Read Hawaii Pidgin Isaiah 46 Bible Online

Isaiah 46 - Hawaii Pidgin bible

Isaiah 46

¹Da gods Bel an Nebo from Babylon, Dey no stand up no moa! Da statues dat look like dem, Dat you Babylon guys carry befo time Fo make parade, Now you guys put um on top animals, An stay heavy fo even da animals carry um, Cuz dey tired.

²Da Babylon gods togedda, Dey no can stand up no moa. Da peopo, dey no can bring back da statues. Dass why da Babylon gods stay prisnas too. Dey gotta go wea eva da statue go.

³“Lissen to me, you Jacob peopo, An all you Israel peopo Dat still stay on top da land. I wen carry you guys from da start, An wen lif up you guys from da time you wen born.

⁴Even wen you guys come old an get gray hair, I still Yahweh. I still goin help you guys. I wen make you guys An I goin carry you guys. I goin get you guys outa trouble.

⁵Who, you guys can tell me, I jalike dem? Dat you can say, me an dem, same same? Get somebody, you can say I look jalike dem, and dey look jalike me? Nah.

⁶Get peopo pour out gold from dea money bag, An weigh dea silva on top da scales. Dey pay one metal worka guy Fo make da gold come one god. Den dey go down wit dea face on top da groun An pray to um.

⁷Dey carry da idol kine god up on top dea shoulder, An take um to da place dey goin put um. An put um down dea. Da idol kine god stand up ova dea An no move. Somebody call to um, but da idol no can talk. Da idol no can get nobody outa dea trouble.

⁸“Rememba all dis, Bout Yahweh an yoa idol kine gods. No scared fo tink! An you guys dat no like lissen, Tink bout dis ova an ova.

⁹Rememba da stuff dat wen happen Long time ago, befo time. Cuz me, I God. No mo odda god stay jalike me, Same same.

¹⁰From da start, I da One stay tell How da end goin come. From long time ago, I tell tings Dat nobody do yet. I da One tell dis: ‘Da plan I make, Az how goin happen. I goin do eryting how I like fo do.’

¹¹I call one scavenja bird from da eas side. I call one guy from one far place Fo him do wat I wen make plan fo do. Fo shua, wat I tell, I goin do. I set up fo do stuff, an I going do um!

¹²Lissen to me, you hard head guys, You guys dat no even like try Fo do da right kine stuff!

¹³I stay do wass right erytime, An I goin come near you! I no stay far. I no goin wait long time Fo get my peopo outa trouble. On top Mount Zion I goin get da Israel peopo outa trouble, An dey goin tell peopo how awesome I stay.”