Read Hawaii Pidgin Isaiah 40 Bible Online

Isaiah 40 - Hawaii Pidgin bible

Isaiah 40

¹Dis wat yoa God tell you guys: “Make my peopo res inside! Help um feel good inside!

²You guys, talk to da Jerusalem peopo An tell all dem, So dey feel good inside. An tell dem dat da hard work dey wen do Cuz dey owe me plenny, all pau awready. Da bad tings dey wen do, Dey awready punish fo all dat. Me, Yahweh, I wen awready pay dem back double Fo all da bad kine stuff dey wen do.”

³Somebody call out, “Ova dea inside da boonies, Move eryting outa da way, fo Yahweh! Strait thru da Arabah Valley, Make one big road fo our God!

⁴Fill up ery gulch dat cross dat road! Cut thru all da mountains an hills Fo make da road level! Wea da ground not level, make um smooth! Make all da rough places flat!

⁵Yahweh goin let erybody see how awesome he stay. Erybody inside da world goin see dat, same time. Cuz dass wat Yahweh wen tell!”

⁶Somebody tell, “Call out!” An I aks um, “Wat I goin tell?” He tell me fo tell dis: “All da peopo, jalike da grass. Dey do ony wat dey can do, But dey jalike da wild flowers Dat grow inside one field.

⁷Da grass come all dry, An da flowers come poho an fall down, Weneva Yahweh blow on top um. Fo shua, da peopo, dey jalike da grass.

⁸Da grass come all dry, An da flowers come poho an fall down, But wat our God tell, Dat goin stay foeva.”

⁹“You Mount Zion peopo dat tell good kine stuff, Go up on top one high mountain, Fo tell erybody! You Jerusalem peopo dat tell good kine stuff, Talk loud! No scared! Tell da peopo inside da towns all ova da Judah land, ‘Look! Dis yoa God!’

¹⁰Az cuz Yahweh da Boss stay coming wit power. He stay in charge cuz he strong. He stay ready fo pay good Da ones dat help him an work fo him.

¹¹He take care his peopo, Jalike one sheep farma take care his sheeps. He carry da bebe sheep in his arm, An carry dem on top his chest, An show da way to da mudda sheeps So dey can go res.

¹²“Yahweh, he da One Put all da ocean watta inside his hand, Fo tell how plenny get. Wit his open hand he check out da sky, Fo tell how wide dat. He put all da dirt inside da world inside one box Fo tell how plenny get. He put all da mountains an hills on top da scale, Fo tell how heavy dem.

¹³You tink get somebody Dat can tell Yahweh how fo use his Spirit?! Nobody can! You tink get somebody Dat smart enough fo teach Yahweh someting?! Not even!

¹⁴You tink get somebody Yahweh wen aks him wat fo do, An da guy help Yahweh fo undastan stuff?! Nah, no mo nobody! You tink get somebody Wen teach Yahweh da right way fo judge wass right an wass wrong, O who teach him bout da world?! Who help him know how fo undastan stuff?! No mo nobody lidat!

¹⁵“Da way Yahweh tink bout da peopo Inside all da countries, Dey jalike one drop watta from inside one bucket, Jalike litto bit dirt Dat fall down on top one scale, An no change notting. He even weigh da islands Jalike dey small kine dust, Da kine dat come outa da air.

¹⁶All da trees on top da Lebanon mountains Not nuff fo make one fire on top one altar. An all da animals dat live ova dea, Dey not nuff fo make da kine sacrifice Dat you burn up.

¹⁷Wen Yahweh look da peopo in all da diffren countries, Jalike dey notting! Da way he tink bout dem, He know dey no worth notting, Jalike dey notting to him.

¹⁸If you guys like tell, “God, he jalike one guy,” Den, who dat guy?! No mo! If you goin say he look jalike someting, Den, wat da ting you guys tink he look like, So you can look at him an da ting, togedda?! No mo!

¹⁹Yahweh, he not one idol kine god! Fo make one idol, One guy melt metal fo make um. Den somebody put gold all ova on top um An melt silva fo make chain.

²⁰O if somebody no mo nuff fo pay fo dat kine statue Fo make one gif to his god, He go find da kine wood dat no goin rot. Den he go look fo somebody Dat know how fo make one idol kine god Dat can stand an no goin fall down.

²¹You guys neva know all dis, o wat?! You neva hear bout dis?! Nobody eva tell you guys from da start, o wat?! You guys neva tink bout, From da time God wen make da world, till now?!

²²God, da One stay live above da earth an da sky! Unda him, look jalike one big circle, An da peopo dat live dea, Fo him dey look jalike small grasshoppas. He da One stretch da sky jalike one big curtain, Jalike wen you spread out da cloth Fo set up da kine tent you goin live inside.

²³He da One make da importan peopo come notting. He make da judge guys all ova da world jalike dey notting.

²⁴Dey jalike plants Dat somebody stick inside da groun, O throw da seed, An den dey start fo grow root inside da groun. Right den an dea, dey pau, Jalike God blow on top um An dey come all dry, An den one storm come An blow um away, Jalike da junk kine stuff from da wheat.

²⁵Da Good An Spesho God tell dis: “If you guys like tell, ‘God, he jalike one guy,’ Den, who da guy, Dat you tink I jalike him?! No mo!” Az wat da Spesho One aks.

²⁶Eh, you guys, look up inside da sky! Who you tink wen make all dis stuff?! Az da same One bring out da stars one by one. Get plenny a dem, jalike one army! He call da name fo ery one a dem. Cuz God stay strong an get plenny power, Ery star stay dea.

²⁷You Israel peopo, dat come from Jacob, How come you guys tell, ‘Yahweh no can see wat stay happen to me! My God no care notting bout my rights!’

²⁸You guys neva know all dis, o wat?! You neva hear bout dis?! Yahweh, he da God dat stay foeva! He da One wen make Even da mos far places inside da whole world. He no goin come tired o worn out. Nobody can check out da way he undastan eryting!

²⁹He da One make da tired peopo come strong. He give da weak peopo mo an mo powa.

³⁰Even da teenage guys get tired an worn out, An da young guys trip an fall down.

³¹But da peopo dat wait fo Yahweh help dem, Dey goin change so dey come mo strong still yet. Dey goin fly up jalike da eagle Wit dea wide wing. Dey goin run an no come tired. Dey goin walk an no come worn out.”