Read Hawaii Pidgin Isaiah 48 Bible Online

Isaiah 48 - Hawaii Pidgin bible

Isaiah 48

¹You Jacob ohana peopo, Lissen wat I goin tell you guys. You guys get da Israel name too, from yoa ancesta, An you Jerusalem peopo all come from Judah. Wen you guys make strong promise, You use Yahweh name. You tell da God Israel wen pray to Fo make shua you do wat you wen promise. Still yet, you guys no mean wat you tell, An you no do wass right.

²You guys tell dat you come From Jerusalem, da town dat stay spesho fo God, An dat you guys trus da God fo da Israel peopo -- His name, Yahweh, Da God Ova All Da Armies.

³Yahweh tell: “Long time befo, I wen tell All da firs tings dat goin happen. I wen make shua peopo hear bout um. Den, wen I stay ready, Right den an dea I do um, An da tings I wen tell, happen.

⁴Cuz I know you guys get hard head. Yoa neck jalike iron An yoa forehead jalike bronze metal.

⁵Az why I wen tell you guys all dis stuff Long time ago, befo dey happen. I wen make shua you guys hear um, So den you guys no can tell, ‘Az was my idol kine god, dat do um, My wood kine god an my metal kine god, Dey da one say fo make um happen!’

⁶You guys wen hear all dis stuff. Look, an tink bout um! Why you guys no tell, az true, dat?! An from now, I goin tell you guys new kine stuff, Secret kine tings dat you neva know befo.

⁷I wen make dem jus now, No long time befo. You guys neva hear bout dem befo today, So you guys no can tell, ‘Yeah, I know bout all dat stuff awready.’

⁸You guys neva hear o know Bout wat I say goin happen. From long time ago you no like lissen. But I know dis fo shua -- No can trus you guys fo notting. Erybody know, you guys stay go agains me From da time you born.

⁹Cuz I like peopo know wat kine God me, An I like dem tell good tings bout me, I goin wait an no come huhu yet. I goin hold back An no cut you guys off from me.

¹⁰An you know wat I stay do to you?! I stay take out da junk kine stuff inside you. But I no goin melt you guys Inside one real hot fire Jalike peopo melt silva metal Fo take out da junks. Me, I make you guys suffa plenny. Az how I check out you guys An make shua you come okay inside.

¹¹I do all dis cuz a who me, Cuz no way I goin let peopo ack Like I not good an spesho. I da Awesome One, An I no goin let nobody tink Dat one nodda god can do wat I do.”

¹²“You Jacob peopo from da Israel ohana, Lissen wat I tell you guys. You da guys I wen call Fo come my peopo. I da One dass God fo real kine. I da One from da start, An mo den dat, I goin be da las.

¹³Wit my powa an my own hand, I wen make da foundation fo da earth An spread out da sky an eryting inside dea. Weneva I call da earth an da sky, Dey all stand up.

¹⁴“All you peopos, come togedda an lissen! Wat idol kine god Wen tell bout dis stuff dat goin happen?! No mo! Me, Yahweh, I wen pick my friend Cyrus. He goin do eryting I like him do Agains da Babylon peopo.

¹⁵Me, I da One wen tell dis, An I wen call Cyrus awready. I make him go Babylon side, An he goin be da winna ova dea.

¹⁶Come nea me, you guys, An lissen to dis. From da first ting I tell, till now, I neva talk secret kine. Wen da ting happen, I stay dea.” An now, my boss Yahweh Send me, Isaiah, fo tell dis, An he send his Spirit too.

¹⁷Dis one spesho message from Yahweh. Him, da One dat pay da price Fo get you guys outa trouble. He God, da Spesho One fo da Israel peopo. Dis wat Yahweh tell: “I Yahweh, yoa God. I da One stay teach you guys Wat da bestes kine stuff fo you. I stay show you guys da way fo go.

¹⁸I wen like fo you guys lissen Wat I tell you guys fo do befo, But you no like lissen! I wen like fo eryting go okay fo you guys, Jalike one river dat no make noise An stay full all da time, But you not okay! I wen like fo you guys get um right wit me, Jalike da wave dat come in from da ocean all da time, But you no get um right!

¹⁹I wen like fo yoa kids come plenny Jalike da sand on top da beach Dat no mo nobody can count, But dey no goin come plenny! I wen like fo dem no wipe out eva An cut off from me, But now, dey goin wipe out!” Dass wat Yahweh tell.

²⁰“Get outa Babylon town! Run away from da Babylon guys! Make big noise an dance an sing Cuz you stay feel good inside! Make da peopo hear dis All da way to da mos far place on top da earth! Tell dis: “Yahweh pay da price awready Fo get his worka guys, da Jacob ohana, outa trouble.”

²¹Da time Yahweh take oua peopo Thru all da dry places, Dey neva come thirsty. He make da watta come outa da big rock fo dem. He broke da rock, an da watta pour out.

²²Yahweh tell dis: “Da peopo dat do bad kine stuff, Dey no goin res!”