Read Hawaii Pidgin Isaiah 55 Bible Online

Isaiah 55 - Hawaii Pidgin bible

Isaiah 55

¹Yahweh tell: “Hui! All you peopo dat need help, come! I tell da peopo dat stay thirsty, Come by me an I give you watta! No matta you guys no can pay, Come get wheat so you can eat! Come, get wine an milk! No matta you no can pay, No goin cost you notting!

²How come you guys stay pay wit silva Fo stuff dat you no can eat? How come you guys stay work Fo stuff dat no goin fill you up? You guys gotta lissen to me! Eat good kine stuff. Den you goin stay real good inside Cuz you stay eat all da good kine food!

³Come by me, an lissen real good! Lissen, so dat you goin come alive inside. I goin make one deal wit you guys Dat goin stay foeva: Wat I wen promise King David dat I goin do, Dat I goin stay tight wit him foeva, I goin do dat fo shua, Cuz I do wat I promise fo do!

⁴Look! Da one I wen make da promise bout, I let him tell all da diffren peopos wat I stay do, An be dea leada guy, an give dem my Rules.

⁵An den, I tell dat guy, ‘You goin tell da nations fo come, Dat you donno befo. An da peopo in da odda countries Dat donno you, Dey goin run to you. Az cuz I Yahweh, yoa God, Da Good An Spesho One fo da Israel peopo, Da One make you come awesome.’-”

⁶Go all out fo know Yahweh Right now, wen he let you guys meet him. Call him fo help you Now, wen he stay nea.

⁷Fo da bad kine peopo, Da ones dat stay make trouble, Az good, dey leave da stuff Dey do befo time, An no tink bad kine stuff. Mo betta, dey turn back to Yahweh, Cuz he goin show pity fo dem. Wen dey turn back to oua God, He goin do plenny fo let dem go Fo wat dey wen do befo time, An hemo dea shame.

⁸Yahweh tell dis: “Da way I tink, az not da way you guys tink. Da way I do stuff, az not da way you guys do stuff.

⁹Jalike da sky stay mo high den da earth, So, da way I do stuff, stay mo high Den da way you guys do stuff. An da way I tink, I tink mo betta Den da way you guys tink.

¹⁰Da rain an da snow come down from da sky, An befo dey go back up dea Dey give all da watta da groun need Fo make da plants come up. Dass how da groun make seed Fo da farma guys plant bumbye, An get food fo da peopo eat.

¹¹Dass jalike da tings I tell! Wen dey go out from my mout, Fo shua, dey goin come back by me An goin change tings. Da tings I tell, goin do wat I like um do, An make happen Wat I send fo make happen.”

¹²Bumbye, wen you guys leave fo come back ova hea, You guys goin dance an sing. God goin lead you guys out, An eryting goin come good fo you. Jalike da mountains an hills Goin sing loud in front you guys, An all da trees in da fields goin clap dea hands.

¹³Goin get pine tree Wea befo time get ony thorn bush, An flowa bush, Wea befo time get ony thistle. Dis goin come lidat So erybody goin know wat kine God Yahweh. Goin stay lidat foeva, Jalike one sign dat nobody goin wipe out.