Read Hawaii Pidgin Isaiah 53 Bible Online

Isaiah 53 - Hawaii Pidgin bible

Isaiah 53

¹You tink get peopo dat believe Wat dey wen hear from us guys?! No way! You tink Yahweh wen show any a dem How strong him?! Not even!

²Da Guy Dat Work Fo Yahweh, He wen grow up in front Yahweh, Jalike one young plant grow from one root From da groun wen no mo watta. He not good looking, An he no look like one king. We no see notting Fo make us like come his peopo.

³Peopo make him jalike he notting. Dey no let him do notting wit dem. He one guy dat stay sore inside, An he know how feel fo suffa plenny. Peopo turn aroun look da odda way Cuz dey no like see him. Dey make him jalike he nobody, An nobody care bout him.

⁴Still yet, wen us guys suffa plenny, Da Guy Dat Work Fo Yahweh, He take dat all away. Wen us guys stay sore inside, He carry all dat fo us. But us guys, we ony figga him Az da guy dat God wen wack an bus up, An make um feel like he no good.

⁵But Da Guy Dat Work Fo Yahweh, He da one peopo wen poke Cuz us guys go agains God. Him, da one dey smash Cuz us guys do wrong. Him, da one dey punish So eryting come good fo us. Him, da one dey wen whip An cuz a dat, he make us come good!

⁶We all go all ova da place jalike da sheeps. Ery one a us guys, we go our own way. But Yahweh, he let da Guy Dat Work Fo Him Take da blame fo da bad stuff all us guys do.

⁷Da Guy Dat Work Fo Yahweh, Da peopo give him hard time. Dey make him suffa, But he no say notting. Dey take him out jalike one sheep Fo kill him. But jalike da sheeps Wen dey cut off all da wool, dey no make noise, He no say notting too.

⁸Cuz da peopo put in jail Da Guy Dat Work Fo Yahweh. Dey judge him, Den take um away fo kill um. An da peopo dat stay alive dat time, Dey no even tink bout How dey cut him off From stay alive inside dea land. Cuz my peopo wen go agains God, Dey wack him.

⁹Dey set up one grave fo him Wit da bad guys. But wen he mahke, Dey put um inside one rich guy place. He mahke, no matta he no hurt nobody, An he no bulai nobody.

¹⁰Still yet, was Yahweh Dat figga az good, Fo smash da Guy Dat Work Fo Him An make him suffa. Yahweh make him mahke, jalike one sacrifice Fo all da blame peopo get Cuz a da bad kine stuff we do. But still yet, da Guy Dat Work Fo Yahweh, He goin see his kids, an live long time, An he goin get da powa Fo wateva Yahweh like, He goin make happen.

¹¹Afta Da Guy Dat Work Fo Yahweh Work real hard an suffa plenny, He goin see [wat happen cuz a dat / da light again], An he goin feel good inside. Yahweh tell, “Cuz my worka guy know wat he doing, An cuz he do da right ting erytime, He goin make plenny peopo Come right wit me. Az cuz he da one take da blame Fo all da bad kine stuff dose peopo do.

¹²Az why I goin give him his share, Same ting jalike I goin give plenny odda peopo. He goin be jalike one a da strong army guys Dat bring back plenny stuff from one war An give all da peopo dea share. Cuz he let da peopo kill him, An even count him Wit da peopo dat go agains me. Him, da one take da blame fo plenny peopo, An pray fo da peopo dat stay go agains me.”