Read Hawaii Pidgin Isaiah 42 Bible Online

Isaiah 42 - Hawaii Pidgin bible

Isaiah 42

¹Yahweh tell, “Hea, da Guy Dat Work Fo Me. I kokua him all da way. He da guy I pick awready. I feel good inside cuz a him. My Spirit stay inside him. He goin do wass right Fo all da peopo inside da diffren countries.

²He no goin yell o talk loud O make big noise on top da streets.

³Wen somebody crush one bamboo litto bit, He no goin broke um, He goin give chance. Wen one candle almos pau burn, He no goin pio um. You can trus him Fo judge peopo da right way erytime.

⁴He no goin hold back o lose fight, Cuz he goin make shua da peopo all ova da world Goin judge da right way erytime. Da peopo dat live on top da islands goin wait So dey can hear da rules he goin teach [um].”

⁵Dis wat da God Yahweh tell, Da One wen make da sky an stretch um out. Da One dat stay spread out da world an eryting dat come out from da groun. He let da peopo on top da earth breathe. He let erybody dat walk on top da earth stay alive. Dis wat he tell:

⁶“Me, Yahweh, I da One Do right wen I call you. I goin hold yoa hand fo make you stay strong. I goin take care you. I goin make you fo be da one Fo make deal fo all da peopos, An fo be jalike one light Fo all da nations.

⁷Wen I say ‘light,’ I mean: Jalike you goin open da eyes Fo peopo dat no can see, Jalike you goin take out da peopo Inside one prison unda da groun, Da ones dat stay inside one dark place.

⁸“Me, I Yahweh. Dass my name -- ‘Da One Dat Stay’! I no goin let nobody tink Dey awesome jalike me. I no goin let da peopo tell good kine stuff Bout da idol kine gods Jalike dey tell bout me.

⁹All da stuff from befo time, happen awready. Now, goin get new kine stuff, An I da One tell bout um. Befo anyting start fo happen, I let you guys hear bout um. Jalike da seed stay inside da groun awready Befo da plant start fo grow.”

¹⁰Sing one new song fo Yahweh! Sing from da mos far places inside da world Fo tell dat he da greates! Sing, you peopo dat go work on da sea An eryting dat live inside da sea, you sing too! Sing, you islands, An da peopo dat live on top dem!

¹¹Sing, you peopo dat live Inside da towns on da boonies. Let da peopo stay good inside Dat live in da small towns Wea da Kedar ohana peopo stay. Let da peopo inside Sela town yell Cuz dey stay good inside. Let dem call real loud From da top a da mountains.

¹²Let dem tell how awesome Yahweh. On top da islands, let dem tell Good stuff bout him!

¹³Yahweh, he goin out fo fight Jalike one strong army guy. Jalike one army guy he stay ready fo fight, An he yell. He stay huhu, an he yell fo start fo fight Da guys dat stay agains him, An he goin be da winna ova dem!

¹⁴Yahweh tell, “From long time I no say notting. I stay quiet an no let myself talk. But now, time fo me talk strong, Jalike one wahine wen she born one bebe, An she make plenny noise, An breathe hard, jalike no can get nuff air.

¹⁵I goin bus up da mountains an hills, An make eryting dat grow on top dem come all dry. I goin make da rivers come down low, So dey get islands in da middo. I goin dry up all da ponds.

¹⁶I goin take da guys dat no can see On top one road dey neva know befo. I goin show um wea fo go No matta dey donno da way. No matta stay dark all aroun dem, I goin make light come in front dem. I goin make da rough kine place come smooth. All dese tings, I goin do um. I no goin leave dem by demself.

¹⁷But da peopo dat trus da idol kine gods An tell da metal statues, ‘You oua gods,’ Dey goin go back, dey no goin come by me! Dey goin come plenny shame!”

¹⁸“Lissen, you peopo dat no can hear! Look so you can see, you peopo dat no can see!

¹⁹Wen I talk bout somebody dat no can see, Who you tink I talking bout? I talking bout my peopo, dat work fo me! Wen I talk bout somebody dat no can hear, Dey da ones I stay send fo tell my message! Da ones dat get deal wit me, Fo me make eryting come good for dem, Dey no see dat. Dey suppose to work fo me, But dey no see notting.

²⁰No matta you see plenny stuff, You no rememba wat you see. No matta yoa ears stay open, You no hear notting.”

²¹Yahweh wen really like make da Rules he teach importan an awesome. Dat make him feel good inside An show erybody dat he stay do da right kine ting.

²²But dis Israel peopo, Odda peopo wen rip off an steal An take away dea stuffs. Jalike all a dem stay down Inside one deep hole an no can come out, O peopo hide um inside da jail. Odda peopo make dem dea slave, An no mo nobody fo get dem outa dea. No mo nobody fo tell, “Give back da stuffs you wen rip off!”

²³Wat one a you guys goin lissen wat I tell?! Who goin lissen good An den do someting bumbye?

²⁴Wat god wen let da odda guys Take da Jacob ohana an rip um off?! No was one nodda god! Wat god wen let peopo Go take da Israel peopo stuffs?! No was one nodda god! Was Yahweh let um do dat! An was us Israel peopo Dat wen do bad kine stuff agains him! Oua peopo neva like do notting Da way he tell us fo do. Dey no like lissen to his Rules.

²⁵So, dass how come Yahweh wen come real huhu Wit da Israel peopo, an punish dem. He make odda peopo go make war agains dem. Get fire all aroun dem But dey still yet no undastan! Da fire wipe dem out But dey still yet no tink!