Read Hawaii Pidgin Isaiah 54 Bible Online

Isaiah 54 - Hawaii Pidgin bible

Isaiah 54

¹“Eh, ma peopo! Sing and yell cuz you stay good inside! Cuz befo time, you guys Was jalike one wahine dat no mo her own kids yet, Dat neva feel da sore from born one bebe. But now, eryting goin come good fo you guys, Jalike if dat wahine dat wen stay live by herself She goin get mo plenny kids Den da wahine dat get husban.” Dass wat Yahweh tell.

²“Make mo big, da place fo yoa tent. Stretch um mo wide. No hold back, my peopo! Make da rope mo long, An make da pegs mo strong.

³Cuz you guys goin need mo plenny room, On the right side an da left side. Da peopo dat goin born from you Goin take ova da land from odda countries, An go live inside da towns Dat da odda peopo wen leave.

⁴“Eh ma peopo! No scared, cuz you no goin come shame notting. Cuz nobody goin make you shame. Jalike da wahine dat no mo her own kids, But now she get um, She foget, her was shame Befo time, wen her was young. Jalike she no goin rememba How bad peopo wen make her feel Wen her no mo husban.

⁵Az cuz fo my peopo, You jalike da wahine dat get husban now -- Cuz jalike I yoa husban, Da One wen make you! Me, Yahweh, Da God Ova All Da Armies, Dass my name! I da One dat pay da price Fo get you outa trouble, I Da Good An Spesho God Fo da Israel peopo! Da God Fo Da Whole World, Dass wat dey call me!

⁶Befo time, you guys get plenny trouble, Jalike you one wife yoa husban wen leave, An you stay sore inside. Jalike you was young An da guy wen marry you, Den he leave you. But now, jalike yoa husban stay call you fo come back.” Dass wat Yahweh tell.

⁷Yahweh tell: “Eh ma peopo, Ony short time I wen leave you guys. But I get plenny love an pity fo you guys, An I goin bring you guys back togedda wit me.

⁸I wen get real mad, Jalike one flash flood, Cuz I no like wat you guys stay do dat time. I turn my face away so you no can see um Fo short time. But I get love an pity fo you guys, An I goin stay tight wit you foeva.” Dass wat Yahweh tell, Da One dat pay da price Fo get you guys outa trouble.

⁹“Fo me, dis jalike da time da guy Noah live An da big watta wipe out eryting. Dat time, I wen make one strong promise Dat da big watta, da kine Noah time, No goin cova da earth again. Same ting dis time, I stay make one strong promise Dat I no goin come huhu wit you guys again. I no goin tell you guys no moa.

¹⁰No matta no mo da mountain An da hills shake, Da way I stay tight wit you guys, Dat no goin change, An da deal I wen make wit you guys Fo make shua eryting stay okay fo you, Dat goin still stay solid.” Dass wat Yahweh tell. He get love an pity fo you guys.

¹¹Yahweh tell: “Eh ma peopo! You guys get hard time now, Jalike one town dat get hard time, Jalike big storms stay pound da town. An nobody care Fo give you guys good kine words. But you know wat I goin do, How I goin change all dat fo you guys?! Dis da picha! Jalike I goin build yoa bus up town Real nice dis time. Jalike I goin put blue lapis lazuli jewel stones On top da foundation, An put up da building stones Wit da kine mud dat cost plenny.

¹²Jalike I goin make da towas aroun da town Wit ruby kine stones, An da gates wit stone dat look like fire. Goin get rich kine stones all ova da land. Dass one picha fo da town, Fo how I goin make eryting come good fo you guys!

¹³“Me, Yahweh, I da One Goin teach all yoa peopo. I goin make eryting come plenny good fo dem.

¹⁴You guys goin come solid Cuz you stay do da right ting erytime, No mo nobody goin give you guys presha, An you no need stay scared notting. Cuz da tings you was scared, No even goin come nea you guys.

¹⁵Bumbye, if somebody attack you guys, Dat no goin be cuz a me. Whoeva attack you guys Dey goin get wipe out in front you.

¹⁶“Tink bout dis! I da One wen make da guy Dat work wit da iron, An fan da coals fo make fire, An make tings peopo use fo fight. An I da One make da army guys Dat wipe out da peopo.

¹⁷But no matta wat kine tings peopo make Fo fight you guys wit um, Dey no goin win. No matta wat peopo tell in front da judge Wen dey poin finga you guys, You guys goin prove dey wrong. All dis I goin do fo you guys Cuz I Yahweh, an you guys work fo me. Dass how I goin show Dat my peopo get um right wit me.” Dass wat Yahweh tell.