean out all da bad kine stuff.

⁵Yahweh goin make one cloud Ova da Temple on top Mount Zion An ova erybody dat stay come togedda dea Fo show him respeck wen he tell um fo come by him. Day time, goin get one cloud wit smoke ova dem, Nite time, goin get real bright fire ova dem. Ova all dis awesome stuff, goin get one cova, Jalike one tent ova erybody.

⁶Dass goin be jalike one place fo shade Wen da sun stay hot, day time Goin be one place dey can go Fo hide an no get hurt From da storms an da rain.